ដោយសារតែឱកាសបែបនេះ ទើបធ្វើឲ្យតារាបីដួងក្លាយជាគូស្នេហ៍នឹងគ្នាដោយមិនបានព្រាងទុក

2019-01-15 02:40:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្នេហាកើតឡើងដោយសារតែមូលហេតុផ្សេងៗ ធ្វើឲ្យតារាជាច្រើនដួងលង់ចិត្តលើគ្នា ដកមិនរួច។ តារាបីគូខាងក្រោម សុទ្ធតែធ្លាប់ប្រកែកថាមិនមានទំនាក់ទំនងស្នេហាអ្វី ក្រៅពីមិត្តភ័ក្កិឡើយ តែមកដល់ពេលនេះ ពួកគេលែងលាក់លៀមទៀតហើយ។ បើនិយាយពីពន្លកស្នេហ៍វិញ តារាទាំងបីដួង កើតចេញពីឱកាសរួមការងារជាមួយគ្នា រហូតក្លាយជាស្នេហាដោយមិនដឹងខ្លួន។

១. សុខ សោម៉ាវត្តី និង លី វ៉ាហេទ

ពន្លកស្នេហ៍របស់តារាទាំងពីរកើតឡើង តាមរយៈឱកាសចូលរួមសម្ដែងរឿងជាមួយគ្នា គឺ"ខូចចិត្តអាជីព"។ ដោយសារតែកីឡាករ វ៉ាហេទ ធ្លាប់តែលេងបាល់ មិនដែលសម្ដែងកុនពីមុន ហើយតារាក្រមិចក្រមើម សុម៉ាវត្តី វិញ តែងណែនាំ និងយោបល់ផ្សេងៗ ពេលសម្ដែងរឿងជាមួយគ្នាឲ្យកំលោះសង្ហារូបនេះ។ យូរៗទៅ ចំណងស្នេហ៍ក៏ចាប់ផ្ដើមមាន ធ្វើឲ្យអ្នកគាំទ្រភ្ញាក់ផ្អើលយ៉ាងខ្លាំង ។

ភាពផ្អែមល្ហែម រ៉ូមែនទិក រវាងអ្នកទាំងពីរ ធ្វើឲ្យគ្រប់គ្នាឃើញហើយ ស្ទើរលើសជាតិស្ករ ។ អ្វីដែលកាន់តែពិសេសទៀតនោះ ពួកគេលែងលាក់លៀមសម្ព័ន្ធស្នេហាដូចមុនទៀតហើយ ដោយកីឡាករ វ៉ាហេទ បានដាក់ Relationship លើ Facebook របស់ខ្លួន ជាមួយអ្នកនាង សុខ សុម៉ាវត្តី ។

២. ស៊ិន យូប៊ីន និង ខាត់ វ៉ៃហាំង

ដោយសារតែថត Pre-Wedding ឲ្យក្រុមហ៊ុនមួយ មើលទៅសក្ដិសមដូចគូស្នេហ៍ពិតៗ ធ្វើឲ្យអ្នកទាំងពីរ ត្រូវអ្នកគាំទ្រ ចាប់ផ្ដើមផ្សំផ្គុំ។ មួយគូរនេះដំបូងឡើយប្រកែកញ័រមាត់ថា មិនបានស្រលាញ់គ្នាទេ ដោយគ្រាន់ជាដៃគូសម្ដែងល្អជាមួយគ្នាប៉ុណ្ណោះ។ តែថ្មីៗនេះ ទាំងវ៉ៃហាំង និង យូប៊ីន បានបង្ហាញចំណងរបស់ពួកគេលើបណ្ដាញសង្គម លែងលាក់លៀមដូចមុន ធ្វើឲ្យគ្រប់គ្នាចូលរួមអបអរសាទរ។

ចំពោះថ្ងៃរៀបការ តួឯកក្នុងរឿង "អាថ៌កំបាំងត្រីសូល៍" មិនទាន់កំណត់ថាពេលណាឡើយ តែស្រីស្អាតជយលាភីលេខ១ Freshy Girl ធ្លាប់ប្រាប់ថា ពេញចិត្តម្ដាយលោក ខាត់ វ៉ៃហាំង បើសិនខ្លួនបានក្លាយជាកូនប្រសាស្រីរបស់គ្រួសារនេះវិញ ពិតជាកក់ក្ដៅយ៉ាងខ្លាំង។

៣. គូម៉ា និង ម៉ៅ គីមធីតា

ធ្លាប់រួមថត MV ជាមួយគ្នាច្រើនដង យូរៗទៅ ភ្លើងស្នេហ៍ក៏ចាប់ផ្ដើមបង្កាត់ឡើង ដោយមិនដឹងខ្លួន។ ក្រោយពីអ្នកទាំងពីរបានឱកាស សម្ដែងរឿងជាមួយគ្នា គឺ "គំនូស៤៩" ទៀត រឹតតែធ្វើឲ្យពួកគេស្និទ្ធគ្នាខ្លាំង រហូតមិនអាចបិទបាំងភ្នែកមហាជនបានទៀត។ អ្នកទាំងពីរដំបូង សុទ្ធតែប្រកែក តែយូរទៅ ពួកគេក៏សារភាពថា ពិតជាស្រលាញ់គ្នាមែន ។

លោក គូម៉ា ប្រាប់ថា ធីតាជាក្មេងស្រីគួរឲ្យស្រលាញ់ ពេលនៅជិតពេលណាមានអារម្មណ៍ថាសប្បាយចិត្ត ជាអារម្មណ៍មួយធ្វើឲ្យលោកមិនអាចបំភ្លេចបាន។ រីឯ តួស្រីក្នុងរឿង "មន្តស្នេហ៍លេខា" វិញ បង្ហើបថា ដោយសារតែម្ចាស់បទ "ស្រលាញ់បង ម្ដេចជ្រើសគេ" ចេះយល់ចិត្តខ្លួនគ្រប់បែបយ៉ាង ពេលនៅជាមួយគ្នា តែងតែធ្វើឲ្យនាងមានអារម្មណ៍ល្អ សប្បាយច្រើនជាងកើតទុក្ខ។៕