អ្នកជំនាញកីឡា៣២ប្រទេសនឹងមកប្រជុំនៅកម្ពុជាខែក្រោយ

2018-04-25 02:59:41
ចំនួនមតិ 0 | ចំនួនចែករំលែក 0

ចន្លោះមិនឃើញ

គណៈកម្មាធិការជាតិអូឡាំពិកកម្ពុជានឹងធ្វើម្ចាស់ផ្ទះរៀបចំវេទិកាអូឡាំពិកតំបន់រយៈពេល២ថ្ងៃគិតចាប់ពីថ្ងៃទី៦-៧ ខែឧសភា ឆ្នាំ២០១៨នៅសណ្ឋាគារសុខា រាជធានីភ្នំពេញ។

ឯកឧត្តម វ៉ាត់ ចំរើន

ឯកឧត្តម វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាបានប្រាប់ថា កម្ពុជាទទួលធ្វើម្ចាស់ផ្ទះវេទិកាអូឡាំពិកតំបន់ដែលមានប្រទេស៣២ចូលរួម។ អ្នកចូលរួមទាំងអស់មានចំនួន១០០នាក់។ បណ្តាប្រទេសដែលចូលរួមគឺប្រទេសមកពីតំបន់អាស៊ីកណ្តាល អាស៊ីខាងជើង និងអាស៊ីអាគ្នេយ៍។ គណៈកម្មការអូឡាំពិកអន្តរជាតិមកពីប្រទេសអង់គ្លេស និងស្វីសជាដើម។ ក្រុមគណៈកម្មាធិការអូឡាំពិករបស់ជប៉ុនដែលត្រៀមខ្លួនរៀបចំព្រឹត្តិការណ៍កីឡាអូឡាំពិកនៅប្រទេសជប៉ុនឆ្នាំ២០២០ក៏ចូលរួម និងក្រុមការងាររៀបចំកីឡាទ្វីបអាស៊ី (Asian Games) នៅប្រទេសឥណ្ឌូណេស៊ីប៉ុន្មានខែខាងមុខក៏ចូលរួមដែរ។

ឯកឧត្តមអគ្គលេខាធិការអូឡាំពិកកម្ពុជាបញ្ជាក់ថា ការទទួលរៀបចំធ្វើម្ចាស់ផ្ទះវេទិកាអូឡាំពិកតំបន់នេះជាផលចំណេញល្អសម្រាប់កម្ពុជា។ កម្ពុជានឹងបង្ហាញពីលក្ខណៈសម្បត្តិរបស់ខ្លួនដែលត្រៀមខ្លួនធ្វើម្ចាស់កីឡាស៊ីហ្គេមឆ្នាំ២០២៣។ ការបង្ហាញនេះដើម្បីទទួលបានការគាំទ្រកាន់តែខ្លាំងពីអូឡាំពិកអន្តរជាតិ និងកាន់តែជួយឧបត្ថម្ភគាំទ្រកម្ពុជាខ្លាំងឡើយ។

ឯកឧត្តមបញ្ជាក់ថា ក្រុមប្រឹក្សាអូឡាំពិកអន្តរជាតិទុកចិត្តលើកម្ពុជាក្នុងការបំផុសចលនាអូឡាំពិកកម្ពុជាកន្លងមកដោយផ្អែកលើប្រទេសជាតិមានសន្តភាព ស្ថិរភាព និងជាឱកាសទាក់ទាញភ្ញៀវទេសចរអន្តរជាតិផងដែរ។

សម្តេចតេជោ ហ៊ុន សែន ទទួលពាន IOC

តាមការគ្រោងទុក ឯកឧត្តម កែ គឹមយ៉ាន ឧបនាយករដ្ឋមន្ត្រីនៃព្រះរាជាណាចក្រកម្ពុជានឹងធ្វើបទបង្ហាញក្នុងវេទិកាអូឡាំពិកតំបន់នេះ។ នេះជាលើកទី២ហើយដែលកម្ពុជាទទួលរៀបចំ បន្ទាប់ពីលើកទី១ធ្វើនៅទីរួមខេត្តសៀមរាបកាលពីឆ្នាំ២០១៣។

ក្រៅពីកិច្ចប្រជុំ អ្នកចូលរួមទាំងអស់នឹងធ្វើដំណើរទៅទស្សនាពហុកីឡដ្ឋានជាតិមរតកតេជោដែលកំពុងកសាង និងទស្សនារាជធានីភ្នំពេញដើម្បីវាយតម្លៃពីលក្ខណៈសម្បត្តិដែលកម្ពុជាត្រៀមខ្លួនរៀបចំកីឡាស៊ីហ្គេមឆ្នាំ២០២៣៕