Original Song ធ្វើឲ្យ ពិទូ អេដា និង ពិសិដ្ឋ ទទួលបានតំណែងថ្មីក្នុងពេលតែ១

2018-04-04 03:39:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ម្សិលមិញនេះទូរទស្សន៍បាយ័នបានធ្វើសន្និសីទសារព័ត៌មានស្ដីអំពីកម្មវិធីមួយមានឈ្មោះថា "The Melody” គឺជាកម្មវិធីប្រឡងចម្រៀងថ្មីមួយប្លែក ដែលតម្រូវឲ្យបេក្ខជនច្រៀងបទ Original song ដោយក្នុងនោះមាន ហេង ពិទូ អេដា និង សួន ពិសិដ្ឋ ធ្វើជាគណៈកម្មការ។

ក្នុងកម្មវិធីសន្និសីទសារព័ត៌មានលោក អៀង វិច្ឆ័យ ជាពិធីករបានលើកឡើងថា ស្ថានីយទូទស្សន៍បាយ័ននឹងសម្រេចធ្វើការប្រឡងចម្រៀងថ្មីមួយដែលមានឈ្មោះថា "The Melody” ដើម្បីផ្ដល់ឱកាសដល់បេក្ខជនទាំងពីរភេទមានសមត្ថភាពនិពន្ធបទចម្រៀង និងបទភ្លេងឲ្យមានឱកាសទទួលបានគ្រូបង្វឹកល្អៗចាំជួយចង្អុលបង្ហាញដើម្បីបើកផ្លូវលើវិថីសិល្បៈ។ ចំណែកឯបេក្ខជនដែលគ្មានសមត្ថភាពតែងនិពន្ធក៏អាចមកដាក់ពាក្យប្រឡងបានដែរឲ្យតែមានសំឡេងល្អ។

លោកថា៖" ប៉ុន្តែបេក្ខជន ដែលចូលរួមតម្រូវឲ្យច្រៀងបទចម្រៀងOriginal song សម័យឥឡូវ និងពីដើមតែប៉ុណ្ណោះ មិនអាចយកបទចម្រៀង មិនមែនជាស្នាដៃនិពន្ធដោយកូនខ្មែរមកច្រៀងឡើយ។ យើងធ្វើកម្មវិធីនេះឡើងគឺដើម្បីលើកស្ទួយដល់ការតែងនិពន្ធ ជៀសវាងការលួចចម្លងស្នាដៃពីប្រទេសជិតខាង ដោយយើងមានគណៈកម្មការ ៣ រូបមាន ហេង ពិទូ អេដា និង សួន ពិសិដ្ឋ ជាអ្នកបង្ហាត់បង្ហាញផ្លូវដល់ពួកគាត"។

ក្នុងចំណោមគណៈកម្មការទាំង៣រូបក្នុងនោះកញ្ញា អេដា បាននិយាយថា នេះគឺជាលើកទី១ហើយសម្រាប់នាង មានឱកាសទទួលបានតំណែងជាគណៈកម្មការក្នុងកម្មវិធី "The Melody” ។ ដូច្នេះនាង ប្ដេជ្ញាចិត្តថា នឹងយកចំណេះដឹងបទពិសោធន៍ដែលខ្លួនធ្លាប់មានកន្លងមក ទៅផ្ទេរឲ្យបេក្ខជន និងបេក្ខនារី តាមលទ្ធភាពដែលអាចធ្វើទៅបាន។

ចំណែកឯគណៈកម្មការពីររូបទៀតមាន សួន ពិសិដ្ឋ និង ហេង ពិទូ ក៏លើកឡើងមិនខុសពី អេដា ប៉ុន្មានដែរ ដោយអ្នកទាំងពីរបានបង្ហាញអារម្មណ៍សប្បាយរីករាយ ដែលមានឱកាសដាក់ពិន្ទុឲ្យអ្នកចម្រៀងនិពន្ធថ្មី ទៅតាមសមត្ថភាពរបស់ពួកគេមានយ៉ាងសម្រិតសម្រាំងបំផុត។

បេក្ខជន និងបេក្ខនារីដែលមានសិទ្ធចូលប្រឡងចាប់ពីអាយុ ១៦ ដល់ ៣៥ ឆ្នាំ ហើយចំពោះអ្នកទទួលបានជយលាភីលេខ១នឹងទទួលបានរង្វាន់ជាទឹកប្រាក់ ១០០ លានរៀលពីកម្មវិធី។ គួរបញ្ជាក់ថាកម្មវិធីនេះនឹងចាក់ផ្សាយនៅថ្ងៃទី ២១ ខែ មេសា ឆ្នាំ ២០១៨ ក្រោយពីចូលឆ្នាំប្រពៃណីជាតិខ្មែរហើយ៕