ផ្ដាំទៅអ្នកចូលចិត្តរកស៊ីចងការប្រាក់ផង! ហានិភ័យ៤យ៉ាង ដូចយកលុយទៅឲ្យគេចាយទទេៗ

2018-10-18 02:24:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ការរកស៊ីចងការប្រាក់ក្រៅប្រព័ន្ធធនាគារ បានក្លាយជាមុខរបរ ដ៏ពេញនិយមសម្រាប់ប្រជាពលរដ្ឋមួយចំនួនក្នុងប្រទេសកម្ពុជា។ ភាគច្រើននៃអ្នកដែលរកស៊ីចងការប្រាក់គឺមកពីចង់ចំណេញអត្រាការប្រាក់ ប៉ុន្តែការរកស៊ីបែបនេះប្រជាពលរដ្ឋគិតតែរឿងចំណេញ មិនបានគិតដល់ហានិភ័យដែលកើតឡើងបានគ្រប់ពេលនោះទេ។ តើការរកស៊ីចងការប្រាក់អាចប្រឈមមុខនឹងហានិភ័យអ្វីខ្លះ? ថ្លែងមកកាន់ Sabay លោកសាស្ត្រាចារ្យសេដ្ឋកិច្ច ម៉ម វីរៈរ័ត្ន បង្រៀននៅសាកលវិទ្យាល័យឯកជនមួយបានប្រាប់នូវហានិភ័យមិននឹកស្មានដល់ដូចខាងក្រោម៖

១. ប្រឈមការបាត់បង់លុយ

ជាទូទៅនៅត្រង់ចំណុចនេះ អ្នកណាក៏អាចដឹងពីបញ្ហានេះដែរ គឺឱ្យលុយគេខ្ចីហើយខ្លាចគេមិនសង។ នេះគឺជាហានិភ័យងាយនឹងជួបប្រទះបំផុតសម្រាប់អ្នកចូលចិត្តរកស៊ីចងការប្រាក់ នៅពេលដែលកូនបំណុលមិនសងគឺពិបាករកប្រព័ន្ធច្បាប់ក្នុងការដោះស្រាយបំផុត។ មានន័យថាការផ្ដល់កម្ចីនេះមិនមែនស្ថិតក្នុងច្បាប់ហិរញ្ញវត្ថុ ឬប្រព័ន្ធធនាគារឡើយ គ្មានអាជ្ញាធរដឹងឮ មិនបានពាក់ព័ន្ធក្នុងប្រព័ន្ធច្បាប់នៃការផ្ដល់កម្ចីក្នុងវិស័យធនាគារ។ ដូចនេះទោះបីម្ចាស់បំណុល ចង់ទាមទារលុយទាំងនោះមកវិញគឺនឹងប្រឈមមុខហានិភ័យ ប្រសិនបើកូនបំណុលនោះមិនសង។ នេះជាការលើកឡើងរបស់លោកសាស្ត្រាចារ្យសេដ្ឋកិច្ច ម៉ម វីរៈរ័ត្ន។

២. បាត់បង់ឱកាសនៃការប្រើលុយ

នៅក្នុងទ្រឹស្ដីសេដ្ឋកិច្ចនៅត្រង់ចំណុចនេះចង់សំដៅថា អ្នកដែលចូលចិត្តយកលុយទៅចងការប្រាក់នឹងបាត់បង់ថ្លៃឱកាសនៃការប្រើប្រាស់លុយ។ មានន័យថា ប្រសិនបើមានឱកាសល្អណាមួយកើតឡើង ហើយចាំបាច់ត្រូវមានលុយនោះដើម្បីប្រើការ ដូចជាការរកស៊ី ឬត្រូវការលុយជាបន្ទាន់ក្នុងករណីណាមួយ នោះនឹងត្រូវបាត់បង់ឱកាសក្នុងការប្រើលុយរបស់ខ្លួនឯង ដោយសារត្រូវកប់ចោលក្នុងដៃកូនបំណុល។ ដូចនេះថ្វីបើ យកលុយឱ្យគេខ្ចីដើម្បីចំណេញអត្រាការប្រាក់ ប៉ុន្តែនឹងត្រូវខកខានឱកាសល្អណាមួយក្នុងការប្រើលុយនោះឱ្យមានប្រយោជន៍។

៣. ហានិភ័យអត្រាការប្រាក់

តាមការឱ្យដឹងពី លោកសាស្ត្រាចារ្យសេដ្ឋកិច្ច ម៉ម វីរៈរ័ត្ន ហានិភ័យអត្រាការប្រាក់នេះគឺជាប់ពាក់ព័ន្ធនឹងបញ្ហាអតិផរណា (ទំនិញឡើងថ្លៃ) មានន័យថានៅពេលដែលកូនបំណុលសងលុយទាំងនោះមកវិញចំពេលសេដ្ឋកិច្ចកំពុងរីកចម្រើន នោះនឹងត្រូវប្រឈមមុខជាមួយហានិភ័យនេះ។ ចំណុចនេះចង់សំដៅថា ប្រសិនបើអ្នកយកលុយឲ្យគេខ្ចីចំនួន១លានរៀលជាពេលដែលលុយនៅថ្លៃ ពេលនោះអ្នកអាចយកលុយ១លានរៀលទៅទិញម៉ូតូបានមួយគ្រឿង។ ប៉ុន្តែបើកូនបំណុលសងលុយនៅពេលសេដ្ឋកិច្ចរីកចម្រើន(អតិផរណា ទំនិញឡើងថ្លៃ) ១លានរៀលពីមុនមិនអាចទិញម៉ូតូបានមួយគ្រឿងឡើយ។ ដូចនេះអ្នកហាក់បីដូចជាខាតលុយ សឹងតែពាក់កណ្ដាលទៅហើយ។

៤. ហានិភ័យអត្រាប្ដូរប្រាក់

ហានិភ័យនៅត្រង់ចំណុចនេះមានន័យថា ប្រសិនបើពេលដែលឱ្យលុយកូនបំណុលខ្ចី ជាលុយដុល្លារ ប៉ុន្តែក្នុងករណីមួយចាំបាច់ត្រូវធ្វើការប្ដូរលុយដុល្លារទាំងនោះមកជាលុយរៀលវិញ នោះហានិភ័យនៃការខាតបង់អត្រាការប្រាក់ ប្ដូរដុល្លារមកជាលុយរៀលនឹងត្រូវជួបប្រទះ។ ត្រូវដឹងថាការកើនឡើង ឬថយចុះនៃអត្រាប្ដូរលុយដុល្លារ ទៅជាលុយរៀល និងពីលុយរៀលទៅជាដុល្លារ តែងមានការប្រែប្រួលមិនទៀងទាត់ អាស្រ័យកត្តាសេដ្ឋកិច្ច។ ដូចនេះទោះបីជាឱ្យគេខ្ចីលុយជាដុល្លារក្ដី ជាលុយរៀលក្ដីគឺត្រូវប្រឈមមុខទាំងពីរនៃការខាតបង់អត្រាប្ដូរប្រាក់៕

អត្ថបទ៖ វឌ្ឍនៈ