តោះទៅលេងព្រៃវែង! ៥កន្លែងនេះ ល្បីថាសប្បាយខ្លាំង មិនចាញ់ខេត្តផ្សេងឡើយ

2018-08-04 05:07:41
ចំនួនមតិ 0 | ចំនួនចែករំលែក 0

ចន្លោះមិនឃើញ

បើនិយាយអំពីដំណើរកម្សាន្តទៅកាន់តំបន់ទេសចរណ៍នានាក្នុងប្រទេសកម្ពុជា គ្រប់គ្នាកម្រនឹកនារដល់ទឹកដីខេត្តព្រៃវែងណាស់ ព្រោះមិនសូវមានជ្រោះជ្រង ព្រៃភ្នំ អ្វីនោះឡើយ។ ប៉ុន្តែមែនទែនទៅខេត្តមួយនេះក៏មានតំបន់ទេសចរណ៍មួយចំនួនគួរឲ្យចាប់អារម្មណ៍ដែរ មិនចាញ់ខេត្តផ្សេងៗប៉ុន្មាននោះឡើយ។

១. ចុងប៉មកន្លែងមើលថ្ងៃលិចស្អាតបំផុត

ក្រុងព្រៃវែង ត្បិតខ្សត់កន្លែងកម្សាន្តមែន តែមានកន្លែងមួយដែលមើលថ្ងៃលិចស្អាតបំផុត បើបានឃើញហើយដឹងតែជាប់ចិត្តស្ទើរដកមិនរួច។ នោះគ្មានអីក្រៅពី ចុងប៉ម ល្បីប្រចាំក្រុងព្រៃវែងនោះឡើយ។

អមដោយទេសភាពថ្ងៃលិចនារដូវទឹកឡើងដែលមិនចាញ់ភ្នំក្រោម និងភ្នំបាខែង ខេត្តសៀមរាប នោះ អ្នកក្រុងព្រៃវែង ទាំងសិស្ស ទាំងអ្នកធម្មតា តែងមកទីនេះស្រូបយកខ្យល់បរិសុទ្ធនៃក្លិនទឹកទន្លេ ត្រជាក់ស្វាងអស់ខួរក្បាល។ ឯខែប្រាំងវិញ គេនៅតែស្រូបខ្យល់បរិសុទ្ធត្រជាក់ តែអមដោយទេសភាពវាលស្រែប្រាំងវិញម្ដង ជំនួសលើផ្ទៃទឹកនាខែវស្សា។

២. ឈើកាច់បាភ្នំ

ធ្វើដំណើរចេញពីភ្នំពេញ តាមបណ្ដោយផ្លូវជាតិលេខ១ ត្រង់ ឆ្លងស្ពានត្សឹបាសា រហូតដល់ផ្សារកំពង់សឹង ក្នុងចម្ងាយ ៧២គីឡូម៉ែត្រ លោកអ្នកនឹងបានឃើញផ្លូវមួយបត់ទៅខាងឆ្វេងដៃចម្ងាយប្រមាណ ១០គីឡូម៉ែត្រ តម្រង់ឆ្ពោះទៅរមណីយដ្ឋានប្រវត្តិសាស្ត្របាភ្នំ ដែលល្បីឈ្មោះជាងគេក្នុងខេត្តព្រៃវែង។

ជារៀងរាល់ឆ្នាំ មានអ្នកទៅលេងឈើកាច់បាភ្នំរាប់ម៉ឺននាក់ ជាពិសេសគឺក្នុងឱកាសបុណ្យចូលឆ្នាំថ្មី និងបុណ្យឡើងអ្នកតាមេស ដែលមានប្រវត្តិល្បីល្បាញតាំងពីបុរាណកាលមក។ ទោះបែបនេះក្ដី លោកបានបញ្ជាក់ថា ថ្ងៃធម្មតា មិនសូវមានមនុស្សទៅលេងឡើយ ដោយសារបញ្ហាហូបចុក និងស្នាក់នៅ ប៉ុន្តែក្រុមការងារក្នុងមូលដ្ឋានកំពុងប្រឹងប្រែងគិតគូរលើបញ្ហានេះ។

ប្រវត្តិស្រុកបាភ្នំ ដែលស្រាវជ្រាវដោយលោក ឡុង គារ បានកត់ត្រាថា ទីក្រុងវ្យាធបុរៈ (ឬ បុរីនៃស្ដេចទាក់ដំរីសម័យហ្វូណន) អាចស្ថិតនៅម្ដុំបាភ្នំ និងបាណាម ក្នុងខេត្តព្រៃវែងនេះឯង។ ប្រសិនបើនោះជាការពិតមែន មានន័យថាបាភ្នំ ជាទឹកដីរាជធានីខ្មែរដំបូងបង្អស់ ដែលមានឈ្មោះថា «នគរភ្នំ ឬហ៊្វូណន» កសាងឡើងនៅក្នុងរជ្ជកាលព្រះបាទ ហ៊ុន ទៀន នៅក្នុងសតវត្សទី១។ យ៉ាងណាក្ដី មិនមានប្រភពហ៊ានអះអាងច្បាស់ ពីប្រវត្តិដើមនៃទឹកដីបាភ្នំនេះឡើយ។

