ផ្អើលពិធីករ Cambodia's Got Talent សាន់ វិសាល ទៅថៃវះកាត់បេះដូង តាមពិតកើតជំងឺនេះសោះ

2018-10-19 07:04:18
ចំនួនមតិ 0 | ចំនួនចែករំលែក 0

ចន្លោះមិនឃើញ

ពិធីករក្នុងកម្មវិធី Cambodia's Got Talent លោក សាន់ វិសាល ត្រូវគេផ្អើលថា លោកទៅមន្ទីរពេទ្យនៅប្រទេសថៃទាំងតក់ក្រហល់ ដោយសារត្រូវវះកាត់បេះដូង ធ្វើឲ្យប្រិយមិត្តភ្ញាក់ផ្អើលយ៉ាងខ្លាំង។ ដំណឹងនេះ ត្រូវបានពិធីករពូកែបង្កើតសំណើចដល់ប្រិយមិត្ត សុំច្រានចោល ព្រោះលោកមិនមែនមកវះកាត់ដោយសារបញ្ហានេះឡើយ។

លោកបានឲ្យ Sabay ដឹងថា ក របស់លោកមានដុំខ្លាញ់ធំកៀបត្រង់ប្រព័ន្ធបញ្ជាសរសៃ បណ្ដាលឲ្យលោកឈឺក្បាលញឹកញាប់ ស្ពឹក ឆាប់អស់កម្លាំង មិនអាចនិយាយបានច្រើន ថែមទាំងឈរត្រឹមកន្លះនាទី ក៏ចុកខ្លាំងតែម្ដង។ មូលហេតុនេះ ទើបលោកសម្រេចទៅប្រទេសថៃ ដើម្បីឲ្យពេទ្យវះកាត់ដុំខ្លាញ់នោះចោល។

លោក វិសាល ពេលកំពុងវះកាត់នៅថៃ

ពេលនេះ ការវះកាត់ទទួលបានជោគជ័យហើយ តែលោកត្រូវមកទីនេះម្ដងទៀតនៅខែបន្ទាប់ ដើម្បីរង់ចាំលទ្ធផល ក្រោយពេទ្យ ត្រូវការតាមដានសាច់នោះ ជាសាច់កាចឬយ៉ាងណា។ ចំពោះថ្លៃចំណាយលើការព្យាបាលវិញ លោក វិសាល ប្រាប់ថា អស់ប្រហែលជាងពីរពាន់ដុល្លារ ដោយសារជាពេទ្យរដ្ឋ ។

យ៉ាងណាមិញ លោកមិនទាន់អាចវិលមកបង្កើតសំណើច ព្រមទាំងភាពសប្បាយរីករាយជូនអ្នកទស្សនាភ្លាមៗបាននោះទេ ដោយសារមុខរបួសនោះ ធំ ជ្រៅ ត្រូវដេរច្រើនថ្នេរ និងមិនទាន់អាចកម្រើក ក បានធម្មតា។ ទម្រាំរាងកាយបានធូរស្រាល យ៉ាងហោចណាស់ត្រូវចំណាយពេល២-៣ ខែ ថែមទៀត។ លើសពីនេះ ពេទ្យតម្រូវឲ្យលោកតមអាហារមួយចំនួន ដូចជា សាច់គោ គ្រឿងសមុទ្រ និងអាហារបង្កឲ្យមុខរបួសឆាប់ក្លាយជាដើម៕

រូបភាព៖ FB San Visal

អត្ថបទ៖ លឹម សុនា