នាយ ក្តឹប កាន់តែមានសង្ឃឹមអាចព្យាបាលនៅថៃម្តងទៀត ក្រោយសប្បុរជនបរិច្ចាគថវិកាបន្តបន្ទាប់

2019-02-01 03:25:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយពីត្រលប់មកពីប្រទេសថៃវិញ ដោយសារខ្វះថវិកាព្យាបាលជំងឺ ពេលនេះ តារាកំប្លែងរូបនេះ ចាប់ផ្ដើមមានសង្ឃឹមខ្លះៗហើយ ក្រោយពីមានសប្បុរសជនជាច្រើនបានបរិច្ចាគថវិកា ដើម្បីជូនលោកក្នុងការដោះស្រាយ ដែលត្រូវការប្រាក់ជាចាំបាច់។

បើតាមការបង្ហោះលើបណ្ដាញសង្គម លោក ហេង ឡុង បានបញ្ជាក់ថា មានសិល្បករនិងសប្បុរសជនច្រើននាក់ ព្រមទាំងមូលនិធិសិល្បករចាស់ជរាផង បានប្រមូលថវិកាសរុបគិតត្រឹមម្សិលមិញ ចំនួនទឹកប្រាក់ ២២លាន ៦០ម៉ឺនរៀល និង ៤២០ដុល្លារ។

ទឹកប្រាក់នេះ នឹងផ្ដល់ជូនតារាកំប្លែង នាយក្តឹប ក្នុងការព្យាបាលជំងឺ ដោយលោកធ្លាប់បានធ្វើដំណើរទៅប្រទេសថៃម្ដងរួចហើយ តែត្រូវត្រលប់មកវិញ ក្រោយពីពេទ្យថៃប្រាប់ថា ជំងឺលោកអាចត្រូវចំណាយលើសពី ១ម៉ឺនដុល្លារ ទើបមានសង្ឃឹម។

ដោយសារតែជីវភាពក្រ ហើយស្ថានភាពជំងឺកាន់តែដុនដាបៗ លោកដាច់ចិត្តអង្គុយនិយាយ តាមការ Live Video សុំការឧបត្ថម្ភពីសប្បុរសជនទាំងអស់ ទាំងសំដីខ្សាវៗ រាងកាយទន់ខ្សោយ យ៉ាងសង្វេគបំផុត ដោយមានអ្នកនាង ចន ច័ន្ទលក្ខិណា ប្រធានសមាគមសិល្បករ ជួយសម្របសម្រួលផងដែរ។ តារាកំប្លែងរូបនេះ រៀបរាប់ថា នៅសល់តែផ្ទះទេដែលលោកមិនទាន់លក់ ដើម្បីព្យាបាលជំងឺ តែបើជាពីជំងឺហើយពេលនោះគ្មានផ្ទះ តើឲ្យលោកទៅរស់នៅទីណា ។

គួររម្លឹកថា តារាកំប្លែងនាយ ក្តឹប មានជំងឺច្រើនមុខដូចជា ជំងឺស្ពោតសរសៃឈាមខួរក្បាល ទឹកចូលសួត និងជំងឺបេះដូងជាដើម៕

អត្ថបទ៖ លឹម សុនា