គួរឲ្យសរសើរ គ្រួសារកូនស្រីតូច២នាក់មកពីតាកែវរត់ម៉ារ៉ាតុងនៅអង្គរវត្ត ព្រឹកមិញ

2018-08-05 04:59:29
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្រួសារមួយមានប្តីប្រពន្ធ និងកូនស្រីតូច២នាក់មកពីខេត្តតាកែវបានចូលរួមរត់ប្រណាំងម៉ារ៉ាតុងអន្តរជាតិចក្រភពខ្មែរនៅប្រាសាទអង្គរវត្តនៃខេត្តសៀមរាបដើម្បីបណ្តុះគំនិតឲ្យកូនស្រលាញ់សុខភាព។

អ្នកស្រី នី ស្រីពេជ្រ និងកូនស្រី

អ្នកស្រី នី ស្រីពេជ្រ បានប្រាប់ថា អ្នកស្រី និងស្វាមី ព្រមទាំងកូនស្រីតូចពីរនាក់បានធ្វើដំណើរមកពីខេត្តតាកែវកាលពីថ្ងៃសុក្រ ទី៣ ខែសីហា ឆ្នាំ២០១៨ដើម្បីចូលរួមរត់ម៉ារ៉ាតុងអន្តរជាតិចក្រភពខ្មែរនៅប្រាសាទអង្គរវត្ត។ តាមពិតទៅប្តីរបស់អ្នកស្រីធ្លាប់បានចូលរួមរត់ម៉ារ៉ាតុងស្ទើររាល់ឆ្នាំ ប៉ុន្តែសម្រាប់អ្នកស្រីវិញទើបជាលើកទី១ដែលបានចូលរួមនេះ។

អ្នកស្រីបានបន្តថា ប្តីរបស់អ្នកស្រីបានរត់ចម្ងាយ១០គីឡូម៉ែត្រ ប៉ុន្តែសម្រាប់អ្នកស្រី និងកូនស្រីតូច២នាក់រត់ក្នុងចម្ងាយតែ៣គីឡូម៉ែត្រដើម្បីតែសប្បាយរីករាយ និងសុខភាពប៉ុណ្ណោះ។ ការធ្វើដំណើរមកពីចម្ងាយដើម្បីចូលរួមរត់នេះគឺគោលបំណងសំខាន់ដើម្បីបណ្តុះគំនិតកូនស្រីឲ្យស្រលាញ់កីឡាដើម្បីសុខភាព។ កីឡាជាមធ្យោបាយដ៏សំខាន់ដែលជួយដល់សុខភាពរាងកាយឲ្យមាំមួន។

អ្នកស្រី នី ស្រីពេជ្រ និងកូនស្រី

«ពេលណាយើងឧស្សាហ៍នាំក្មេងឲ្យចូលរួមសកម្មភាពកីឡា ដូចជាម៉ារ៉ាតុងជាដើម នឹងធ្វើឲ្យក្មេងកាន់តែមានអារម្មណ៍ចូលចិត្ត។ លើកក្រោយយើងអត់នាំមក ក៏ពួកគេចូលរួមដោយខ្លួនឯងដែរ»។ អ្នក នី ស្រីពេជ្រ បានប្រាប់ Sabay ពេលកំពុងរត់បណ្តើរដឹកដៃកូនស្រីទាំងពីរ។

អ្នកស្រី នី ស្រីពេជ្រ និងគ្រួសារវិលត្រឡប់ទៅខេត្តតាកែវវិញថ្ងៃត្រង់ អាទិត្យ ទី៥ សីហា ឆ្នាំ២០១៨ បន្ទាប់ពីចប់ចូលរួមប្រកួត។

ព្រឹត្តិការណ៍ម៉ារ៉ាតុងអន្តរជាតិចក្រភពខ្មែរឆ្នាំ២០១៨លើកទី៥នេះបើតាមឯកឧត្តម ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជាថា អ្នករត់ប្រណាំងចំនួន៣០៥៥នាក់មកពី៥០ប្រទេសលើពិភពលោកចូលរួម។ ក្នុងនោះជនបរទេសជាង១ពាន់នាក់ដែលជនជាតិចិនចូលរួមច្រើនជាងគេរហូតជាប់លំដាប់លេខ១ បន្ទាប់មកជប៉ុន និងម៉ាឡេស៊ី ព្រមទាំងមកពីប្រទេសផ្សេងទៀត។

សកម្មភាពរត់វេលាម៉ោង៤:៣០នាទីព្រឹកព្រលឹមមុខអង្គរវត្ត

វេទិកាជួបជុំរត់ប្រណាំងដើម្បីកីឡាអាជីព ទេសចរណ៍ សុខភាព និងសាមគ្គីភាពនេះត្រូវបានដាក់វិញ្ញាសា៤ប្រភេទឲ្យរត់ប្រណាំងគឺចម្ងាយ៤២គីឡូម៉ែត្រ ២១គីឡូម៉ែត្រ ១០គីឡូម៉ែត្រ និង៣គីឡូម៉ែត្រ៕