បុរសបារាំងហោះពីវៀតណាមរត់ម៉ារ៉ាតុងភ្នំពេញបានលេខ១ព្រឹកមិញ

2018-06-17 03:07:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ព្រឹត្តិការណ៍រត់ប្រណាំងពាក់កណ្តាលម៉ារ៉ាតុងភ្នំពេញមានកីឡាករ កីឡាការិនីចម្រុះជាតិសាសន៍រាប់ពាន់នាក់បានចូលរួមក្នុងនោះមានជនជាតិបារាំងម្នាក់ធ្វើដំណើរពីវៀតណាមដើម្បីចូលរួមប្រកួតរហូតទទួលបានចំណាត់ថ្នាក់លេខ១។

លោក Stepheng Charnet (កណ្តាល)លេខ១

លោក Stepheng Charnet បានប្រាប់ថា លោករស់នៅទីក្រុងហូជីមិញ ប្រទេសវៀតណាម ទើបធ្វើដំណើរមកដល់ប្រទេសកម្ពុជាកាលពីថ្ងៃសៅរ៍ ទី១៦ ខែមិថុនា ម្សិលមិញដើម្បីចូលរួមរត់ប្រណាំងពាក់កណ្តាលម៉ារ៉ាតុងភ្នំពេញអន្តរជាតិនេះ។ លោកបានមកប្រទេសកម្ពុជាជាមួយភរិយា និងកូន ព្រមទាំងមិត្តភក្តិពីរបីនាក់ទៀត។

លោកបានប្រាប់ថា ៖«ខ្ញុំមកទីនេះដើម្បីចូលរួមប្រកួត ពីព្រោះប្រទេសកម្ពុជាមិនឆ្ងាយពីប្រទេសវៀតណាម។ នេះជាលើកទី១ដែលខ្ញុំមកប្រទេសកម្ពុជា។ ខ្ញុំមកនេះដើម្បីចង់ដឹងពីការរៀបចំប្រកួតរត់ម៉ារ៉ាតុងនៅភ្នំពេញ ហើយឃើញថា រៀបចំបានល្អ ជាពិសេសប្រជាជនកម្ពុជារួសរាយរាក់ណាស់»។ លោកនឹងចូលរួមប្រកួតព្រឹត្តិការណ៍ម៉ារ៉ាតុងផ្សេងៗដូចជានៅសៀមរាបជាដើម។

ក្នុងការប្រកួតកាលពីព្រឹកមិញនេះ លោកទទួលបានចំណាត់ថ្នាក់លេខ១លើវិញ្ញាសារត់ចម្ងាយ១០គីឡូម៉ែត្រផ្នែកបុរសដោយប្រើពេល៣៤នាទី ប៉ុន្តែកំណត់ត្រាល្អបំផុតដែលរត់នៅវៀតណាមកន្លងមកគឺប្រើពេល៣០នាទី។

លោក Stepheng Charnet បានបញ្ជាក់ថា តាមពិតទៅលោកបានហ្វឹកហាត់រត់ពាក់កណ្តាលម៉ារ៉ាតុងជាង២០ឆ្នាំហើយ។ លោកធ្លាប់ចូលរួមប្រកួតកន្លងមកនៅប្រទេសវៀតណាម និងបារាំង។ លោកបានដឹងពីការរៀបចំប្រកួតម៉ារ៉ាតុងនៅភ្នំពេញនេះតាមរយៈមិត្តភក្តិដែលបាននិយាយប្រាប់តៗគ្នា។ ក្រៅពីមកចូលរួមប្រកួត លោកក៏នឹងចំណាយពេលជាមួយប្រពន្ធកូនដើម្បីដើរកម្សាន្តប្រទេសកម្ពុជាមួយរយៈពេលខ្លីមុនពេលត្រឡប់ទៅវិញ។

ព្រឹត្តិការណ៍រត់ប្រណាំងពាក់កណ្តាលម៉ារ៉ាតុងភ្នំពេញនេះចូលរួមឧបត្ថម្ភគាំទ្រធំពីក្រុមហ៊ុនទូរសព្ទ Smart។ ពាក់កណ្ដាលម៉ារ៉ាតុងភ្នំពេញលើកទី៨នេះមានអ្នកចូលរួមប្រកួតប្រមាណជិត៥ពាន់នាក់ដែលមកពីអង្គភាព ស្ថាប័ន ក្រសួង ជាលក្ខណៈគ្រួសារ និតមិត្តភក្តិ ដែលបានធ្វើឡើងនៅមុខព្រះបរមរាជវាំង៕