តើបូសទ្រនិចកើតឡើងដោយសារអ្វី?

2014-11-15 15:46:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រិយមិត្តមួយចំនួនប្រហែលជាធ្លាប់ជួបបទពិសោធន៍កើតបូសហើយមើលទៅ ប៉ុន្តែប្រិយមិត្តខ្លះក៏ប្រហែលជាមិនធ្លាប់កើតនោះដែរ។ តើមានដឹងឬទេថាតើអ្វីទៅជាបូសទ្រនិច? តើវាកើតឡើងដោយសារអ្វី?

តើបូសទ្រនិចជាអ្វី?

បូសទ្រនិចជាមេរោគសើស្បែក កើតនៅក្នុងឫសសក់ និងគល់រោម។ ធម្មតានៅកណ្ដាលបូស មានសភាពទន់ និងកោសិកាឈាមសប្រឆាំងមេរោគ ដែលរាងកាយបញ្ជូនតាមសរសៃឈាម ដើម្បីបំបាត់ការឆ្លងរោគ។ ហើយការប្រមូលផ្ដុំនៃកោសិកាឈាមស បាក់តេរី និងប្រូតេអ៊ីន គេហៅថាខ្ទុះ។ ចុងក្រោយខ្ទុះកើតក្បាល ដែលអាចផ្ទុះធ្លាយចេញមកក្រៅ។

រោគសញ្ញា

ដុំរឹងពណ៌ក្រហម មានទំហំ១អ៊ីញ ប្រហែលជាង២ស.ម។ ពីរបីថ្ងៃក្រោយ ពកនោះឡើងទន់ ធំជាងមុន និងឈឺខ្លាំង។
ស្បែកជុំវិញបូសមានពណ៌ក្រហម ហើម និងឈឺចាប់
មានបូសច្រើនកើតជុំវិញ បូសចាស់

កន្លែងដែលបូសទ្រនិចពេញនិយមកើត ៖ ក ក្លៀក ស្មា គូទ តែបើកើតលើត្របកភ្នែកគេហៅថា ពពែភ្នែកឬពពែឆ្កែ។

ហេតុអ្វីបូសនេះកើត?

បូសទ្រនិចកើតឡើងដោយសារបាក់តេរីម្យ៉ាងហៅថា Staphylococcus (Staph)។ វាបង្កឱ្យឆ្លងរោគកើតជាបូស និងអាចមានសភាពធ្ងន់ធ្ងរយ៉ាងឆាប់រហ័ស។ មេរោគនេះអាចនៅលើស្បែក ឬក្នុងរាងកាយមនុស្ស តាមរយៈការដាច់រលាត់ស្បែក តាមរន្ធសក់ សក់ដុះក្នុងសាច់ ឬមុនជាដើម។

តើវ័យណាទើបកើតបូសនេះ?

និយាយពីរឿងកើតហ្នឹង! អ្នកណាក៏អាចកើតបានដែរ ជាពិសេសអ្នកមានជំងឺ ដែលប្រព័ន្ធភាពស៊ាំចុះខ្សោយ។

ត្រូវព្យាបាលយ៉ាងដូចម្ដេច?

វិធីបឋមនោះគឺ ប្រើកម្ដៅដូចជា ត្រាំឬស្អំទឹកក្ដៅ។ កម្ដៅបង្កើនចលនាទៅកាន់តំបន់បូស ហើយរាងកាយអាចកម្ចាត់មេរោគបានល្អ តាមរយៈនាំអង់ទីគ័រ និងកោសិកាឈាមស។ កុំប្រើម្ជុលជួសបូសឱ្យសោះ ព្រោះអាចប៉ះពាល់ធ្ងន់ធ្ងរ។

តើគួរប្រើថ្នាំបំបាត់ផ្សះទេ?

តាមធម្មតាបើមានការឆ្លងរោគជុំវិញស្បែក វេជ្ជបណ្ឌិតតែងឱ្យប្រើថ្នាំផ្សះ ដើម្បីកម្ចាត់បាក់តេរី តែយ៉ាងណា ថ្នាំផ្សះមិនមែនប្រើគ្រប់ស្ថានភាពទេ។ ការពិតពេលខ្លះថ្នាំផ្សះ មិនអាចព្យាបាលបូសដោយគ្មានការវះកាត់បន្ថែមនោះទេ។

តើគួរព្យាបាលនៅពេលណា?

អ្នកគួរទៅរកគ្រូពេទ្យ និងការព្យាបាលនៅពេល បូសកើតនៅលើមុខ ឆ្អឹងខ្នង ទ្វារធំ បូសរីកធំឡើង ឈឺខ្លាំង គ្រុនក្ដៅ ស្បែកជុំវិញបូសឡើងពណ៌ក្រហម ឬក្រហមឆ្នូតៗ មានបញ្ហាបេះដូង ទឹកនោមផ្អែម មានបញ្ហាប្រព័ន្ធភាពស៊ាំ បូសអត់ធូរស្បើយក្រោយព្យាបាលនៅផ្ទះប្រាំមួយប្រាំពីរថ្ងៃ និងអ្នកមានបូសច្រើនក្នុងរយៈពេលប្រាំមួយឬប្រាំពីរខែ៕