ល្អខ្លាំង! បើមូលនិធិមួយដំណើរការ នឹងជួយទប់ស្កាត់ អ្នកចំណាកស្រុកជាង ១លាននាក់

2018-05-21 07:06:42
ចំនួនមតិ 0 | ចំនួនចែករំលែក 0

ចន្លោះមិនឃើញ

រដ្ឋាភិបាលកម្ពុជា បានប្រកាសថា រយៈពេលខ្លី ខាងមុខនេះ នឹងមានគម្រោងបង្កើតមូលនិធិ និងមជ្ឈមណ្ឌលសហគ្រិនភាព ដើម្បីបង្កើនការប្រកួតប្រជែង និងជំរុញសេដ្ឋកិច្ចជាតិ។

ចំណែកឯ អ្នកសេដ្ឋកិច្ច មួយរូបបានលើកឡើងថា នេះជាដំណឹងល្អ មានន័យថា គម្រោងនេះ អាចនឹងលើកកម្ពស់ វិស័យសហគ្រាសខ្នាតតូច និងមធ្យម ហៅកាត់ (SME) ឲ្យមានប្រសិទ្ធភាព ឈានទៅទប់ស្កាត់ចំណាកស្រុកប្រថុយប្រថានទៅបរទេស។

លោក ង៉ែត ជូ ទីប្រឹក្សាជាន់ខ្ពស់ ផ្នែកសេដ្ឋកិច្ច និងអភិវឌ្ឍន៍ នៅក្រុមហ៊ុន ពិគ្រោះយោបល់ Emerging Markets Consulting (EMC) បានសរសេរក្នុងទំព័រ ហ្វេសប៊ុក ថា ខ្ញុំគាំទ្រ បើគម្រោងនេះបង្កើតបាន នោះសហគ្រាសចំនួន១០០ពាន់ បន្ថែមលើ ចំនួនសហគ្រាស ដែលមានស្រាប់។ ជាមធ្យមសហគ្រាស១ អាចបង្កើតការងារបាន១០កន្លែង។ នោះពលរដ្ឋ ខ្មែរ នឹងមិនចាំបាច់ប្រថុយឆ្លងដែន ទៅធ្វើកម្មករ នៅថៃនោះទេ។

រូបថត ពីហ្វេសប៊ុក លោក ង៉ែត ជូ

លោក ង៉ែត ជូ បន្តថា បច្ចុប្បន្នកម្ពុជាយើង មានកម្មករ កំពុងធ្វើការនៅប្រទេសថៃ ប្រហែល១លាននាក់។ គម្រោងបង្កើតមជ្ឈមណ្ឌល អភិវឌ្ឍន៍សហគ្រិនភាព គឺអាចលើកកម្ពស់ វិស័យសហគ្រាសខ្នាតតូច និងមធ្យម (SME) ឲ្យមានប្រសិទ្ធភាព។

ឆ្លើយតប ក្នុងវេទិកាសេដ្ឋកិច្ច សាធារណៈ១ ឯកឧត្ដម វង្សី វិស្សុត រដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុ បានលើកឡើងថា បន្ថែមពីគម្រោងខាងលើ ទៅមុខទៀតដ៏ខ្លីនេះ រដ្ឋាភិបាលកម្ពុជា ក៏គ្រោងនឹងដាក់ដំណើរការ យន្តការចំនួន៧ទៀត ជួយដល់សហគ្រិនភាព មានដូចជា

យន្តការ ជាកញ្ចប់គាំទ្រសហគ្រិនភាព
ការបង្កើតធនាគារសហគ្រាសធុនតូច និងមធ្យម (SME Bank)
ការបង្កើតជំនាញអភិវឌ្ឍន៍
ការគិតគូរដល់ការបន្ថយថ្លៃដើម
ការបន្ថយបែបបទច្បាប់
ការសម្រួលដល់ការដឹកជញ្ជូន
និង ការគិតពន្ធ ក្នុងធុរកិច្ចរបស់ SME។

សូមបញ្ជាក់ថា ការសិក្សាមួយរបស់អង្គការ Missouri Families បានរកឃើញថា ចំនួនតួលេខ ពលករខ្មែរនៅប្រទេសថៃ មានចំនួន ១លាន ១៧ សែននាក់ ដែលក្នុងនោះមាន ១លាន ១១សែននាក់មានលិខិតស្នាមត្រឹមត្រូវ៕

អត្ថបទ៖ ពៅ រក្សា