ក្នុងនាមជាផលិតករ ក៏ដូចជាអ្នកដឹកនាំរឿងដូចគ្នា លោក ឧត្តម វិវឌ្ឍន៍ មានការកោតសរសើរលើស្នាដៃភាពយន្តរឿង "បាតដៃខ្មៅ" ដឹកនាំដោយលោក មាស រស្មី ហើយថែមពោលសរសើរមិនដាច់ពីមាត់ពីគុណភាពសាច់រឿង ការសម្តែង និងការផលិតដែលប្រើប្រាស់ដើមទុនតិចជាងការស្មាន។

លោក ឧត្តម វិវឌ្ឍន៍ ជាផលិតករភាពយន្ត និងអ្នកដឹកនាំរឿង "នំប៉័ងសុបិនស្នេហ៍" ដែលទទួលបានការទស្សនាច្រើនជាងគេក្នុងឆ្នាំ ២០១៧កន្លងទៅ លើកឡើងក្នុងបទសម្ភាសខ្លីជាមួយ Sabay ថា៖ "យើងកុំនិយាយរឿងខ្វះខាតក្នុងការផលិតភាពយន្ត វាតែងតែមានហើយ សំខាន់រឿង បាតដៃខ្មៅពិតជារឿងខ្មែរលើរោងកុនមួយដែលអ្នកនឹកស្មានមិនដល់មិនខាន"។

ផលិតករខាងលើបន្តថា ភាពយន្តខ្មែរមិនច្រើនទេដែលព្យាយាមយកចំណុចថ្មីមកបង្ហាញ ពិសេសការផ្តល់ឱកាសសម្រាប់តួសម្តែងថ្មី ដែលរូបលោកធ្លាប់មានបទពិសោធន៍ដឹកនាំសម្តែង​ជាច្រើនដងមកឃើញថា តួសម្តែងថ្មីៗ ក្នុងរឿង "បាតដៃខ្មៅ" មានទេពកោសល្យ និងសម្តែងមានលក្ខណៈធម្មជាតិ មិនដូចអានអត្ថបទកុន ឬសម្តែងដូចល្ខោនទេ។

លក្ខណៈពិសេសរបស់រឿង "បាតដៃខ្មៅ" មួយទៀត ដែលធ្វើឱ្យរូបលោកកាន់តែកោតសរសើរនោះ គឺការ Twist សាច់រឿង ដែលធ្វើឱ្យអ្នកទស្សនាមិនអាចទស្សទាយមុនបាន ចំណុចនេះលោក ឧត្តម វិវឌ្ឍន៍ បញ្ជាក់ថាជាចំណុចចងចាំរបស់សាច់រឿង និងផ្តល់តម្លៃអប់រំ លាយនឹងផ្ទាំងទស្សនីយភាពប្លែកភ្នែក ដែលរូបលោកផ្ទាល់ចូលចិត្ត ហើយទៅទស្សនា ៣ ដងហើយតាំងពីចាប់ផ្តើមបញ្ចាំង លើរោងភាពយន្តមក៕

ចង់ដឹងច្បាស់ថា លោក ឧត្តម វិវឌ្ឍន៍ និយាយអ្វីខ្លះពីរឿង «បាតដៃខ្មៅ» តោះទស្សនាបទសម្ភាសខ្លីខាងក្រោមទាំងអស់គ្នា៖

អត្ថបទ៖ Sunny