មិនធម្មតា! ក្រុមអ្នកផលិតហ្គេមខ្មែរ លេចមុខក្នុងកម្មវិធី Game Show ពិភពលោក

2018-11-15 08:25:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ដោយសារស្នាដៃផលិតហ្គេមមានគុណភាព និងមានលក្ខណៈស្តង់ដារផងនោះ ក្រុមអ្នកផលិតហ្គេមក្នុងស្រុកល្បីៗចំនួនបី ត្រូវបានអញ្ជើញឲ្យចូលរួមតាំងបង្ហាញស្នាដៃរបស់ខ្លួន ក្នុងកម្មវិធីតាំងពិព័រណ៍ហ្គេមដ៏ធំប្រចាំឆ្នាំ នៅប្រទេសកូរ៉េខាងត្បូង។

លោក យក់ ស៊ីវ៉ាល់រី

លោក យក់ ស៊ីវ៉ាល់រី ស្ថាបនិកនៃក្រុម Sil Animation និងជាអ្នកផលិតហ្គេម "Angkor: Rise of Heroes" ដែលបានចូលរួមបានប្រាប់ Sabay ឲ្យដឹងថា កម្មវិធីតាំងពិព័រណ៍ហ្គេមដ៏ធំប្រចាំឆ្នាំ G-Star ជាកម្មវិធីជួបជុំរវាងបណ្ដាអ្នកអភិវឌ្ឍន៍ហ្គេម(Game developer) ល្បីៗនៅកូរ៉េ និងអ្នកអភិវឌ្ឍន៍ហ្គេមទូទាំងពិភពលោក។

ក្នុងនោះដែរ ក៏មានការចូលរួមពីបណ្តាក្រុមហ៊ុនផលិតហ្គេមធំៗនិងល្បីៗជាច្រើនប្រទេសដូចជា កូរ៉េ ចិន ជប៉ុន ថែមទៀតផង។

ក្រុមអ្នកផលិតហ្គេមខ្មែរ នៅកម្មវិធីតាំងពិព័រណ៍ហ្គេមដ៏ធំប្រចាំឆ្នាំ G-Star

ស្ថាបនិកដដែលខាងលើ បន្ថែមថា ខាងក្រុមអ្នកផលិតហ្គេមខ្មែរយើង បានលើកយកហ្គេមល្បីៗបីមកតាំងបង្ហាញគឺ Osja AR 2.0 របស់ Sabay Studio, ហ្គេម”Angkor: Rise of Heroes" របស់ Sil Animation និងហ្គេម Osja Village របស់ Osja Studio ទទួលបានការចាប់អារម្មណ៍ពីសំណាក់ developer ប្រទេសដទៃ មិនតិចនាក់នោះទេ។

ក្នុងឱកាសតាំងបង្ហាញស្នាដៃនេះដែរ ក្រុមអ្នកផលិតហ្គេមខ្មែរ បានជួបផ្ទាល់ជាមួយក្រុមហ៊ុនផលិតហ្គេមធំៗដទៃផ្សេងទៀត ទទួលបានបទពិសោធន៍ថ្មីៗ ក៏ដូចជា បានទំនាក់ទំនងការបណ្ដាក់ទុនវិនិយោគ ឬការសហការពីក្រុមហ៊ុនយក្សទាំងនោះផងដែរ។

ក្រៅពីស្នាដៃហ្គេមខ្មែរនេះដែរ ក៏មាន ៣៥ ហ្គេមផ្សេងទៀតមកពី ៧ ប្រទេសនៅអាស៊ីគឺ កម្ពុជា ឥណ្ឌូណេស៊ី ម៉ាឡេស៊ី មីយ៉ាន់ម៉ា ហ្វីលីពីន ថៃ និង វៀតណាម ដែលត្រូវបានអញ្ជើញឲ្យចូលរួមតាំងបង្ហាញស្នាដៃរបស់ខ្លួន ក្នុងកម្មវិធីតាំងពិព័រណ៍ហ្គេមដ៏ធំប្រចាំឆ្នាំនេះ។

លើសពីការតាំងពិព័រណ៍ស្នាដៃផលិតហ្គេម កម្មវិធី G-Star នេះក៏មានការលេងកីឡាអេឡិចត្រូនិច (E-Sport) ការតាំងលក់សម្ភារៈហ្គេម និងការប្រកួតហ្គេមផ្សេងៗដូចជា PUBG, Fornite ជាដើម។

កម្មវិធីនេះធ្វើឡើងនៅថ្ងៃទី ១៥ ដល់ ១៧ ខែ វិច្ឆិកាឆ្នាំ ២០១៨ នៅក្នុងមជ្ឈមណ្ឌល (BEXCO Exhibition Center II) ប្រទេសកូរ៉េខាងត្បូង៕