វិធានការក្ដៅ ! ចៅហ្វាយក្រុងប៉ោយប៉ែតប្រកាសផាកពិន័យអ្នកបោះចោលសំរាមផ្តេសផ្តាស

2019-01-30 02:48:17
ចំនួនមតិ 0 | ចំនួនចែករំលែក 0

ចន្លោះមិនឃើញ

សាលាក្រុងប៉ោយប៉ែត ខេត្តបន្ទាយមានជ័យ បានប្រកាសផាកពិន័យចំពោះអ្នកបោះចោលសំរាមផ្តេសផ្តាសគ្មានសណ្ដាប់ធ្នាប់។ វិធានការក្តៅនេះ បានដាក់ចេញបន្ទាប់ពីក្រុមប្រឹក្សាក្រុង បានអនុម័តកាលពីពេលថ្មីៗនេះ ក្នុងទិសដៅធ្វើយ៉ាងណាឲ្យសោភ័ណភាពក្រុងប៉ោយប៉ែតកាន់តែមានសណ្ដាប់ធ្នាប់ ខណៈច្រកទ្វារអន្តរជាតិប៉ោយប៉ែតជាច្រកទ្វារសេដ្ឋកិច្ចដ៏សំខាន់។

លោក សាន ស៊ានហូ អភិបាលក្រុងប៉ោយប៉ែត

លោក សាន ស៊ានហូ អភិបាលក្រុងប៉ោយប៉ែត បានឲ្យដឹងថា ការដាក់ចេញវិធានការនេះជាការអនុវត្តតាមស្មារតី អនុក្រឹត្យលេខ ១១៣ អនក្រ.បក របស់រាជរដ្ឋាភិបាល ដែលនិយាយពីការផាកពិន័យ និងទណ្ឌកម្ម ក្នុងការចោលសំរាម ឱ្យកាន់តែមានប្រសិទ្ធភាព។ សាលាក្រុងនឹងផាកពិន័យចន្លោះពី ៣ម៉ឺនរៀលទៅ ៥ម៉ឺនរៀល ចំពោះជនណាបោះចោលសំរាមផ្ដេសផ្ដាស។

លោកបានបន្ថែមថា មុននឹងដាក់ចេញវិធានការផាកពិន័យសាលាក្រុងតែងធ្វើការផ្សព្វផ្សាយដល់ប្រជាពលរដ្ឋពីការទុកដាក់សំរាមឲ្យបានត្រឹមត្រូវតាមរយៈវេទិកាសាធារណៈ និងតាមវិទ្យុជាដើម។ “ដូច្នេះយើងនឹងព្យាយាម ជំរុញការងារឲ្យទទួលបានជោគជ័យ និងមានប្រសិទ្ធភាព។ ខ្ញុំឃើញបងប្អូនយើងចាប់ផ្ដើមយល់ដឹងច្រើនហើយទាក់ទងនឹងការទុកដាក់សំរាមនេះ”។

សកម្មភាពពេលចុះផ្សព្វផ្សាយកាលពីកន្លងមក

បន្ទាប់ពីមានសន្ទុះការអភិវឌ្ឍកើនឡើងសំរាមនៅ ក្រុងប៉ោយប៉ែតបានកើនឡើងរង្វង់ ១០០តោន ក្នុងមួយថ្ងៃ ខណៈឡានប្រមូលសំរាមបានបន្ថែមរហូតដល់ ១៥គ្រឿង។ លោក សាន ស៊ានហូ ឱ្យដឹងទៀតថា បច្ចុប្បន្នវិធានការគ្រប់គ្រងសំរាមហាក់បីដូចជាល្អប្រសើរច្រើន ប៉ុន្តែដើម្បីឱ្យក្រុងកាន់តែមានសណ្ដាប់ធ្នាប់ល្អត្រូវតែមានវិធានការផាកពិន័យ។

កន្លងមករាជធានីភ្នំពេញក៏បានប្រកាសផាកពិន័យចំពោះអ្នកបោះចោលសំរាមគ្មានសណ្ដាប់ធ្នាប់នេះដែរ ប៉ុន្តែមកដល់បច្ចុប្បន្នវិធានការហាក់បីដូចជាស្ងប់ស្ងាត់បច្ចុប្បន្ន។ កាលពី ខែ វិច្ឆិកា ឆ្នាំ២០១៥ រាជរដ្ឋាភិបាលកម្ពុជា បានដាក់ចេញនូវអនុក្រឹត្យថ្មីមួយ ស្ដីពី «ការគ្រប់គ្រងសំរាម សំណល់រឹង នៅទីប្រជុំជន» ដែលកំណត់ឲ្យមានការផាកពិន័យ ជាប្រាក់ចាប់ពី ១ម៉ឺនរៀល ទៅ២០ម៉ឺនរៀល និងប្ដឹងទៅតុលាការ ចំពោះជនណា ដែលចោលសំរាមមិនបានត្រឹមត្រូវ៕