ផលិតកម្មក្នុងស្រុក១ ត្រៀមមានវិធានការក្ដៅលើ វណ្ណ វលក្ខណ៍

2018-06-04 09:14:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ផលិតកម្ម LD Picture ត្រៀមចាត់វិធានការក្ដៅលើតារាសម្ដែងសិចស៊ីវ័យក្មេងកញ្ញា វណ្ណ វលក្ខណ៍ ទៅលើទង្វើ ដែលគេចវេះមិនទទួលខុសត្រូវចំពោះការងាររបស់ខ្លួន។

លោក លៀក លីណា ប្រធានគ្រប់គ្រងការផលិតកម្មរបស់ផលិតកម្ម LD Picture បានលើកឡើងថា តារាសម្ដែងរូបនេះ បានគេចវេះមិនទទួលខុសត្រូវលើការថតខ្សែភាពយន្តរឿង “គូស្នេហ៍បម្រុង” នាពេលកន្លងមក ខណៈខ្សែភាពយន្តនេះថតបានប្រមាណ ៧០ភាគរយមកហើយ ព្រមទាំងកំពុងចាក់ផ្សាយជារៀងរាល់ថ្ងៃ។

តារាសម្តែង វណ្ណ វលក្ខណ៍

លោកបន្តថា ក្រុមការងាររបស់លោក បានទាក់ទងទៅកាន់កញ្ញាជាញឹកញាប់ ក៏ប៉ុន្តែមិនមានការឆ្លើយតប ដែលជាហេតុធ្វើឱ្យការងារថតខ្សែភាពយន្តទាំងមូលកំពុងរាំងស្ទះខ្លាំង។ មិនត្រឹមតែរាំងស្ទះសម្រាប់ការផលិតប៉ុណ្ណោះទេ តារាសម្ដែងទាំងអស់ក្នុងខ្សែភាពយន្តភាគនេះ បានរអ៊ូរទាំគ្រប់គ្នាចំពោះការមិនទទួលខុសត្រូវចំពោះការងារខ្លួនក្នុងនាមជាតារាគំរូម្នាក់ សម្រាប់មហាជនយកតម្រាប់តាម។

លោក លៀក លីណា ប្រធានគ្រប់គ្រងការផលិតកម្មរបស់ផលិតកម្ម LD Picture (រូបស្តាំដៃ)

ប្រសិនបើ វណ្ណ វលក្ខណ៍ នៅតែមិនចេញមុខបកស្រាយ និងថតបញ្ចប់សាច់រឿង ”គូស្នេហ៍បម្រុង” នេះទេ ផលិតកម្ម LD Picture គ្រោងនឹងមានវិធានការផ្លូវច្បាប់ ដោយពេលនេះ ផលិតកម្មបានត្រៀមមេធាវីរួចជាស្រេចហើយ ដើម្បីចាត់ការលើតារាសម្ដែងរូបនេះ។

មិនត្រឹមតែមានវិធានការផ្លូវច្បាប់ទេលោក លៀក លីណា ក៏គ្រោងនឹងពិភាក្សាជាមួយសមាគមភាពយន្ត និងផលិតកម្មធំៗនានា ដើម្បីបិទទីផ្សារតារាសម្ដែងមួយនេះ ប្រសិនបើកញ្ញានៅតែប្រកាន់ឥរិយាបទមិនទទួលខុសត្រូវ លើការងារខ្លួនបែបនេះ។ ក្នុងនោះផលិតកម្ម បានពិភាក្សាជាមួយទូរទស្សន៍ក្នុងស្រុកធំ២រួចហើយ ដើម្បីមិនឱ្យមានវត្តមានរឿងណាមួយរបស់ វណ្ណ វលក្ខណ៍។

ទាក់ទងការព្រមានរបស់ផលិតកម្ម LD Picture នេះតារាសម្ដែងកញ្ញា វណ្ណ វលក្ខណ៍ មិនអាចទាក់ទងសុំការបកស្រាយបានទេ ដោយទូរសព្ទតេចូលច្រើនលើក តែគ្មានអ្នកទទួល។

ខ្សែភាពយន្តរឿង”គូស្នេហ៍បម្រុង” របស់កញ្ញា វណ្ណ វលក្ខណ៍ កំពុងចាក់បញ្ចាំងរៀងរាល់ថ្ងៃលើកញ្ចក់ទូរទស្សន៍ CTN នាពេលបច្ចុប្បន្ន។ រឿងនេះមិនទាន់ថតបញ្ចប់នៅឡើយទេ ព្រោះតារារូបនេះ បានធ្វើឱ្យរាំងស្ទះសម្រាប់ការផលិត។ យ៉ាងណាទង្វើនេះធ្វើឱ្យផលិតកម្ម LD Picture ត្រៀមនឹងមានវិធានការក្ដៅ ប្រសិនបើកញ្ញាមិនព្រមចេញមុខដោះស្រាយ៕

អត្ថបទៈ ចរិយា