ភ្ញាក់ព្រើត! "របាំគ្រុឌ" ធ្លាប់មានប្រវត្តិដ៏អស្ចារ្យជូនជាតិ តែមិនសូវមានអ្នកដឹង

2018-04-09 06:39:34
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកដែលទស្សនា "របាំគ្រុឌ" ជាប្រភេទរបាំសហសម័យដ៏ទន់ភ្លន់ តែបើមើលម្នាក់ឯងគួរឲ្យភ័យខ្លាចណាស់ ព្រោះមានក្បាច់រាំ និងភ្លេងដែលធ្វើឲ្យអ្នកទស្សនារំភើបតាមដំណើរនៃការសម្ដែង។ ជាពិសេសរបាំនេះធ្លាប់ទទួលបានជោគជ័យក្នុងថ្នាក់អន្តរជាតិរួចម្ដងមកហើយ។

អ្នកនាងហ៊ុន ប៉ែន ជានាដការីមានដែលឆ្នើមក្នុងការសម្តែងបានយ៉ាងល្អគួរឲ្យស្ញប់ស្ញែងនិង មានភាពល្អឯកហើយក៏ជាអ្នក ដំឡើងសិល្បៈនេះឡើង ដោយចំណាយពេលទាំងការហាត់និងការស្រាវជ្រាវច្រើនឆ្នាំ។

អនុប្រធាននាយកដ្ឋានទស្សនីយភាពសិល្បៈ អ្នកស្រី ហ៊ុន ប៉ែន និងជាម្ចាស់ស្នាដៃរបាំគ្រុឌបានប្រាប់ Sabay ថា អ្នកស្រីមានបំណងចង់បង្កើតស្នាដៃនោះតាំងពីឆ្នាំ១៩៩៧។ អ្នកស្រី បានចេញស្រាវជ្រាវក្នុងឆ្នាំ២០០០ដោយគិតទាំងទស្សនៈរបស់ពលរដ្ឋ និង ការវិវត្តន៍ក្នុងសង្គមផង។ នៅឆ្នាំ២០០៣ របាំនេះក៏មានរូបរាងអ្នកស្រីក៏បានចេញសម្តែង។ ក្នុងឆ្នាំដដែលនោះ អ្នកស្រីក៏បាននាំយករបាំនេះទៅចូលរួមប្រកួតរបាំសហសម័យលើទឹកដីឥណ្ឌូនេស៊ី ហើយទទួលបានចំណាត់ថ្នាក់លេខ១។ ក្រោយមកអ្នកស្រីបាននាំរបាំនេះទៅសម្ដែងនៅប៉ែកអឺរ៉ុប និងទទួលបានការគាំទ្រយ៉ាងច្រើនទៀតផង។

សាស្រ្តាចារ្យវ័យ៣៥ឆ្នាំរូបនេះ មានគម្រោងធ្វើឲ្យទម្រង់សហសម័យខ្មែរឲ្យមានការរីកចម្រើននៅក្នុងប្រទេសកម្ពុជា ទើបបន្តសកម្មភាពផ្សព្វផ្សាយដូច្នេះ។ អ្នកស្រី ហ៊ុន ប៉ែន៖ «ខ្ញុំស្រលាញ់សត្វគ្រុឌ កាលពី ឆ្នាំ១៩៩៧ខ្ញុំឃើញឪពុកខ្ញុំរៀបចំសម្ដែងដោយមានស្គរជាច្រើនចូលរួមទើបខ្ញុំមានគំនិតចង់បង្កើតរបាំមួយដែលប្រើក្បាច់ដូចសត្វគ្រុឌ និងឫទ្ធិអំណាចរបស់វា។ ខ្ញុំចង់ឲ្យពលរដ្ឋខ្មែរភ្លក់រសជាតិរបាំថ្មី មួយដែលនៅរក្សាក្បាច់ខ្មែរ និងដាក់ចូលបន្ថែមនៅអារម្មណ៍ដោយបង្ហាញទឹកមុខហាត់ជាដើម»។

ជាកូនស្រីពៅក្នុងចំណោមបងប្អូនស្រីទាំង៤នាក់ កើតក្នុងត្រកូលអ្នកសិល្បៈនៅរាជធានីភ្នំពេញ អ្នកស្រីបានចូលហាត់របាំតាំងពីអាយុ៥ឆ្នាំ។ ទោះមិនសូវទទួលបានការគាំទ្រពីក្រុម គ្រួសារ អ្នកស្រីមិនដែលមានគំនិតបោះបង់នោះឡើយ ។

អ្នកស្រីបញ្ជាក់ថាពីមួយឆ្នាំទៅមួយឆ្នាំ អ្នកស្រីតែងតែច្នៃរបាំនេះឲ្យមានភាពល្អប្រសើរឡើង។ កន្លងមកអ្នកស្រី ប៉ែន ក៏ធ្លាប់យករបាំនេះទៅចូលរួមប្រកួតក្នុងកម្មវិធី Cambodia’s Got Talent ដែលបានធ្វើឲ្យមហាជនខ្មែរ កោតសរសើរយ៉ាងក្រៃលែង៕