អាណិតពេក ជីជី ចង់យកលោកតាៗធាក់ស៊ីក្លូ ដឹកជញ្ជូនស៊ុបនាងឲ្យអតិថិជន ទទួលបានការសាទរខ្លាំង!

2018-08-14 12:10:29
ចំនួនមតិ 0 | ចំនួនចែករំលែក 0

ចន្លោះមិនឃើញ

កញ្ញា ជីជី ដែលជាម្ចាស់ហាងស៊ុបមួយកន្លែង បានបង្ហើបពីផែនការ ចង់យកលោកតាៗធាក់ស៊ីក្លូមកដឹកជញ្ជូនស៊ុបរបស់នាង ទៅឲ្យអតិថិជន ទទួលបានការសាទរជាច្រើន។

នេះជាផែនការមួយ ដើម្បីជួយលោកតាក្រីក្រឲ្យមានចំណូលបន្ថែម ក្រោយពីឃើញស្ថានភាពរបស់លោកតាៗ មានសភាពលំបាកលំបិន។ ដូច្នេះហើយ នៅហ្វេសប៊ុកផ្ទាល់ខ្លួន ជីជី បានបង្ហើបថា នាងចង់យកលោកតាធាក់ស៊ីក្លូមកធ្វើជាអ្នកដឹកជញ្ជូនស៊ុបរបស់នាងទៅឲ្យភ្ញៀវ។ យ៉ាងណា ជាដំបូង នាងចង់ដឹងការយល់ឃើញ ក៏ដូចជាគំនិតយោបល់ទស្សនិកជន ក៏ដូចជាអតិថិជនរបស់នាងសិនដែរ។

នាងសរសេរថា "អាចទេ បើខ្ញុំចង់យក តាតា រឺអ៊ុំធាក់ស៊ីក្លូ មកដឹកស៊ុបជូនភ្ញៀវដែលកម្មង់ទៅផ្ទះ រឺ Office ? បញ្ហាត្រង់ថា តើអ្នកទាំងអស់គ្នា ជាអតិថិជន ព្រមរង់ចាំ និងទទួលគាត់ ជំនួសម៉ូតូឌុប រឺក្រុមហ៊ុនដឹកជញ្ជូន ដែររឺអត់?”។ អ្នកគាំទ្ររបស់នាង ស្ទើរទាំងអស់ក្នុងចំណោមអ្នកឆ្លើយតបថា បានឲ្យដឹងថា ពួកគេគាំទ្រគំនិតនេះ។

ពួកគេលើកឡើងថា ជាមធ្យោបាយមួយដ៏ល្អ ដែលអាចបង្កើនប្រាក់ចំណូលដល់លោកតាៗផង។

ពេជ្រ សូលីដា ឬ ជីជី គឺជាម្ចាស់ហាងស៊ុបយីហោ "Im Spicy Soup” នៅម្ដុំដេអិន។ ចំណុចគួរចាប់អារម្មណ៍ គឺផែនការខាងលើរបស់នាង ត្រូវបានបង្ហើប ក្រោយពីប៉ុន្មានថ្ងៃនេះ ប្រិយមិត្តនៅលើបណ្ដាញសង្គម កំពុងតែស្លុតចិត្តនឹងរូបភាពលោកតាម្នាក់ សម្រាកសម្រាន្តលើស៊ីក្លូ ដោយយកក្រមាចងពីជើងដំបូលម្ខាង ទៅជើងម្ខាងទៀត ធ្វើជាខ្នើយ។

យ៉ាងណា ជុំវិញបញ្ហាខាងលើ គិតត្រឹមម៉ោង៧យប់ថ្ងៃទី១៤ សីហានេះ មិនទាន់មានចម្លើយតបពីការសម្រេចចិត្តរបស់ស្រីស្អាតវិញនៅឡើយទេ ថានឹងធ្វើតាមផែនការ ឬក៏យ៉ាងណា...៕