ម៉ារ៉ា ប៊ុណ្ណា ដឹកដៃអតីតអ្នកសារព័ត៌មានម្នាក់កាត់ចំណងដៃ បញ្ចប់ភាពនៅលីវយ៉ាងភ្ញាក់ផ្អើល

2019-01-17 03:05:00
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ម៉ារ៉ា ប៊ុណ្ណា បានបញ្ចប់ជីវិតនៅលីវរបស់ខ្លួនហើយ ដោយបានរៀបចំធ្វើពិធីកាត់ចំណងដៃកាលពីយប់មិញ នៅ Sky Bar ដោយមានអ្នកចូលរួមជាង១០០នាក់។

បើទោះមិនធ្លាប់លេចឮពីដំណឹងរៀបការ តែបែរជាផ្ទុះចេញនូវដំណឹងកាត់ចំណងដៃវិញ ត្រូវបានម្ចាស់បទ "ដីថ្លៃប្រល័យស្នេហ៍" ប្រាប់ថា ដោយសារតែលោកចង់រៀបចំកម្មវិធីទៅតាមលទ្ធភាព និងមិនចង់រំខានមិត្តសិល្បករច្រើន។ ជុំវិញ អត្តសញ្ញាណភរិយារបស់តារាចម្រៀងរូបនេះ មានឈ្មោះថា ផុន ដារ៉ានី ជាអ្នកភ្នំពេញ និងជាអតីតអ្នកសារព័ត៌មាននៅស្ថានីយទូរទស្សន៍មួយ។

ចំពោះចំណងស្នេហ៍វិញ លោក ម៉ារ៉ា ប៊ុណ្ណា ប្រាប់ថា តាមពិតអ្នកទាំងពីរបានស្គាល់គ្នាយូរឆ្នាំមកហើយ ប៉ុន្តែមិនដែលស្និទ្ធស្នាលគ្នាទេ។ ថ្ងៃមួយជួបគ្នាចៃដន្យនៅផ្សា អ្នកទាំងពីរក៏ចាប់ផ្ដើមស្គាល់គ្នាកាន់តែច្បាស់ ហើយរាប់អានគ្នា និងយល់ចិត្តគ្នាពីពេលនោះមក។

ដោយមើលចិត្តថ្លើមគ្នាអស់ពេលជាង២ ឆ្នាំ ទើបតារាចម្រៀងសម្បុរស្រអែមរូបនេះ សម្រេចប្រកាសរៀបចំពិធីនេះឡើង ចំនួន១០តុ ដោយចំណាយប្រាក់អស់ជាង៤ពាន់ដុល្លារ នៅ Sky Bar ក្នុងរាជធានីភ្នំពេញ។ លោកពេញចិត្ត ភរិយា ត្រង់អ្នកនាង ដារ៉ានី ជាមនុស្សឆ្លាត ចេះទុកដាក់លុយកាក់ ព្រមទាំងផ្ដល់តម្លៃ និងភាពជឿជាក់មកលើលោក ។

សម្រាប់ចំណងដៃបានពីពិធីនេះ ស្វាមីភរិយាមួយគូនេះ នឹងយកទៅជួយដល់កុមារកំព្រាដែលខ្វះខាតលើជីវភាព និងសម្ភារៈសិក្សា ផងដែរ៕