ស្អាតពេកហើយ! ដើរលេង៥កន្លែងនេះនៅស្រុកខ្មែរឲ្យអស់សិន មុនចង់ហោះទៅលេងស្រុកគេ

2018-07-14 04:22:37
ចំនួនមតិ 0 | ចំនួនចែករំលែក 0

ចន្លោះមិនឃើញ

កម្ពុជា ជាប្រទេសដែលគ្របដណ្ដប់ទៅដោយតំបន់ទេសចរណ៍ជាច្រើន ជាពិសេសតំបន់ធម្មជាតិ ដែលមានទេសភាពស្អាតប្រៀបដូចឋានសួគ៌លើដី ដូច្នោះដែរ។ ថ្ងៃនេះ Sabay សូមនាំអារម្មណ៍ប្រិយមិត្តទៅកម្សាន្តនៅតំបន់ធម្មជាតិ ៥កន្លែង ទេសភាពស្អាតបំផុតប្រៀបដូចរូបគំនូរ។

១. ភូមិដំណាក់ដំរី

នៅក្បែរជើងភ្នំគិរីរម្យ ភូមិដំណាក់ដំរី គឺជារមណីយដ្ឋានធម្មជាតិបែបកែច្នៃថ្មីមួយទៀត ក្នុងខេត្តកំពង់ស្ពឺ។ ប្រសិនបើប្រិយមិត្តបានទៅដល់ទីនោះ ប្រាកដជាលង់នឹងសម្រស់ធម្មជាតិ ដ៏ស្រស់បំព្រងលាតសន្ធឹងលើផ្ទៃដីរាប់រយហិចតា។ បើតាមជំនួយការអ្នកគ្រប់គ្រងរីសតនេះ បានប្រាប់ Sabay ថា ភ្ញៀវទេសចរណ៍ដែលទៅលេងកម្សាន្តនឹងទទួលបានការកម្សាន្តជាច្រើន ក្រៅពីផ្ដិតយកទេសភាពដ៏ប្រណិតដូចជា៖ ការជិះសេះលម្ហែអារម្មណ៍ ស្ទូចត្រី បោះតង់ បាល់ទាត់ បាល់ទះ។ ជាពិសេសថែមទាំងមានអាងហែលទឹក ភោជនីយដ្ឋាន មានម្ហូបគ្រប់ប្រភេទក្នុងតម្លៃដ៏សមរម្យទៀតផង។

ចំពោះកន្លែងស្នាក់នៅវិញកាន់តែពិសេសថែមទៀត នៅភូមិដំណាក់ដំរីភ្ញៀវទេសចរណ៍អាចស្នាក់ជាតង់ វិឡា ផ្ទះរចនាបថម៉ូតខ្មែរ។ល។ ភូមិដំណាក់ដំរី មានស្ថិតនៅក្នុងឃុំគិរីរម្យ ស្រុកភ្នំស្រួច ខេត្តកំពង់ស្ពឺ។ ដើម្បីទៅដល់តំបន់ទេសចរណ៍មួយនេះ ប្រិយមិត្តត្រូវធ្វើដំណើរតាមផ្លូវជាតិលេខ ៤ ដល់ផ្សារត្រែងត្រយឹងបត់ចូលប្រមាណ ៨គីឡូម៉ែត្រ ភ្ញៀវទេសចរនឹងឃើញរីសតមួយដ៏ស្រស់បំព្រងខ្យល់អាកាសដ៏បរិសុទ្ធ។

២. ពពកហោះថ្មដា

ថ្មដា ជាឃុំមួយក្នុងស្រុកវាលវែង ខេត្តពោធិ៍សាត់ ជាតំបន់ទេសចរណ៍ថ្មីសន្លាងមួយ កំពុងទាក់ទាញភ្ញៀវទេសចរទាំងជិតទាំងឆ្ងាយ។ តំបន់ទេសចរណ៍មួយនេះ នៅជាប់ព្រំប្រទល់កម្ពុជា-ថៃ ដែលថ្មដា ជាច្រកមួយឆ្លងចូលប្រទេសថៃ។ រីឯទេសភាពនៅលើភ្នំថ្មដា មើលមួយភ្លែតស្មានតែសមុទ្រឈើដូចនៅមណ្ឌលគិរី និងពពកហោះលើភ្នំបូកគោ ។ ថ្មដានៅពេលព្រឹកព្រលឹមមានពពករសាត់ទាបៗជាប់នឹងងជើងភ្នំ ត្រជាក់សព្វរាងកាយ។

៣.ថ្មលយ ឬអូរតាសេក

បើធ្វើដំណើរកម្សាន្តទៅឧទ្យានជាតិព្រះសុរាម្រិតកុសមៈ ឬហៅម្យ៉ាងទៀតថា ឧទ្យានជាតិគិរីរម្យ ភ្ញៀវទេសចរនឹកស្រមៃមុនគេ គឺទេសភាពធម្មជាតិដ៏ស្រស់បំព្រង គ្របដណ្ដប់ដោយដើមស្រល់រាប់ពាន់ដើម និងទឹកជ្រោះដ៏ស្រស់ត្រកាល។ ប៉ុន្តែកាលពីថ្មីៗកន្លងទៅនេះ ក្រុមរុករកទីតាំងប្លែកៗក្នុងប្រទេសកម្ពុជា Off-Road បានធ្វើដំណើរទៅដល់ទីតាំងមួយឈ្មោះថា ថ្មលយ ឬអូរតាសេក ដែលមានទេសភាពដ៏ស្រស់ស្អាតបំផុតមិននឹកស្មានដល់។

