សារចាក់ដោត៧ឃ្លារបស់ប្រពន្ធដើម ផ្ញើទៅកាន់ស្រីប្ដី កុំឲ្យស្រលាញ់របស់មានម្ចាស់ទៀត

2018-05-23 10:21:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្នេហាមួយមិនអាចដើរគ្នាបីនាក់បានទេ បើទោះជាមានករណីខ្លះអាចបានតែក៏គ្មានក្ដីសុខឡើយ។ វត្តមានបុគ្គលទី៣ ប្រៀបដូចជាអាវុធសម្ងាត់មកបំផ្លាញ សុភមង្គលគ្រួសារឲ្យខ្ទេចខ្ទីដូច្នោះដែរ។ តទៅនេះជាសាររបស់ប្រពន្ធដើម ទៅកាន់នារីទាំងឡាយ ក្នុងន័យដាស់តឿនកុំឲ្យស្រលាញ់ស្រលាញ់ចំរបស់គេ ព្រោះនឹងត្រូវជួបប្រទះសេចក្ដីទុក្ខទាំង៧យ៉ាងដូចខាងក្រោមនេះ៖

រូបតំណាង

**១. បើនាងជាខ្ញុំពេលប្ដីមានស្រីតើមានអារម្មណ៍បែបណាដែរ?**

លើលោកនេះគ្មានមនុស្សស្រីឯណា ចង់ឃើញបុរសដែលខ្លួនឯងស្រលាញ់ ក្បត់ លួចលាក់មានថ្មីនោះទេ។ នាងជាស្រីដូចគ្នា ប្រាកដជាយល់ច្បាស់ពីអារម្មណ៍មួយនេះ។ តើនាងឈឺចាប់ទេ បើមនុស្សដែលនាងស្រលាញ់កំពុងបោកប្រាស់នាង? ពេលខ្លះបើនាងចិត្តប្រពន្ធដើម ដាក់ចិត្តខ្លួនឯងជួនកាលក៏អាចហាមឃាត់នាងបានខ្លះដែរ។

២. នារីគ្រប់រូបសុទ្ធតែមានតម្លៃអាចរកបុរសល្អធ្វើជាគូបានដូចគ្នា ចាំបាច់អីស្រលាញ់ប្ដីគេ

នាងអាចជនរងគ្រោះ ព្រោះលង់ចាញ់បោកពាក្យផ្អែមរបស់មនុស្សប្រុសសាវាម្នាក់។ តែពេលនាងដឹងថា របស់មានម្ចាស់ហើយ នាងគួរតែដកខ្លួនចេញទៅ ព្រោះនាងជាមនុស្សមានតម្លៃ កុំបន្ទាបខ្លួនដើម្បីប្រុសបោកប្រាស់អី។ មនុស្សយើងគង់តែមានគូ ទៅស្រលាញ់អ្នកណាដែលគេនៅទំនេរ ទើបមិនមានបាបកម្ម ហើយអាចរកក្ដីសុខឲ្យខ្លួនឯងបាន។

៣. នាងនឹងក្លាយជាស្រីលួចលាក់គ្មានថ្ងៃបានចេញមុខមាត់ពេញលេញក្នុងសង្គមឡើយ

មនុស្សប្រុសដែលនាងកំពុងស្រលាញ់នោះ គឺជាប្ដីរបស់គេ ហើយជាមនុស្សប្រុសម្នាក់កំពុងក្បត់ប្រពន្ធ។ តើនាងចង់បានស្វាមីម្នាក់ស្របច្បាប់ មានសេចក្ដីថ្លៃថ្នូរ ចេញមុខមាត់ពេញលេញក្នុងសង្គម ឬនៅតែជាជនក្រៅសង្គម។ នារីគ្រប់រូបសុទ្ធតែប្រាថ្នាចង់បានស្នេហ៍មួយពិតប្រាកដ មួយនឹងមួយ មានកិត្តិយស មុខមាត់ សេចក្ដីថ្លៃថ្នូរ។ បើនាងឆ្លើយថា មិនត្រូវការទេ គឺនាងកំពុងក្បត់ចិត្តខ្លួនឯងហើយ។

រូបតំណាង

៤. នាងនឹងក្លាយជាជនរងគ្រោះដោយសារមនុស្សប្រុសបោកប្រាស់ម្នាក់

ទោះប្រពន្ធដើម ជានារីស្លូតប៉ុណ្ណាក៏មិនអាចនៅស្ងៀមបានដែរ ពេលដឹងប្ដីកំពុងក្បត់ខ្លួន។ នាងនឹងជួបតែរឿងក្ដៅក្រហាយតាំងពីយកខ្លួនបៀតជាមួយរបស់មានម្ចាស់ ខំលួចលាក់ ភ័យខ្លាចប្រពន្ធដើមដឹង ខ្លាចគ្រួសារដឹង។ បើថ្ងៃណាមួយការពិតត្រូវទម្លាយ នោះជីវិតនាងនឹងត្រូវប្រឈមអ្វីខ្លះ?

