ម៉ារ៉ា ប៊ុណ្ណា ទិញទីកូថ្លៃ១លានរៀល ថតបទ បែកស្លុយ

2018-06-06 02:53:43
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀង និងសម្ដែង ម៉ារ៉ា ប៊ុណ្ណា ថ្លែងឲ្យដឹងថា ឆាប់ៗខាងមុខនេះ លោកនឹងបញ្ចេញបទចម្រៀងបែបបែកស្លុយ១បទទៀតហើយ ដើម្បីបំបែកទីផ្សារដែលកំពុងតែស្ងប់ស្ងាត់។

បទចម្រៀងដែល ម៉ារ៉ា ប៊ុណ្ណា គ្រោងបញ្ចេញនោះ មានចំណងជើងថា "ទីកូបង់រំលោះ" ជាមេឡូឌីថ្មី បែបបែបស្លុយៗសប្បាយៗ។ ខ្លឹមសារនៃបទចម្រៀងលោកបានប្រាប់ថា និយាយពីមនុស្សម្នាក់ចូលចិត្តសប្បាយៗ សម្ភារៈនិយម ប្រើទូរសព្ទថ្លៃៗ ប៉ុន្តែមិនហ៊ានទិញរថយន្តទំនើបជិះទេ បែរជាទៅទិញរថយន្តម៉ាកទីកូមានតម្លៃថោកហើយ បង់រំលោះទៀត។

ដើម្បីឲ្យស៊ីទៅនឹងបទចម្រៀង លោក ម៉ារ៉ា ប៊ុណ្ណា បានសម្រេចចិត្តទិញរថយន្តទីកូ យកមកថត MV នោះក្នុងតម្លៃ១លានរៀល។ លោកថា ក្រោយពីថតបទចម្រៀងខាងលើចប់ ខ្លួននឹងជិះរថយន្តនោះជាប្រចាំតែម្ដង មិនខ្លាចពីការរិះគន់ពីមហាជនឡើយ។

ជាមួយគ្នានោះ អតីតគូស្នេហ៍តារាសម្ដែងអ្នក ប៉ែន សុផានី រូបនេះក៏គ្រោងអញ្ជើញតារាកំប្លែងមួយចំនួន មកចូលរួមសម្ដែង MV ផងដែរ ដោយការថតគ្រោងធ្វើនៅពេលឆាប់ៗនេះតែម្ដង ត្បិតអីទាំងទីតាំងក៏ដូច សម្ភារៈដែលត្រូវប្រើ ក្នុងការថត MV នោះលោករកបានស្ទើរតែគ្រប់អស់ហើយ។

ទោះបីបានប្រាប់ថា បទ"ទីកូបង់រំលោះ" ជាបទបែបបែកស្លុយ ក៏ពិតមែន ប៉ុន្តែបទនោះលោកថា មិនដូចបទ "និស្សិត IT" ដែលខ្លួនចម្លងពីថៃកន្លងមកទទួលរកការរិះគន់ពីមហាជនជាច្រើននោះទេ ព្រោះដូចបានលើកឡើងខាងលើអីចឹង បទចម្រៀង១បទនេះ គឺជាមេឡូឌីថ្មីសុទ្ធសាធ។

លោក ម៉ារ៉ា ប៊ុណ្ណា បានដាក់ក្ដីរំពឹងថា បន្ទាប់ពីចម្រៀងខាងលើចេញ ច្បាស់ជាអាចជួយបំបែកទីផ្សាររបស់លោក ដែលកំពុងតែស្ងប់ស្ងាត់នេះជាក់ជាមិនខាន៕

អត្ថបទ៖ ដេត ធន្នី

រូបភាពផ្តល់សិទ្ធិដោយៈ ម៉ារ៉ា ប៊ុណ្ណា