បើបងនៅតែ ឱបម្ដាយ បងទៅចុះ?

2019-03-27 03:20:14
ចំនួនមតិ 0 | ចំនួនចែករំលែក 0

ចន្លោះមិនឃើញ

«អាពាហ៍ពិពាហ៍ ដែលកើតឡើងអស់រយៈពេល ២ឆ្នាំមកហើយ ហើយក៏មានតំណក់ឈាមកូនប្រុសម្នាក់ទុកជាចំណងដៃក្ដី ប៉ុន្តែទំនាក់ទំនងគ្រួសារមួយនេះ ចេះតែមានភាពរកាំរកូសជានិច្ច។» អ្វីដែលនាំឲ្យគ្រួសាររកាំរកូសដោយសារតែភាគីខាងប្ដី នៅពេលរៀបការហើយ គឺនៅតែបន្តផ្ដល់លុយកាក់ច្រើនពេក ឲ្យទៅម្ដាយខ្លួនឯង ខណៈជីវភាពក្នុងគ្រួសារស្ទើរតែខ្វះខាត ព្រោះត្រូវចិញ្ចឹមកូនផង និងការបំពេញក្រពះផង។ ទាំងនេះជាការលើកឡើងរបស់ អ្នកស្រីឡានី ដែលជាឈ្មោះហៅក្រៅ ដែលអ្នកស្រីសុំលាក់អត្តសញ្ញាណ និងប្ដីឈ្មោះសុផល (ឈ្មោះហៅក្រៅ)។

រូបភាពតំណាង (ប្រភពរូប: kalingatv.com)

បច្ចុប្បន្ននេះ គ្រួសារទាំងពីររស់នៅក្នុងរាជធានីភ្នំពេញ ដោយរស់នៅជាមួយម្ដាយឪពុកខាងស្រី។ ចំណងអាពាហ៍ពិពាហ៍ដែលកើតឡើងដោយចិត្ត និងចិត្ត រវាងក្មេងៗគ្នាឯង បានក្លាយទៅជាការទទួលខុសត្រូវទាំងស្រុងទៅលើ អ្នកស្រី ឡានី។

“ខ្ញុំដឹងថា ខ្ញុំជ្រើសខុសតែខ្ញុំត្រូវតែទទួលខុសត្រូវរឿងនេះ "។ ឡានី វ័យ ២៨ឆ្នាំ ដែលជាបុគ្គលិកក្រុមហ៊ុនមួយនៅក្នុងរាជធានីភ្នំពេញ បានរៀបរាប់មកកាន់ Sabay ថា ចាប់តាំងពីនាងរៀបការមក មិនដែលចុះសម្រុងជាមួយប្ដីនោះទេ ព្រោះតែតាំងពីចាប់ដៃគ្នា គឺប្ដីប្រាក់ខែប្ដីមិនដែលឲ្យប្រពន្ធ ហើយក៏មិនដែលគិតគូរដល់កូននោះដែរ។

"ខ្ញុំមិនខឹងនឹងគាត់មិនឲ្យលុយខ្ញុំទេ តែខ្ញុំខឹងខ្លាំងណាស់នៅពេលខ្ញុំដឹងថា រាល់ពេលម្ដាយក្មេកត្រូវការលុយ គឺគាត់ឲ្យទៅម្ដាយគាត់រហូត"។ ឡានីនិយាយ។ "ខ្ញុំដឹងថា ម្ដាយគាត់មានការខ្វះខាត ប៉ុន្តែខ្ញុំតូចចិត្តខ្លួនឯងដែរ តាំងពីការមកគាត់ហាក់មិនដែលគិតគូរក្នុងគ្រួសារនោះទេ គឺគាត់គិតម្ដាយច្រើនជាងខ្ញុំ"។

