១ឆ្នាំជាងនេះ ម៉ារ៉ា ប៊ុណ្ណា លក់ទ្រព្យសរុបជាង១ម៉ឺនដុល្លារ ធ្វើបទចម្រៀង ទាំងគ្មានស្តាយស្រណោះ

2018-06-11 03:06:53
ចំនួនមតិ 0 | ចំនួនចែករំលែក 0

ចន្លោះមិនឃើញ

"ជូនកាល ម៉ូតូ ណៃហត១គ្រឿងធ្វើបាន២បទ កាលបទនិស្សិតអាយធី អស់ខ្សែក១ខ្សែ បទប៉ិអើយប៉ិ ចិញ្ចៀន១វង់ បទដីថ្លៃប្រល័យស្នេហ៍ធ្វើឡើងវិញ បទមួយចំនួនទៀត សរុបទៅ មិនក្រោម១ម៉ឺនទេ " នេះជាការលើកឡើងរបស់តារាចម្រៀងនិងសម្ដែង លោក ម៉ារ៉ា ប៊ុណ្ណា ថ្លែងមកកាន់ Sabay។

បទចម្រៀងទាំងប៉ុន្មានខាងលើ លោកមិនចេញជ្រកក្រោមផលិតកម្មមួយណាឡើយ គឺចេញដោយឯករាជ្យខ្លួនឯងតែម្ដង។ មូលហេតុដែលនាំឲ្យតារាចម្រៀងរូបនេះសុខចិត្តលក់ទ្រព្យផ្ទាល់ខ្លួនមកផលិតបទចម្រៀងនេះ ក៏ព្រោះតែក្ដីស្រលាញ់។ លោក ម៉ារ៉ា ប៊ុណ្ណា ថា ក្នុងមួយជីវិតរបស់លោក ខ្លួនហ៊ានបូជាគ្រប់បែបយ៉ាង ដើម្បីសិល្បៈ ដោយមិនបានស្ដាយក្រោយឡើយ។

គ្រប់បទចម្រៀងដែលបានធ្វើកន្លងមក លោកថា កិនបានផលចំណេញធ្វើជាដុំកំភួនឡើយ គឺបានត្រឹមតែការកម្សាន្តផ្ទាល់ខ្លួន និងការចែករំលែកការសប្បាយសម្រាប់អ្នកគាំទ្រ និងធ្វើឲ្យលោកមានឱកាសធ្វើលោកបានឡើងឆាកដន្ត្រី ម្ដងម្កាលប៉ុណ្ណោះ។

ដូចបានលើកឡើងខាងលើ ទោះបីជាមិនបានអ្វីចំណេញអ្វីជាដុំកំភួន ម៉ារ៉ា ប៊ុណ្ណា មិនបានបោះបង់ចោលការព្យាយាមរបស់ខ្លួនឡើយ ថ្មីៗនេះលោក ទើបតែទិញរថយន្តម៉ាកទីកូ១គ្រឿង តម្លៃ១លានរៀល ដើម្បីថត MV បទចម្រៀងថ្មីរបស់លោកថែម១បទទៀត។

បទចម្រៀងថ្មីដែលលោកគ្រោងថតនោះ មានចំណងជើងថា"ទីកូបង់រំលោះ" ជាមេឡូឌីថ្មី បែបស្លុយៗសប្បាយៗ។ ខ្លឹមសារនៃបទចម្រៀងនិយាយពីមនុស្សម្នាក់ចូលចិត្តសប្បាយ ៗ សម្ភារៈនិយម ប្រើទូរសព្ទថ្លៃៗ ប៉ុន្តែមិនហ៊ានទិញរថយន្តទំនើបជិះទេ បែរជាទៅទិញរថយន្តម៉ាកទីកូមានតម្លៃថោកហើយ បង់រំលោះទៀត។

គម្រោងនៃការថតបទចមម្រៀង១បទនេះ លោកថាគ្រោងចំណាយមិនក្រោម១ពាន់ដុល្លារឡើយ ហើយក្រោយពីថតបទចម្រៀងខាងលើចប់ ម៉ារ៉ា ប៊ុណ្ណា ថា ខ្លួននឹងជិះរថយន្តនោះជាប្រចាំតែម្ដង មិនខ្លាចពីការរិះគន់ពីមហាជនឡើយ។ ក្រៅពីការធ្វើបទចម្រៀងខ្លួនឯងជាបន្តបន្ទាប់ ម៉ារ៉ា ប៊ុណ្ណាថា លោកកំពុងតែជាប់ថតរឿងជាបន្តបន្ទាប់ផងដែរ៕

អត្ថបទៈ ស៊ុនហួត