ស្រលាញ់សិល្បៈពេក ម៉ារ៉ា ប៊ុណ្ណា សុខចិត្តទុកលុយថត MV ទោះគ្មានសូម្បីម៉ូតូកញ្ចាស់ជិះ

2018-11-02 01:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយជួបហេតុការណ៍គ្រោះថ្នាក់ចរាចរណ៍បណ្ដាលឲ្យរថយន្ត Tico របស់តារាចម្រៀង ម៉ារ៉ា ប៊ុណ្ណា រងការខូចខាតទាំងស្រុង ធ្វើឲ្យលោកអត់មធ្យោបាយធ្វើដំណើរ សូម្បីម៉ូតូមួយគ្រឿងក៏គ្មាន។ ទោះបែបនេះក្ដី ម្ចាស់បទ "ដីថ្លៃប្រល័យស្នេហ៍" ខិតខំរកប្រាក់ទាំងយប់ថ្ងៃ តែមិនមែនរកដើម្បីសន្សំទិញរថយន្តទុកជិះទេ គឺទុកដើម្បីថត MV ថ្មីៗរបស់ខ្លួន។

តារារូបនេះ បន្តថា រាល់ថ្ងៃពេលចង់ចេញក្រៅម្ដងៗ លោកពឹងមិត្តភ័ក្ដិ ឬ ជិះ PassApp តាក់ស៊ីជាដើម។ លោកមិនខ្លាច គេមើលងាយនោះទេ ហើយក៏គ្មានបញ្ហាអ្វីជះឥទ្ធិពល់ដល់ផ្លូវចិត្តរបស់លោកដែរ សំខាន់ឲ្យតែមានបងប្អូន និងប្រិយមិត្តនៅតែគាំទ្រ លោកសប្បាយចិត្តហើយ។ ជីវិតបែបនេះ ធ្វើឲ្យលោកយល់ថា សាមញ្ញ ទោះគ្មានអ្វីជិះហ៊ឺហាក៏ដោយ មិនបានធ្វើឲ្យលោកខ្មាសគេទេ ព្រោះគ្រាចូលសិល្បៈដំបូងៗ លោកក៏ធ្លាប់កម្សត់ កម្រ គ្មានអ្វីជិះដែរ។

លោកប្រាប់ថា រាល់ខែជាមធ្យម អាចរកបានពី៧០០- ១០០០ ដុល្លារ តែលុយទាំងនេះ លោកមិនទុកទិញឡាន ឬម៉ូតូជិះឡើយ ព្រោះលោកស្រលាញ់សិល្បៈ ដូច្នេះសុខចិត្តទុកលុយ ថតបទចម្រៀង វិញប្រសើរជាង។ ម្យ៉ាងទៀត ចង់ទៅណា ជិះ PassApp ឬ តាក់ស៊ីក៏ស្រួលចិត្តទៀត ម្ល៉ោះហើយគ្មានអ្វី ត្រូវពិបាកចិត្តឡើយ។ តារាសម្បុរស្រអែមរូបនេះ ឲ្យដឹងថា មានសិល្បករជាច្រើន គេចង់ធ្វើកម្មវិធីសប្បុរសធម៌ រៃប្រាក់ជួយដល់លោក តែលោកសុំចិត្ត មិនទទួលឡើយ។ ទោះទ្រព្យរបស់លោកមិនសំបូរពិតមែន តែតារាមាឌធំរូបនេះមិនចង់បានដោយរបៀបនេះឡើយ។

មួយរយៈនេះ លោកជាប់រវល់លើការងារសិល្បៈមួយចំនួនដូចជា សម្ដែងរឿងត្រៀមដាក់បញ្ចាំងតាមរោងកុន និងតាមទូរទស្សន៍ផងដែរ។ លោកមានគម្រោង យកបទល្បីកាលពី១០ឆ្នាំមុន ចំណងជើងថា "ដីថ្លៃប្រល័យស្នេហ៍" មកថត MVឡើងវិញ ដើម្បីជាចំណីអារម្មណ៍ប្លែកដល់ទស្សនិកជន ៕

អត្ថបទ៖ លឹម សុនា