នៅមុនពេលឡានី រៀបការជាមួយសុផល (ប្ដី) គឺសុផល ដែលជាកូនច្បងនៅក្នុងគ្រួសារក្នុងចំណោមបងប្អូនប្រុសស្រីចំនួន ៤នាក់ ហើយក៏ជាអ្នកទទួលរ៉ាប់រងខ្ពស់ដែរ នៅក្នុងគ្រួសារ ខណៈម្ដាយ-ឪពុកសុផលចូលនិវត្តន៍ ហើយនៅតែផ្ទះ ដូច្នេះអ្វីៗ គឺធ្លាក់បន្ទុកច្រើនទៅលើសុផល។

សុផល ដែលជាមន្ត្រីរាជការ ដែលបានប្រាក់ខែតិចតួច និងបានរកការងារឯកជនក្រៅធ្វើ ក៏មិនបានផ្ដល់ប្រាក់នោះមកឲ្យប្រពន្ធដែរ គឺផ្ទុយទៅវិញបានផ្ដល់ប្រាក់ទាំងនោះ ទៅឲ្យម្ដាយខ្លួន។

“ខ្ញុំនិយាយពិតទៅគឺប្ដីខ្ញុំពេលការហើយបាន ៣ខែដំបូង គាត់ឲ្យប្រាក់ខែខ្ញុំដែរ តែឲ្យបានតែ១អាទិត្យអីហ្នឹង គាត់យកប្រាក់នោះទៅវិញអស់ហើយ"។ ដូច្នេះហើយខ្ញុំខឹងគាត់ ក៏បានប្រាប់គាត់ថា ប្រសិនបើឲ្យហើយយកវិញ គឺមិនចាំបាច់ឲ្យនោះទេ។ ដូច្នេះតាំងពីថ្ងៃនោះមក គាត់លែងឲ្យខ្ញុំមែន។

"តែឥឡូវខ្ញុំមានកូន ខ្ញុំត្រូវការប្រាក់សម្រាប់ចិញ្ចឹមកូន គាត់នៅតែមិនរវល់"។ ដោយសារតែភាពមិនរវីរវល់របស់ប្ដីនោះ ឡានី បានសម្រេចចិត្តនិយាយរឿងរ៉ាវទាំងនេះជាមួយប្ដី ហើយក៏បានទៅជួបជាមួយម្ដាយក្មេក ឪពុកក្មេកម្ដងជាពីរដង។ ប៉ុន្តែនៅទីបំផុតប្ដីគាត់នៅតែកាន់ជើងខាងម្ដាយក្មេក និងឪពុកក្មេក។ បន្ថែមលើនេះ ប្ដីឡានី បានខឹងនឹងឡានីថែមទៀត។

ទោះបីជាយ៉ាងណាក៏ដោយ ឡានី បាននិយាយប្រាប់ Sabay ដោយភាពម៉ឺងម៉ាត់ថា "ខ្ញុំអស់ចិត្តហើយ បើមានប្ដីហើយ ប្ដីមិនយល់ចិត្ត ដូច្នេះខ្ញុំសុខចិត្តអត់មានប្ដីល្អជាង"។ ឥឡូវនេះ ខ្ញុំឈ្លោះជាមួយគាត់ (ប្ដី) ប៉ុន្តែខ្ញុំនៅរួមរស់ជាមួយគ្នានៅឡើយទេ ប៉ុន្តែខ្ញុំទុកពេលឲ្យគាត់ ប្រសិនបើគាត់ (ប្ដី) នៅតែមិនផ្លាស់ប្ដូរគំនិតនោះទេ គឺខ្ញុំសម្រេចចិត្តលែងលះជាមួយគាត់ហើយ"។

ខ្ញុំបានប្រាប់ប្ដីថា "បើបងនៅតែឱបម្ដាយ បងទៅចុះ"។ ឡានីក៏បានដាក់ជាសំណួរថា តើខ្ញុំធ្វើបែបនេះខុសដែរទេ?

ប្រសិនបើប្រិយមិត្តមានរឿងរ៉ាវស្នេហា អាចទំនាក់ទំនងទំនងមកកាន់៖