៥. នាងគ្មានថ្ងៃស្គាល់សេចក្ដីសុខ សុភមង្គលពិតប្រាកដនោះទេ

ប្រុសដែលហ៊ានក្បត់មនុស្សស្រីម្នាក់ ដើម្បីទៅស្រលាញ់នាង គេក៏ហ៊ានក្បត់ចិត្តនាងវិញដូចគ្នា។ គេគ្មានស្នេហ៍ពិតប្រាកដឡើយ គេប្រាថ្នាតែរូបកាយនាងប៉ុណ្ណោះ។ កុំប្រាថ្នាក្ដីស្រលាញ់ពីមនុស្សប្រុសក្បត់ ព្រោះគេគ្មានស្នេហ៍ពិតឲ្យនាងទេ។ គួរងាកក្រោយ ទៅចាប់ផ្ដើមជាមួយនរណាដែលគេស្រលាញ់នាងពិតប្រាកដល្អជាង ព្រោះជីវិតនេះវែងឆ្ងាយណាស់ មានរឿងល្អៗជាច្រើនទៀតនៅរង់ចាំ។ កុំបំផ្លាញ ក្ដីសុខ សុភមង្គល ខ្លួនឯង ព្រោះតែប្ដីគេអី។

៦. នាងកំពុងបំផ្លាញកិត្តិយសខ្លួនឯង គ្រួសារ និងអនាគតនាងទាំងមូល

កិត្តិយស សេចក្ដីថ្លៃថ្នូរ សំខាន់បំផុត សម្រាប់ជីវិតមនុស្សម្នាក់ៗ។ គ្មាននរណាលើកតម្កើង ឬឲ្យតម្លៃទៅមនុស្សដណ្ដើមរបស់គេនោះទេ។ កាន់តែគ្មានឪពុកម្ដាយឯណា ប្រាថ្នាឃើញកូនត្រូវគេជាន់ឈ្លី ព្រោះទៅប៉ះរបស់មានម្ចាស់នោះទេ។ អនាគតក៏ត្រូវចប់ដូចគ្នា ប្រសិនបើមិនព្រមដកខ្លួនចេញ។

៧. វត្តមានគឺកំពុងបំផ្លាញសុភមង្គលគ្រួសារមួយ អាចដល់បែកបាក់គ្នា

ចំណុចចុងក្រោយនោះ គឺនាងនឹងក្លាយជាមនុស្សម្នាក់ទៅបំផ្លាញគ្រួសារមួយ។ នារីម្នាក់នឹងត្រូវឈឺចាប់បំផុត ព្រោះមនុស្សជាទីស្រលាញ់ក្បត់នាង។ ក្ដីស្រលាញ់ដែលនាងធ្លាប់ទទួលបានពីប្ដី ត្រូវបែងចែកឲ្យនារីម្នាក់ផ្សេងទៀត។ ក្ដីសុខ សុភមង្គល ក្ដីស្រលាញ់ ដែលធ្លាប់ទទួលបានពីមកត្រូវប្រែប្រួលអស់។ បើនាងទទួលយកមិនបាន មានតែផ្លូវមួយទេ គឺបែកគ្នា។

ជាចុងក្រោយ ប្រពន្ធដើមចង់និយាយថា បើនាងព្រមទទួលយកក្ដីស្រលាញ់ពីមនុស្សប្រុសបោកប្រាស់ម្នាក់ ហ៊ានក្បត់ប្រពន្ធទៅស្រលាញ់នាង គឺដូចជាធ្វើឲ្យមនុស្សប្រុសនោះមានមោទកភាពលើខ្លួនគេពេកហើយ។ បើព្រមស្រលាញ់របស់គេ ហើយធ្វើឲ្យនារីម្នាក់ទៀត ព្រមទាំងគ្រួសារគេទាំងមូលបែកបាក់គ្នា គឺដូចជាឲ្យតម្លៃមនុស្សប្រុសចិត្តរយពាន់នោះពេកហើយ។ កុំព្រោះតែមនុស្សប្រុសម្នាក់ ធ្វើឲ្យគ្រប់យ៉ាងត្រូវបំផ្លាញ ទាំងខ្លួនឯង និងអ្នកដទៃ។ គួរស្រលាញ់អ្នកណាដែលគ្មានម្ចាស់ទើបមិនធ្វើឲ្យនរណាម្នាក់ត្រូវឈឺចាប់៕

ចុចអាន៖

អត្ថបទ៖ វឌ្ឍនៈ