ថាអីចេះខុស! អ្នកទៅលេងមណ្ឌលគីរីថ្ងៃអុំទូក រៀបរាប់ចង់អួលដើមក រឿងរកកន្លែងអត់បាន

2018-11-26 03:29:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ខេត្តមណ្ឌលគីរី បានក្លាយជាគោលដៅដំណើរកម្សាន្ត របស់ភ្ញៀវទេសចរភាគច្រើនបំផុត រហូតដល់ផ្ទះសំណាក់ និងសណ្ឋាគារ ក៏ដូចជារីសត ផ្សេងៗមិនអាចរកកន្លែងឲ្យភ្ញៀវគេងបាន។

លោក បញ្ញាស័ក្ដិ ដែលជាមនុស្សម្នាក់ ក្នុងចំណោមរាប់ពាន់នាក់ បានទៅលេងខេត្តមណ្ឌលគីរី នៅថ្ងៃឈប់សម្រាក នៃព្រះរាជពិធីបុណ្យ បានប្រាប់ Sabay ថាលោក និងគ្រួសារមិនបានកក់ផ្ទះសំណាក់ទុកមុន នៅទីបំផុតលោកត្រូវបកត្រឡប់ទៅខេត្តរតនគីរីទាំងកណ្ដាលយប់ដើម្បី រកកន្លែងគេង។ អ្នកភ្នំពេញរូបនេះ បន្តថា លោកបានរកកន្លែងគេងមិនតិចជាង២០កន្លែងឡើយ ជិះបកចុះបកឡើង រហូតដល់ម៉ោង១១យប់ នៅតែរកមិនបាន។

លោកបន្តទាំងអួលដើមកថា មានកូនតូចៗផង ខ្លះយំ ខ្លះស្រែកពេញឡាន ព្រោះឃ្លានផង ងងុយផង។ លោកចាត់ទុកថា នេះជាមេរៀនមួយ ប្រសិនបើចង់ទៅលេងខែបុណ្យទាន ជាពិសេសក្នុងអំឡុងខែ១១ ឬខែ១២ គួរកក់កន្លែងគេងមុនយ៉ាងតិចឲ្យបាន១ខែ ទៅ២ខែ។ លោក ក៏ប្រាប់ដែរថា ដោយសារសមាជិកគ្រួសារលោកច្រើនពេក ទើបមិនហ៊ានសុំផ្ទះអ្នកស្រុកស្នាក់នៅ។

ដោយឡែក ក៏មានភ្ញៀវទេសចរ ជាច្រើនផ្សេងទៀតបានបង្ហោះនៅលើបណ្ដាញសង្គម ពីបញ្ហារកកន្លែងគេងមិនបាន ក្នុងអំឡុងដំណើរកម្សាន្តទៅកាន់ខេត្តមណ្ឌលគីរីនេះ។

ចំពោះផ្ទះសំណាក់ សណ្ឋាគារ និងរីសត បើតាមការសាកសួរពីក្រុមការងារ Sabay បានឲ្យដឹងថា ភ្ញៀវចាប់ផ្ដើមកក់តាំងពីខែកក្កដា មកម្ល៉េះ។ ដូច្នេះអ្នកដែលមានគម្រោងទៅភ្លាមៗ ពិបាកបន្តិចហើយរឿងរកកន្លែងគេង មិនថាកន្លែងល្បី ឬមិនល្បីពេញៗទាំងអស់។ ក្នុងនោះ តម្លៃស្នាក់នៅក៏មានការកើនឡើងដែរ កន្លែងខ្លះ១យប់ ១០ ឬ១៥ដុល្លារ ឡើងដល់៣០ ទៅ៣៥ដុល្លារ។ រីឯរីសត និងសណ្ឋាគារខ្លះ ឡើងពីតម្លៃ ៤០ ឬ៥០ដុល្លារ ក្នុង១យប់ ទៅដល់ ៦០ ទៅ៧០ដុល្លារ។

បើតាមរបាយការណ៍របស់មន្ទីរទេសចរណ៍ ខេត្តមណ្ឌលគិរីបានឲ្យដឹងថាទេសចរដែលទៅទស្សនាក្នុងខេត្តមណ្ឌលគិរី ក្នុងព្រះរាជពិធីបុណ្យអុំទូក រយៈពេល៣ថ្ងៃ ត្រូវនឹងថ្ងៃទី២១ ២២ ២៣ ខែវិច្ឆិកា ឆ្នាំ២០១៨ មានប្រមាណចំនួនសរុប ២២,៦៤១នាក់។ ក្នុងនោះទេសចរជាតិចំនួន ២២,២៣៣នាក់ ទេសចរអន្តរជាតិចំនួន៤០៨នាក់ ធៀបនឹងព្រះរាជពិធីបុណ្យអុំទូក ឆ្នាំ២០១៧ សរុបចំនួន ១៣,៧៧២នាក់ ក្នុងនោះទេសចរជាតិ ១៣,៤៧៦នាក់ ទេសចរអន្តរជាតិ ២៩៦នាក់ កើនសរុប ៦៤,៣៩% ទេសចរអន្តរជាតិកើន ៣៧,៨៣%។ ការងារសន្តិសុខសណ្តាប់ធ្នាប់នៅទូទាំងខេត្ត មានភាពល្អប្រសើរ៕

អត្ថបទ៖ វឌ្ឍនៈ