៣. បឹងស្នេហ៍កន្លែងមើលសត្វស្លាបរាប់ម៉ឺនប្រភេទ

សត្វស្លាបច្រើនប្រភេទរាប់សិបម៉ឺនក្បាលដែលហោះជាក្រុមៗមកទំជ្រកនៅព្រៃលិចទឹករាល់ល្ងាចនៅបឹងស្នេហ៍ ក្លាយជាទិដ្ឋភាពយ៉ាងស្អាតបែបធម្មជាតិជាមួយនឹងសំឡេងស្រែកឆ្លើយឆ្លងកងរំពងលាន់ឮពេញព្រៃលិចទឹកទំហំ ៨០ ហិកតា ធ្លាយដល់ផ្ទៃជលសារបឹងស្នេហ៍ ២៧៧៦ ហិកតា ដែលព័ទ្ធជុំវិញព្រៃនោះ។

សត្វមានច្រើនរហូតដល់ថ្នាក់ទំស្ទើរងាប់ដើមឈើ ពោលគឺដើមឈើជ្រុះស្លឹកអស់សល់តែមែកច្រងេងច្រងាង ខណៈទិដ្ឋភាពកម្រមាននេះ ទេសចរអាចឃើញនៅទួលអភិរក្សព្រៃព័ន្ធតាឡី បឹងស្នេហ៍ ក្នុងភូមិស្នេហ៍ ឃុំធាយ ស្រុកបាភ្នំ ខេត្តព្រៃវែង។ សត្វស្លាបទាំងនេះជាពពួកសត្វផ្លាស់ទី ដូចជា ននាល ក្រៀលខ្យង ទុង ក្រសារ កុក ក្អែកទឹក។ ទេសចរអាចទៅមើលសត្វបានចាប់ពីខែកក្កដា ដល់ វិច្ឆិកា តែចន្លោះខែកញ្ញា និងតុលា ជាពេលសម្បូរសត្វគ្រប់ប្រភេទជាងគេ។ ឯខែវិច្ឆិកា សម្បូរតែសត្វកុកប៉ុណ្ណោះ។

៤. ប្រាសាទចុងស្រុក

ប្រាសាទចុងស្រុក (អ្នកស្រុកហៅព្រៃដើមស្រុក ឬប្រធាតុ) ស្ថិតនៅភូមិបឹងជ័រ ឃុំព្រៃទឹង ស្រុកស៊ីធរកណ្ដាល ខេត្តព្រៃវែង។ ប្រាសាទដ៏ចំណាស់មួយនេះ ធ្លាប់មានរឿងរ៉ាវចម្លែកជាច្រើនកើតឡើង ប៉ុន្តែមិនសូវមានអ្នកបានដឹង បានស្គាល់ឡើយ ហើយបច្ចុប្បន្នកំពុងស្ថិតក្នុងសភាពស្ងាត់ជ្រងំនៅថ្ងៃធម្មតា និងមានមនុស្សមួយចំនួនតូចបានទៅលេងនៅថ្ងៃសៅរ៍ ថ្ងៃអាទិត្យ។

ប្រាសាទចុងស្រុក មានចម្ងាយប្រហែល ៣៨គីឡូម៉ែត្រ ពីទីរួមខេត្តព្រៃវែង។ ប្រាសាទនេះមានសភាពទ្រុឌទ្រោម បាក់បែក ធ្វើពីឥដ្ឋ និង ថ្មភក់ កសាងឡើងនៅសតវត្យរ៍ទី៧។ មានសមិទ្ធផលមួយចំនួន បានកសាងឡើងនៅទីនេះ ក្រោមការគ្រប់គ្រងរបស់ក្រសួងពាក់ព័ន្ធ និងមានបុរសចំណាស់ម្នាក់នៅមើលការខុសត្រូវ។

៥. ទស្សនាថ្ងៃរៀបលិចនៅស្ពានត្សឹបាសា

ទេសភាពដ៏ស្រទន់នាពេលសុរិយារៀបអស្ដង្គត បានបន្ថែមសម្រស់ស្ពានត្សឹបាសាឲ្យកាន់តែស្រស់ស្អាតមិនចាញ់នៅបរទេសឡើយ។ ស្ពានដែលវែងបំផុតនៅកម្ពុជានេះ មានប្រវែងសរុប ២២១៥ម៉ែត្រ និងដាក់សម្ពោធឲ្យប្រើប្រាស់កាលពីថ្ងៃទី០៦ ខែមេសា ឆ្នាំ២០១៥ កន្លងទៅ ដោយចំណាយអស់ទឹកប្រាក់សាងសង់អស់ប្រមាណ ១៣០លានដុល្លារ៕