អាសូរនាយ ក្តឹប ត្រូវដឹកទៅព្យាបាលនៅថៃ ក្រោយសភាពជំងឺកាន់តែដុនដាប

2019-01-22 04:10:00
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាកំប្លែង នាយ ក្តឹប កាន់តែមានសភាពធ្ងន់ធ្ងរ រហូតក្រុមគ្រួសារសម្រេចដឹកតាមរថយន្ត ទៅព្យាបាលនៅប្រទេសថៃ ។

បើតាមលោក ហ៊ុយ ឧត្ដម ដែលជាអ្នកទទួលបន្ទុកកាន់ថវិកាពីសប្បុរសធម៌ក្នុងការព្យាបាលនាយ ក្តឹប បានប្រាប់ថា ភរិយារបស់តារាកំប្លែងរូបនេះ ឃើញសភាពជំងឺរបស់ប្ដីខ្លួន កាន់តែដុនដាបទៅៗ ដោយលោក មានជំងឺច្រើនមុខដូចជា ទឹកដក់ក្នុងសួត ទឹកនោមផ្អែម ដាច់សរសៃឈាមខួរក្បាល ខ្វះឈាមក្នុងបេះដូង ព្រមទាំងលើសឈាមថែមទៀត។

ក្រុមគ្រួសារ មិនមានថវិកាច្រើននោះទេ ដូច្នេះហើយ ភរិយាក៏សម្រេចពឹងលោក ឧត្ដម ដើម្បីបង្កើតមូលនិធិក្នុងការស្វែងរកថវិកាជួយនាយ ក្តឹប តាមរយៈលេខ២ខ្សែ គឺ ០៩៨ ៩៩ ៦៦ ៧៧ និង ០៦៨ ៨៨ ៦៦ ៧៧។ ប៉ុន្តែលោក បញ្ជាក់ថា គិតត្រឹមម៉ោងនេះ មិនទាន់ទទួលបានជំនួយពីសប្បុរសជននៅឡើយទេ ។

នៅក្នុងវីដេអូ Live ដែលក្រុមគ្រួសារបានបង្ហោះកាលពីម្សិលមិញ គេឃើញរាងកាយនាយ ក្តឹប កាន់តែទន់ខ្សោយទៅៗ ហើយលោក ព្រមទាំងភរិយា បានលើកដៃសំពះ សុំការជួយសង្គ្រោះពីសប្បុរសជនផងដែរ។ កន្លងមក តារាកំប្លែងរូបនេះ ធ្លាប់ទទួលបានជំនួយពីសប្បុរសជនផងដែរ តែសភាពជំងឺរបស់លោកមានអាការៈធ្ងន់ធ្ងរពេក ធ្វើឲ្យក្រុមគ្រួសាររ៉ាប់រងមិនរួច និងត្រូវការជំនួយបន្ថែម៕