ពេលរៀបការហើយ ខ្ញុំដើរដល់ម៉ោង១២យប់ ខុសអត់?

2019-03-28 04:09:04
ចំនួនមតិ 0 | ចំនួនចែករំលែក 0

ចន្លោះមិនឃើញ

“ប្ដីខ្ញុំខឹងខ្ញុំ ព្រោះតែពេលខ្លះខ្ញុំចូលផ្ទះយប់ដល់ម៉ោង១២យប់”។ ទាំងនេះកើតចេញពីរឿងរ៉ាវក្នុងគ្រួសារមួយដែលមានចំណងអាពាហ៍ពិពាហ៍ ៥ឆ្នាំមកហើយ ប៉ុន្តែទ្រនំគ្រួសារមួយនេះតែងតែមានទំនាស់នឹងគ្នាព្រោះតែមិនយល់ចិត្តគ្នាទៅវិញទៅមក។

អ្នកស្រី ម៉ាលី (ឈ្មោះហៅក្រៅ) អាយុ២៩ឆ្នាំ ប្រធានអង្គការកុមារកំព្រាមួយ បានរៀបរាប់ប្រាប់ Sabay ថា ជីវិតគ្រួសាររបស់ខ្ញុំមិនសូវជាល្អនោះទេ ព្រោះតែខ្ញុំរវល់នឹងការងារហើយមានពេលខ្លះធ្វើការ ដល់យប់ម៉ោង ៨ ទៅ៩យប់ និងម្ដងម្កាលគេមានពិធីជប់លៀង ហើយត្រូវទៅរាំរែករហូតដល់ម៉ោង១២យប់ ប៉ុន្តែប្ដីខ្ញុំគាត់តែងតែរករឿង។ “គាត់ចង់លែងលះជាមួយខ្ញុំ”។ តើខ្ញុំត្រូវធ្វើដូចម្ដេចទៅ មួយជាប្ដី មួយជាការងារដែលខ្ញុំស្រឡាញ់?

សូមបញ្ជាក់ នេះជារូបតំណាង ប៉ុណ្ណោះ

“ខ្ញុំដឹងថាបើតាមប្រពៃណីខ្ញុំខុស ប៉ុន្តែប្រសិនបើសម័យឥឡូវប្ដីគួរតែមានការយោគយល់ ខ្លះសម្រាប់ស្ត្រីដើម្បីមានឱកាសធ្វើការងារផ្សេងៗ ស្របតាមគោលនយោបាយរបស់រាជរដ្ឋាភិបាលលើកកម្ពស់វិស័យយេនឌ័រនៅកម្ពុជា”។ នេះជាការលើកឡើងរបស់បងស្រីម៉ាលី។ អ្នកស្រីម៉ាលីបាននិយាយថា “ខ្ញុំបានចំណាយពេលច្រើនសម្រាប់ក្មេងៗនៅក្នុងមណ្ឌល ដូចជា ការបង្រៀនអក្សរ, លេងកីឡា, និងសរសេររបាយការណ៍ផ្សេងៗជាដើម"។

នៅពេលយប់ប្រមាណជាម៉ោង៨ ទៅ៩យប់ គឺទៅស្វែងរកមើលក្មេងៗអនាថា តាមភោជនីយដ្ឋាន និងតាមមាត់ទន្លេ ដើម្បីរកក្មេងដែលចង់មកនៅជាមួយអង្គការ ហើយពេលខ្លះក៏មានកម្មវិធីជប់លៀងនានាដោយមានជនបរទេសច្រើនហើយត្រូវចូលបារម្ដងម្កាលរហូតដល់ម៉ោង១២យប់។ ដូច្នេះហើយប្ដីខ្ញុំគាត់ខឹង ហើយបានរករឿងខ្ញុំស្ទើរគ្រប់ពេល។ គាត់តែងចោទខ្ញុំថា “ខ្ញុំគ្មានពេលសម្រាប់គ្រួសារ គ្មានពេលមើលកូននោះទេ”។