ថ្មលយ ឬអូរតាសេក មានទីតាំងនៅជិតជ្រោះផ្ដាច់ព្រលឹង នៃតំបន់ឧទ្យានជាតិគិរីរម្យ។ បើបានធ្វើដំណើរទៅដល់ទីនោះ ប្រិយមិត្តនឹងលង់នូវសម្រស់ធម្មជាតិដ៏ត្រកាល ជាពិសេសនៅពេលថ្ងៃរៀបលិចជះពន្លឺនៃព្រះទិនករ មកលើព្រៃឈើ និងផ្ទាំងសិលានានា រំលេចចេញជាផ្ទាំងទស្សនីយភាព កម្របានឃើញបំផុត។

៤.ដើមស្រល់ នៅមណ្ឌលគិរី

ធ្វើដំណើរចេញពីទីក្រុងសែនមនោរម្យ ទីរួមខេត្តមណ្ឌលគិរី ឆ្ពោះទៅឃុំដាក់ដាំ ស្រុកអូររាំង ចម្ងាយប្រហែល១៥គីឡូម៉ែត្រ លោកអ្នកប្រាកដជាបានឃើញដើមស្រល់ជាច្រើន ដុះអមសងខាងផ្លូវ លើភ្នំខ្ពស់ទាប និងបង្ហាញសម្រស់ធម្មជាតិស្រស់ស្អាត មិនចាញ់ដើម Christmas (គ្រីស្មាស) សិប្បនិម្មិត ដែលគេតុបតែងឡើយ។

នៅលើដងផ្លូវកៅស៊ូរលោងស្រិលដ៏សែនស្ងាត់ ដែលពុំសូវមានអ្នកដំណើរឆ្លងកាត់ ហើយពេលឃើញដើមស្រល់យ៉ាងច្រើនដុះលើភ្នំ ពិតជាធ្វើឲ្យអ្នកមានអារម្មណ៍ថា វាពិតជាស្អាតមែនទែន ប្រៀបដូចនឹងដើម Christmas ដែលគេតុបតែង ដើម្បីត្រៀមប្រារព្ធពិធីបុណ្យណូអែលឆាប់ៗខាងមុខនេះយ៉ាងដូច្នោះដែរ។

៥. ដងព្រៃលិចទឹកនៅស្ទឹងត្រែង

ព្រៃលិចទឹកនៅតាមដៃទន្លេមេគង្គជាកន្លែងកម្សាន្តដ៏កម្រមួយនៅប្រទេសកម្ពុជាដែលមនុស្សគ្រប់គ្នាប្រាថ្នាចង់ឃើញ។ ព្រៃលិចទឹកនេះត្រូវបានគេហៅថា រុំាសា (តំបន់អភិរក្សលិចទឹក)មានចម្ងាយរាប់គីឡូម៉ែត្រតាមដងទន្លេមេគង្គ នៅឃុំអូរស្វាយ ស្រុកថាឡាបូរិវ៉ាត ខេត្តស្ទឹងត្រែង។

តំបន់នេះគឺជាផ្នែកមួយ នៃរាជធានីអាណាចក្រខ្មែរសម័យបុរាណ និងរាប់បញ្ចូល ទាំងរុំាសា (តំបន់អភិរក្ស លិចទឹក) ដែលមានសត្វផ្សោតតាមដងទន្លេមេគង្គ សត្វបក្សាបក្សី សត្វព្រៃ ជាច្រើនទៀត។ វាប្រៀបបាននឹងត្បូងពេជ្រដ៏មានតម្លៃ ដែលបានផុសឡើងពីទឹកតាមបណ្តោយទន្លេមេគង្គ។ វាបានផ្តល់នូវសម្បត្តិព្រៃឈើដ៏ ប្រសើរ ដែលជាជម្រដ៏ប្រសើរសម្រាប់សត្វព្រៃ។ ជាពិសេស ហ្វូងបក្សាបក្សី និងជាជម្រកត្រីដ៏ប្រសើរក្នុងរដូវវស្សា។

នៅរដូវប្រាំង ពេលទឹកស្រក ទីនេះបានរំលេចឲ្យឃើញនូវឆ្នេខ្សាច់ពណ៌សដ៏ស្រស់ស្អាត ដែលលាតសន្ធឹង តាមបណ្តោយដងទន្លេ គួរឲ្យចង់ដើរលេងកម្សាន្ត ហើយក៏មានព្រែកជាច្រើន ដោយមាន ព្រែកខ្លះមានទឹកហូរលឿន។ នៅតាមបណ្តោយទន្លេមេគង្គ ក្នុងឃុំស្វាយ តំបន់អភិរក្សដីល្បាប់រុំសា ត្រូវបានការពារដោយច្បាប់ ជាពិសេសតំបន់ត្រីពង ដែលជាទីកន្លែងផ្តល់នូវការបង្កកំណើតដល់ត្រីរាប់លានក្បាល សត្វបក្សា បក្សី និងសត្វព្រៃដ៏ទៃទៀត ព្រមទាំងមានដើមឈើជាច្រើនប្រភេទ ផ្តល់ឲ្យតំបន់នេះក្លាយជា តំបន់អេកូឡូស៊ីដ៏ធំមួយ។ ឃុំអូរស្វាយ មានចម្ងាយ៥៧គីឡូម៉ែត្រ ពីផ្លូវជាតិលេខ៧ និងអាចធ្វើដំណើរតាមទន្លេមេគង្គដែលហូរឆ្ពោះទៅ ទិសពាយព្យនៃក្រុងស្ទឹងត្រែង៕