កុំចេះតែឆ្លងដែនខុសច្បាប់! ចាញ់បោកមេខ្យល់អត់បានការងារហើយអស់លុយមិនចេះតិច
- 2018-07-18 07:18:17
- ចំនួនមតិ 0 | ចំនួនចែករំលែក 0
កុំចេះតែឆ្លងដែនខុសច្បាប់! ចាញ់បោកមេខ្យល់អត់បានការងារហើយអស់លុយមិនចេះតិច
ចន្លោះមិនឃើញ
ស្ថានទូតខ្មែរប្រចាំទីក្រុងបាងកក ប្រទេសថៃបានធ្វើអន្តរាគមន៍ជួយសង្គ្រោះពលករខ្មែរជាង២០នាក់ ដែលចាញ់បោកមេខ្យល់នាំចូលទៅ ធ្វើការនៅប្រទេសថៃ ដោយខុសច្បាប់ ឲ្យត្រឡប់មកស្រុកកំណើតវិញ។
នៅលើទំព័រហ្វេសប៊ុករបស់ខ្លួននៅថ្ងៃនេះ ស្ថានទូតខ្មែរប្រចាំប្រទេសថៃ សរសេរថាពលរដ្ឋខ្មែរចំនួន២៤នាក់បានចាញ់បោកមេខ្យល់នាំទៅធ្វើការខុសច្បាប់នៅក្នុងខេត្តសាមុត្រប្រាកាន ប្រទេសថៃ។ កាលពីថ្ងៃទី១៣ ខែកក្កដា កន្លងទៅ មន្ត្រីស្ថានទូតបានទៅជួបពលករទាំងនោះនៅក្នុងខេត្តខាងលើ ហើយបានដឹងថាពលករម្នាក់បានចំណាយថវិកាទៅឲ្យមេខ្យល់ចំនួន១៨ ០០០ បាត ឬប្រហាក់ប្រហែលជា៥៣០ដុល្លារអាមេរិក ក្នុងម្នាក់សម្រាប់ធ្វើលិខិតឆ្លងដែន ស្នើសុំទិដ្ឋាការស្នាក់នៅ និងទិដ្ឋាការធ្វើការដោយស្របច្បាប់។ ទោះយ៉ាងណា រហូតមកដល់ថ្ងៃមន្ត្រីស្ថានទូតចុះជួបនោះ ពលករទាំង២៤នាក់មិនបានទទួលលិខិតស្នាមអ្វីនោះទេ។ នេះបើតាមប្រភពដដែល។
រហូតមកដល់ថ្ងៃទី១៦ ខែក្កកដា ខាងស្ថានទូតខ្មែរក៏បានចេញលិខិតធ្វើដំណើរបណ្តោះអាសន្នដល់ពលករទាំង២៤នាក់ឲ្យបានត្រឡប់មកកាន់ប្រទេសកម្ពុជាដោយសុវត្ថិភាពតាមច្រកព្រំដែនអន្តរជាតិប៉ោយប៉ែត។ បើតាមប្រភពដដែល ខាងស្ថានទូតបានណែនាំដល់ពលករឲ្យរៀបចំឯកសារស្របច្បាប់ និងចូលមកធ្វើការក្នុងប្រទេសថៃតាមរយៈប្រព័ន្ធ MOU ដើម្បីកុំឲ្យចាញ់បោកមេខ្យល់។
គួរបញ្ជាក់ថាចាប់ពីថ្ងៃទី១ ខែកក្កដា ឆ្នាំ២០១៨ មករដ្ឋាភិបាលថៃចាប់ផ្តើមពិន័យលើពលករបរទេសណាដែលធ្វើការមិនស្របច្បាប់នៅប្រទេសថៃ ដោយពិន័យជាប្រាក់ចន្លោះពី៥ ០០០ បាត ទៅ៥០ ០០០បាត និងហាមចូលប្រទេសថៃរយៈពេលពីរឆ្នាំ។ ចំណែកនិយោជកដែលជួលពលករមិនស្របច្បាប់ នឹងត្រូវពិន័យជាប្រាក់ចន្លោះពី១០ ០០០ បាត ទៅ១០០ ០០០ បាត ហើយបើនៅប្រព្រឹត្តកំហុសដដែល នឹងត្រូវពិន័យជាប្រាក់ពី៥០ ០០០បាត ទៅ ២០០ ០០០ បាត សម្រាប់ពលករម្នាក់ និងអាចបញ្ឈប់ឲ្យជួលពលករបរទេសចំនួនបីឆ្នាំ។ នេះបើតាមសេចក្តីជូនដំណឹងរបស់ស្ថានទូតខ្មែរប្រចាំប្រទេសថៃកាលពីចុងខែមិថុនា៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
