ពុំ ធារ៉ាចិន្តា ហាត់របាំតាំងពីក្មេងដើម្បីជួយជាតិ

2018-04-24 00:25:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ចំណាយពេលជាច្រើនឆ្នាំដោយមិននឿយណាយ ចំពោះការហ្វឹកហាត់ផ្នែករបាំបុរាណ ជាពិសេសនាងមោទកភាពថា ខ្លួនជាចំណែកមួយនៃការជួយជាតិតាមរយៈការសម្ដែង ផ្សព្វផ្សាយ ការថែរក្សា និងការសាបព្រោះបន្តនូវមរតកដ៏ល្អឯកនេះ។

នាដការ ពុំ ធារ៉ាចិន្តា បានចូលហាត់របាំតាំងពីមានអាយុ៨ឆ្នាំ ក្នុងអំឡុងឆ្នាំ១៩៩៣ រហូតមកដល់ពេលនេះនាងបានហាត់របាំអស់រយៈពេល ជាច្រើនឆ្នាំមកហើយ។

នាងនៅតែគ្មានអារម្មណ៍នឿយណាយ ពេលដែលចេញសម្ដែង កត្តាដែលនាងមិននឿយណាយព្រោះនាងគិតថាការសម្ដែងសិល្បៈនេះជាចំណែកមួយនៃការជួយជាតិ។ «ខ្ញុំមានមោទកភាព រាល់ពេលសម្ដែង ព្រោះយើងទៅបរទេសមិនត្រឹមតែដើរលេងទេ តែយើងក៏បានទៅសម្ដែង ឲ្យគេបានឃើញពីវប្បធម៌យើងទៀតផង ។ បងគិតថានេះក៏ជាចំណែកមួយដែលបងជាខ្មែរម្នាក់អាចជួយរក្សាវប្បធម៌ប្រពៃណីខ្មែរ» ពុំ ធារ៉ាចិន្តា រៀបរាប់។

ពុំ ធារ៉ាចិន្តា (រូបឆ្វេងដៃ)

អ្វីដែលរឹងតែពិសេសនោះ ក្រៅពីសកម្មភាពសម្ដែងនៅលើឆាក ស្រីស្រស់រូបនេះបាន បង្កើតផេក ហ្វេសប៊ុក ដើម្បីបង្ហាញចំណេះដឹងផ្ទាល់ខ្លួន ដែលទាក់ទងទៅនឹងប្រវត្តិ អត្ថន័យមួយចំនួន នៃក្បាច់របាំដល់មហាជនទៀតផង។

ហាក់ងប់ងល់នឹងរបាំខ្មែរ ដកចិត្តមិនរួចទៅហើយ ថ្ងៃអនាគតនាងមានបំណងធ្វើស្ទូឌីយូហាត់រាំមួយដែលមានកញ្ចក់ពេញ ដើម្បីឲ្យអ្នកហាត់រាំមានភាពងាយស្រួលមើលឃើញពីចំណុចខ្វះខាតរបស់ខ្លួន និងអាចហាត់ស្រុះគ្នាបានល្អ។

កូនស្រីច្បងរបស់ ឯកឧត្តម យន់ ខៀន (យន់ ធារ៉ា) ដែលជាតន្ត្រីករ និងសាស្រ្តាចារ្យឧបករណ៍បុរាណដ៏ល្បីនៅក្នុងប្រទេស នាងមានម្ដាយជាស្រ្តីមេផ្ទះ ហើយមានបងប្អូនចំនួន៣នាក់ ប្រុស ២ស្រី ម្នាក់។ ក្រុមគ្រួសារនាងជាអ្នកផ្តល់កម្លាំងចិត្តប្រឹងហាត់សិល្បៈ ចំណែកប្អូនប្រុសទាំងពីរមាននិស្ស័យខាងសិល្បៈដែរ មិនចាប់ជំនាញជាអាជីពនោះទេ។

នាដការ ពុំ ធារ៉ាចិន្តា បច្ចុប្បន្នជាអនុប្រធានការិយាល័យផ្នែកបណ្តុះបណ្តាល នៃនាយកដ្ឋានសិល្បៈទស្សនីយភាព របស់ក្រសួងវប្បធម៌ និងវិចិត្រសិល្បៈ។ នាងក៏ធ្លាប់ធ្វើជាពិធីការិនី និងចូលរួមសម្ដែងក្នុងកម្មវិធី «សំណើចគ្រួសារខ្ញុំ» តួឈ្មោះ មីង ណាគ្រី។ ជាញឹកញាប់ស្រីស្រស់រូបនេះតែតែងបង្ហាញសមត្ថភាពក្នុងការសម្ដែងរបាំបុរាណនៅក្នុងកម្មវិធីធំៗរបស់ជាតិ ដែលបង្ហាញពីសិល្បៈដ៏ល្អឯករបស់ខ្មែរ៕