ហួសចិត្តពេលដឹងដើមហេតុ ចាដេត ជាប់ការប្រកួតជាតារានៅក្រុមហ៊ុនថៃល្បីឈ្មោះ

2018-09-10 06:09:24
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែង សក្តិ ចាដេត បានក្លាយជាបេក្ខជនជាប់ក្នុងការប្រកួតប្រជែងរបស់ក្រុមហ៊ុនថៃល្បីឈ្មោះ GMM ចំណោមតារាមកពីប្រទេស វៀតណាម ឡាវ មីយ៉ាន់ម៉ា ថៃ និងកម្ពុជា។ អ្វីមិននឹកស្មានដល់ ដើមទងដំបូង តួសម្ដែងក្នុងរឿង "ក្រោមមេឃតែមួយ ឬ We Are One” រូបនេះគ្មានបំណងដាក់ពាក្យប្រកួតឡើយ ដោយគ្រាន់ជូនគេទៅប៉ុណ្ណោះ តែបែរចុងក្រោយ ចាដេត ជាប់ រីឯមិត្តរបស់ខ្លួនធ្លាក់ទៅវិញ។

តារាដែលធ្លាប់ប្ដូរឈ្មោះ ពី ឡុង តេង ទៅជា សក្តិ ចាដេត បន្តថា គ្រានោះខ្លួនគិតថា កម្មវិធីគេរើសតែតារាពន្លកថ្មី ចំណែកខ្លួនជាតួសម្ដែងយូរគួរសមដែរ ប្រហែលគេមិនត្រូវការឡើយ។ ប៉ុន្តែមិត្តភ័ក្ដិ ប្រាប់ថា គេរើសទាំងអស់ ទើបខ្លួនក៏ដាក់លេងទៅ។ តែមិននឹកស្មាន ចេះតែជាប់ជាបន្តបន្ទាប់ រហូតដល់វគ្គជម្រុះបេក្ខជន១៦នាក់ចុងក្រោយនៅក្រុមហ៊ុនថៃបែបនេះ ដោយរំភើបមិននឹកស្មានដល់។

មិនយូរទេ តារាទើបបញ្ចប់បរិញ្ញាបត្រនៅសាកលវិទ្យាល័យជាតិគ្រប់គ្រង នឹងហោះទៅប្រទេសថៃ នៅថ្ងៃទី២៤ ខែកញ្ញា ខាងមុខ រយៈ ពេល៤ថ្ងៃ ដើម្បីពិភាក្សាការងារ។ ចាដេត នៅរង់ចាំមើលមួយវគ្គទៀតលើការប្រកួតនេះ ដើម្បីចុះកុងត្រា ត្រៀមសម្ដែងក្នុងខ្សែរឿងល្បីមួយ ក៏ដូចជាការងារផ្សេងៗនៅក្រុមហ៊ុនថៃ។

តារាអាយុ២២ឆ្នាំ សង្ឃឹមថា អ្នកគាំទ្រជាទីស្រលាញ់របស់ខ្លួន នៅតែបន្តតាមដានសកម្មភាព និងនឹករលឹករូបលោក ទោះលោកត្រូវទៅបំពេញការងារនៅប្រទេសថៃមែន តែនៅតែឡើងចុះកម្ពុជា មកជួបអ្នកគាំទ្រជាទីស្រលាញ់ដដែល៕

ទស្សនាការរៀបរាប់របស់ សក្តិ ចាដេត តាមរយៈវីដេអូខាងក្រោមនេះ៖