អ៊ុក សុវណ្ណ៖ ភ្នំពេញក្រោន អស់ឱកាសប្រជែងយកពានលីគកំពូលកម្ពុជាហើយ
- 2018-07-16 07:24:27
- ចំនួនមតិ 0 | ចំនួនចែករំលែក 0
អ៊ុក សុវណ្ណ៖ ភ្នំពេញក្រោន អស់ឱកាសប្រជែងយកពានលីគកំពូលកម្ពុជាហើយ
ចន្លោះមិនឃើញ
ខ្សែការពារ អ៊ុក សុវណ្ណ របស់ក្រុមភ្នំពេញក្រោន បានបញ្ជាក់ថាឱកាសលើកពានរង្វាន់ក្រុមអស់ហើយ នៅរដូវកាលនេះ ដោយសល់តែ Hun Sen Cup ប៉ុណ្ណោះ។
ម្សិលមិញនេះ ភ្នំពេញក្រោនបានបរាជ័យក្រោមថ្វីជើងរបស់ក្រុមវិសាខា ៣-១ នាការប្រកួតលីគកំពូលកម្ពុជាសប្ដាហ៍ទី១៤។ បរាជ័យនេះ បានធ្វើឱ្យក្រុមភ្នំពេញដាច់ពិន្ទុក្រុមកំពូលតារាងខ្លាំងមែនទែន សឹងតែអស់ឱកាសប្រជែងយកពានជាមួយក្រុមដទៃទៅហើយ។ ជាមួយគ្នានេះ សុវណ្ណ ដែលជាខ្សែការពាររកបាន១គ្រាប់ក្នុងការប្រកួតទល់វិសាខា យល់ឃើញថាក្រុមរបស់ខ្លួនអស់ឱកាសហើយ។ នៅឆ្នាំនេះ លីគកំពូលកម្ពុជា សម្រាប់ក្រុមភ្នំពេញក្រោនមិនអាចប្រជែងបានទៀតទេ ពោលគឺបច្ចុប្បន្នក្រុមទាំងមូលនឹងផ្ដោតទៅលើ Hun Sen Cup វិញ។
ភ្នំពេញក្រោន ឆ្លងកាត់១៤ប្រកួត មាន២១ពិន្ទុប៉ុណ្ណោះ ដោយឈរនៅចំណាត់ថ្នាក់លេខ៥ក្នុងតារាង។ ស្របពេលដែលក្រុមឈរលើគេវិញ បឹងកេត ឆ្លងកាត់១៤ប្រកួត មិនទាន់ចាញ់ឡើយ មាន៣៦ពិន្ទុក្នុងដៃ។ ដូច្នេះហើយ បើមើលតាមពិន្ទុនេះទៅ ក្រោនចាញ់ក្រុមកំពូលតារាងដល់ទៅ១៥ពិន្ទុទៅហើយ។
សម្រាប់ Hun Sen Cup វិញ វគ្គ១៦ក្រុមចុងក្រោយថ្នាក់ជាតិ ក្រុមភ្នំពេញក្រោន បានយកឈ្នះលើក្រុមអគ្គិសនីកម្ពុជា ក្នុងលទ្ធផល ២-១ នៅជើងទី១។ សម្រាប់ជើងទី២វិញ នឹងធ្វើឡើងនៅថ្ងៃទី១៨ខាងមុខនេះ នាកីឡដ្ឋាន RSN ៕