នាយ សានម៉ៅ ត្រដរមកបុណ្យសពលោកតា វីតមីនសេ ទាំងខ្លួនល្ហិតល្ហៃ

2018-03-30 03:19:39
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅវេលាដែលអតីតតារាកំប្លែងលោក វីតាមីនសេ បានលាចាកលោកទៅនេះ សិល្បករ សិល្បការិនីគ្រប់វ័យទូទាំងប្រទេសបានបង្ហាញក្ដីសោកសង្រេងយ៉ាងខ្លាំងចំពោះការបាត់បង់បុគ្គលដែលបន្សល់ទុកស្នាដៃយ៉ាងច្រើនក្នុងសង្គមសិល្បៈខ្មែរ។

ព្រឹកនេះ សពលោកលោក វីតាមីនសេ កំពុងតម្កល់នៅផ្ទះដើម្បីឲ្យញាតិមិត្តមកគោរពលា និងធ្វើបុណ្យតាមពិធីនៃព្រះពុទ្ធសាសនា។ ក្នុងនោះ នាយ សានម៉ៅ សិល្បករជើងចាស់ដែលកំពុងមានជំងឺច្រើនរុករានកាយ ក៏កំពុងបង្ហាញវត្តមានទាំងសុខភាពមិនល្អប្រសើរនៅឡើយ។

ថ្លែងមកកាន់សារព័ត៌មាន Sabay នាយ សានម៉ៅ បានឲ្យដឹងថាខ្លួនទើបតែចេញពីសម្រាកនៅមន្ទីរពេទ្យរយៈពេល២ ៣ថ្ងៃប៉ុណ្ណោះ តែអ្វីដែលជំរុញឲ្យលោកព្យាយាមក្រោកពីកន្ទេលមកអង្គុយក្នុងរោងបុណ្យដែលមានទីតាំងនៅខណ្ឌសែនសុខនេះ ព្រោះតែអនុស្សាវរីយរាប់មិនអស់ ដែលលោកធ្លាប់មានជាមួយរៀមច្បង។

លោករៀបរាប់ទាំងអស់កម្លាំងថា៖ "មកនេះ ទាំងល្ហិតល្ហៃ ដើរអត់ចង់រួចផង ដើរបានតិចៗ គ្មានកម្លាំង តែក៏ត្រូវមកព្រោះអនុស្សាវរីយតាំងពីឆ្នាំ១៩៧៩ រហូតមក"។

តារាកំប្លែងដដែលបានឲ្យដឹងទៀតថា ខណៈនេះលោកកំពុងមានជំងឺសាហាវ៣ប្រចាំកាយ គឺលើសឈាម ទឹកនោមផ្អែម និងបេះដូង។

បើតាមការសួរបន្ថែមទៅក្រុមគ្រួសារបានឲ្យដឹងថា សពលោក វីតាមីនសេ ដែលទទួលអនិច្ចកម្មកាលពីរំលងអាធ្រាត្រថ្ងៃទី២៩ ឈានចូល៣០នេះ នឹងត្រូវបូជានៅល្ងាចថ្ងៃអាទិត្យ ទី០១ ខែមេសា នៅវត្តមកុដបុរី នាម៉ោង៥ ឬ៦ល្ងាច៕

អត្ថបទ៖ សុខណា

រាយការណ៍៖ ឆុង ស៊ីណាន