រំភើបជំនួស! Justin Timberlake សុខចិត្តផ្អាកការប្រគំតន្ត្រីសិន ដើម្បីអ្នកគាំទ្រម្នាក់

2018-04-04 08:20:00
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀង Justin Timberlake បានបញ្ឈប់ការប្រគំតន្ត្រីរបស់លោកពាក់កណ្ដាលទី ដើម្បីបំពេញបំណងរបស់អ្នកគាំទ្រម្នាក់ឲ្យក្លាយជាការពិត។

កាលពីថ្ងៃច័ន្ទ ខណៈកំពុងប្រគំតន្ត្រីនៅរង្គសាលមួយឈ្មោះ Detroit's Little Caesars Arena តារាចម្រៀង Justin Timberlake បានប្រទះឃើញស្ត្រីម្នាក់ឈ្មោះ Darcell Baxtresser ដែលកាន់ក្រដាសមួយដោយសរសេរថា៖ "តើលោកអាចជួយប្រកាសពីការមានផ្ទៃពោះរបស់ខ្ញុំបានទេ?” ហើយប្រាកដណាស់ តារាចម្រៀងរូបនេះពិតជាពេញចិត្តនឹងជួយ។

បើតាមស្ត្រីដែលត្រៀមនឹងក្លាយជាម្ដាយគេរូបនោះបានប្រាប់វិបសាយ E!News ថា៖ "ខ្ញុំស្រឡាញ់ចូលចិត្តគាត់ (Justin Timberlake) តាំងពីខ្ញុំអាយុ៦ឆ្នាំមកម្ល៉េះ ដូច្នេះហើយប្រសិនបើខ្ញុំចង់ឲ្យនរណាម្នាក់លើលោកនេះប្រកាសពីការមានផ្ទៃពោះរបស់ខ្ញុំ ប្រាកដណាស់ថាជាគាត់"។

ជាមួយនឹងការបំពេញបំណងដ៏ភ្ញាក់ផ្អើល និងរំភើបមួយនេះដែរ ស្ត្រីវ័យក្មេងរូបនោះ បានបន្ថែមទៀតថា៖ "គ្រាន់តែរឿងនេះបានកើតឡើងភ្លាម បងប្អូនជីដូនមួយ និងមិត្តភក្តិរបស់ខ្ញុំមានការភ្ញាក់ផ្អើលជាខ្លាំង ដូច្នេះហើយខ្ញុំគិតថាខ្ញុំត្រូវតែប្រាប់គ្រួសាររបស់ខ្ញុំ។ ខ្ញុំបានផ្ញើសារទៅបងប្អូនបង្កើត និងឪពុកម្ដាយខ្ញុំនូវវីដេអូដែលខ្ញុំបានថត ហើយពួកគេពិតជាស្លុតអារម្មណ៍និយាយលែងចេញ។ ខ្ញុំក៏បានផ្ញើសារទៅប្ដីរបស់ខ្ញុំដែរ ហើយគាត់ឡើងនិយាយថា 'អូ Wow!!'”៕

ទស្សនាវីដេអូខាងក្រោម៖

ចុចអាន៖

ប្រភព៖ Eonline ប្រែសម្រួល៖ អន សុភក្ត្រា