និស្សិតកម្ពុជា ៤រូបបានជយលាភីអ្នកវិទ្យាសាស្ត្រ និងវិស្វករវ័យក្មេងពីមូលនិធិជប៉ុន

2019-02-20 07:41:47
ចំនួនមតិ 0 | ចំនួនចែករំលែក 0

ចន្លោះមិនឃើញ

និស្សិតកម្ពុជា ៤រូប បានក្លាយជាជយលាភី ក្នុងកម្មវិធី ហុងដា សម្រាប់អ្នកវិទ្យាសាស្ត្រ និងវិស្វករវ័យក្មេងកម្ពុជា ឆ្នាំ២០១៨ ដោយម្នាក់ៗទទួលបាន ប្រាក់រង្វាន់ចំនួន ៣ ០០០ដុល្លារ ។ ការប្រគល់រង្វាន់ជយលាភីនេះធ្វើឡើងកាលពីចុងសប្ដាហ៍មុន នៅមជ្ឈមណ្ឌលសហប្រតិបត្តិការកម្ពុជា ជប៉ុន។

និស្សិតជយលាភីទាំង ៤រូប កញ្ញា សុខ សុធារតន៍ និស្សិតមកពីសាកលវិទ្យាល័យភូមិន្ទកសិកម្ម កញ្ញា កោះ សុម៉ាល័យ និស្សិតសាកលវិទ្យាល័យភូមិន្ទភ្នំពេញ យុវជន លី ប៊ុនថេង និស្សិតមកពីសាកលវិទ្យាល័យភូមិន្ទកសិកម្ម និងយុវជន សុង វែហ្សឺនីឡងឌី និស្សិតមកពីវិទ្យាស្ថានបច្ចេកវិទ្យាកម្ពុជា ។ និស្សិតទាំង ៤រូប បានប្រកួតប្រជែងលើការសិក្សាស្រាវជ្រាវទាក់ទងបច្ចេកវិទ្យាវិទ្យាសាស្ត្រ ដែលគិតគូរខ្ពស់ពីបរិស្ថាន។

មូលនិធិហុងដា ប្រទេសជប៉ុន បានលើកទឹកចិត្តឱ្យមានការប្រកួតប្រជែងផ្នែកអេកូតិចណូឡូជី នៅក្នុងតំបន់អាស៊ី និងបន្តផ្ដល់ចំណេះដឹងទៅដល់អ្នកជំនាន់ក្រោយៗទៀត។ មូលនិធិហុងដាបណ្ដុះបណ្ដាលនូវទំនាក់ទំនងដែលមានលក្ខណៈស៊ីជម្រៅក្នុងចំណោមអ្នកដឹកនាំនាពេលអនាគតក្នុងវិស័យវិទ្យាសាស្ត្រ បច្ចេកវិទ្យា និងឧស្សាហកម្មរវាងប្រទេសជប៉ុន និងប្រទេសនានាក្នុងតំបន់អាស៊ីអាគ្នេយ៍។

យុវជន សុង វែហ្សឺនីឡងឌី និស្សិតមកពីវិទ្យាស្ថានបច្ចេកវិទ្យាកម្ពុជាបានឱ្យដឹងថា កម្មវិធីប្រកួតប្រជែងនេះពិតជាមានសារៈសំខាន់បំផុត ដោយសារវាជាឱកាសមួយឱ្យនិស្សិតយកចំណេះដឹង ដែលខ្លួនរៀននៅសាលាមកអនុវត្ត ព្រមទាំងបង្កើននូវទំនុកចិត្តបន្ថែមចំពោះខ្លួនឯង។

ចំណែកកញ្ញា សុខ សុធារតន៍ បេក្ខជនម្ចាស់ជយលាភីមកពីសាកលវិទ្យាល័យកសិកម្ម ក្នុងគម្រោងចិញ្ចឹមជន្លេន បានឱ្យដឹងថា កម្មវិធីនេះពិតជាបានផ្ដល់ទាំងបទពិសោធន៍ ចំណេះដឹង និងភាពក្លាហាន។ កញ្ញាថា មូលហេតុដែលខ្លួនជ្រើសរើសគម្រោងចិញ្ចឹមជន្លេន ដោយសារប្រទេសកម្ពុជាយើងមានកាកសំណល់សរីរាង្គច្រើន។ ដូច្នេះពេលចិញ្ចឹមជន្លេនបាន យើងអាចយកជីកំប៉ុសប្រើប្រាស់លើដំណាំ ផ្ដល់ផលប្រយោជន៍ទាំងបរិស្ថាន និងបង្កើនសេដ្ឋកិច្ចដល់កសិករ។

បន្ថែមលើនេះ ឯកឧត្ដម ពិត ចំណាន រដ្ឋលេខាធិការក្រសួងអប់រំ បានឱ្យដឹងថា នេះជាកិត្តិយសមួយសម្រាប់និស្សិតកម្ពុជាទទួលបានជ័យជំនះ ដែលជាផ្នែកមួយជំរុញចំណេះដឹងលើផ្នែកវិទ្យាសាស្ត្រវ័យក្មេង ស្របជាមួយការគិតគូរពីបញ្ហាបរិស្ថាន។ ឯកឧត្ដម នេះជាចំណុចអាទិភាពមួយរបស់ក្រសួងអប់រំយុវជន និងកីឡា ដែលជំរុញឱ្យមានការប្រកួតប្រជែងផ្នែកវិទ្យាសាស្ត្រវ័យក្មេង។ ក្រសួងបានខិតខំរៀបចំទាំងគោលនយោបាយ កម្មវិធីសិក្សា និងវិធីសាស្ត្រ នៃការបង្រៀន។

កម្មវិធីហុងដាសម្រាប់អ្នកវិទ្យាសាស្ត្រ និងវិស្វករវ័យក្មេង បានចាប់ផ្ដើមនៅកម្ពុជា ក្នុងឆ្នាំ ២០០៨ ដោយគិតមកទល់ពេលនេះ និស្សិតកម្ពុជា ប្រមាណជិត ៥០នាក់ បានឈ្នះ និងទទួលប្រាក់រង្វាន់ពីកម្មវិធីនេះ៕