Chris Brown ត្រូវបានឃាត់ខ្លួនជាថ្មី ពាក់ព័ន្ធរឿងប្រើប្រាស់ហិង្សា និងរំលោភសេពសន្ថវៈ

2019-01-23 02:02:00
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀង R&B Chris Brown ត្រូវបានប៉ូលិសឃាត់ខ្លួនក្នុងទីក្រុងប៉ារីស ដោយសង្ស័យពីបទរំលោភសេពសន្ថវៈ។

ស្ត្រីវ័យ ២៥ ឆ្នាំម្នាក់ បានធ្វើការចោទប្រកាន់តារាចម្រៀង Chris Brown ថាបានរំលោភរូបនាងកាលពីយប់ថ្ងៃទី ១៥ ខែមករាកន្លងទៅ នៅឯសណ្ឋាគារលំដាប់ផ្កាយ៥មួយនៅកណ្ដាលទីក្រុងនៃប្រទេសបារាំង។ តារាចម្រៀង Brown និងមនុស្ស ២នាក់ផ្សេងទៀត ដោយម្នាក់ជឿជាក់ថាជាអង្គរក្សរបស់លោក ស្ថិតក្នុងការឃុំខ្លួនបណ្ដោះអាសន្នក្នុងទីក្រុងប៉ារីសកាលពីម្សិលមិញនេះ ខណៈក្រុមប៉ូលិសកំពុងស្រាវជ្រាវ និងស៊ើបអង្កេតជុំវិញករណីរំលោភសេពសន្ថវៈ និងការប្រើប្រាស់គ្រឿងញៀន។

ជាមួយគ្នានេះដែរ តារាចម្រៀងរូបនេះ ត្រូវបានឲ្យដឹងថា បានទៅជួបជាមួយស្ត្រីរូបនោះក្នុងក្លឹបកម្សាន្តមួយជិតដងវិថី Champs-Elysees ហើយបាននាំនាងត្រលប់មកសណ្ឋាគារ Mandarin Oriental វិញ ដែលជាកន្លែងនាងចោទប្រកាន់រូបលោក និងអង្គរក្ស ថាបានប្រើប្រាស់អំពើហិង្សា និងរំលោភបំពានមកលើនាង។

បើតាមខាងអាជ្ញាធរបាននិយាយថា៖ "ស្ត្រីរូបនោះបានចោទប្រកាន់ Brown ថាបានរំលោភនាង ក្រោយពួកគេជួបគ្នាក្នុងក្លឹប Le Crystal។ នាងបាននិយាយថា នាងត្រឡប់ទៅសណ្ឋាគារ Mandarin Oriental វិញជាមួយស្រីៗផ្សេងទៀត រួមទាំងប្រុសៗ ៣នាក់ទៀតដែរ។ ក្រោយមកនាងក៏អះអាងថា Brown បានរំលោភបំពាននាង នៅពេលពួកគេទុកចោលឲ្យនៅតែពីរនាក់"។

ទោះជាយ៉ាងណាក៏ដោយ តារាចម្រៀងវ័យ ២៩ ឆ្នាំរូបនេះ ត្រូវបានដោះលែងដោយគ្មានបង់ពិន័យអ្វីទាំងអស់ ក្រោយក្រុមប៉ូលិសក្រុងប៉ារីសធ្វើការសាកសួរអស់រយៈពេល ២៤ ម៉ោងរួចមក។ទោះជាយ៉ាងនេះក្ដី បើតាមច្បាប់របស់ប្រទេសបារាំង ករណីមួយនេះនៅមិនទាន់បិទចោលនៅឡើយទេ ខាងក្រុមព្រះរាជអាជ្ញា បានបញ្ជាក់ថា ពួកគេនឹងនៅតែបន្តសាកសួរពីជនរងគ្រោះ និងព្យាយាមប្រមូលភស្តុតាងបន្ថែមទៀត៕

ប្រភព៖ Dailymail ប្រែសម្រួល៖ អន សុភក្ត្រា