តែតាមពិតទៅអ្វីទាំងនេះខ្ញុំបានធ្វើរួចហើយមុននឹងចេញទៅធ្វើការ។ នៅពេលព្រលឹមស្រាងៗខ្ញុំបានរៀបចំម្ហូបអាហារពេលព្រឹកសម្រាប់កូនប្រុស២នាក់ (កូនបងអាយុ៧ឆ្នាំ និងប្អូនអាយុ៤ឆ្នាំ) និងប្ដី ព្រមទាំងបានជូនកូនៗទៅសាលារៀន បន្ទាប់មកខ្ញុំបានទៅទទួលយកពួកគេពីសាលារៀន មកដាក់នៅកន្លែងធ្វើការជាមួយ រហូតដល់ពេលយប់ទើបយកពួកគេមកផ្ទះវិញជាមួយគ្នា។

“ខ្ញុំទទួលស្គាល់ថា ពេលខ្លះខ្ញុំពុំសូវមានពេលវេលាទំនាក់ទំនងជាមួយប្ដី ប៉ុន្តែនៅថ្ងៃសៅរ៍អាទិត្យខ្ញុំមានពេលច្រើនសម្រាប់ ប៉ុន្តែពេលខ្លះប្ដីរវល់ការងារគាត់វិញ”។ ប្ដីម៉ាលី គឺជាបុគ្គលិកបើកឡាន ដឹកទំនិញឲ្យក្រុមហ៊ុនមួយ ហើយត្រូវមានបេសកកម្មចុះខេត្ត មិនថាថ្ងៃសៅរ៍ អាទិត្យនោះទេ។ តើខ្ញុំគ្មានពេលវេលាសម្រាប់ប្ដី ឬប្ដីគ្មានពេលសម្រាប់ខ្ញុំ? អ្នកស្រីម៉ាលី តែងតែសួរសំណួរនេះ នៅពេលប្ដីគាត់ប្រតិកម្មដោយប្រើពាក្យថា "អូនឯងគិតតែពីការងារ ហើយដើរយប់ៗ តើសមទេខ្លួនយើងជាស្រី"។

តាមពិតទៅខ្ញុំដឹងថា ប្ដីខ្ញុំស្រឡាញ់ខ្ញុំ ហើយក៏ដឹងដែរថា ខ្ញុំជាអ្នកមើលថែកូនបានល្អ និងបានទទួលខុសត្រូវចំពោះកិច្ចការផ្ទះ ប៉ុន្តែអ្វីដែលគាត់ខឹងខ្ញុំ ដោយសារតែខ្ញុំធ្វើការជ្រុលដល់យប់។ ប៉ុន្ដែខ្ញុំបានព្យាយាមប្រាប់គាត់ថា "ការងារនេះថ្មីសម្រាប់ខ្ញុំ ហើយខ្ញុំត្រូវព្យាយាមចូលរួមជាមួយជនបរទេសទាំងនោះ ក្រោយមកខ្ញុំ នឹងបែងចែកពេលវេលាសម្រាប់គ្រួសារហើយ"។

គ្រប់យ៉ាងខ្ញុំស្រឡាញ់ប្ដី ស្រឡាញ់គ្រួសារ និងស្រឡាញ់ការងារ ប៉ុន្តែពេលនេះខ្ញុំត្រូវធ្វើម៉េចបើប្ដីខ្ញុំខឹងខ្ញុំ ព្រោះតែខ្ញុំធ្វើការដល់យប់។ ស្ថានភាពជីវភាពមិនសូវជាល្អប៉ុន្មាននោះទេ បើខ្ញុំអត់មានការងារតើប្ដីអាចរ៉ាប់រងជីវភាពគ្រួសារបានទេ? ខ្ញុំធ្វើការដល់យប់ពេលខ្លះនោះ ខ្ញុំមិនដែលមានគំនិតក្បត់ប្ដីនោះទេ តែប្ដីតែងតែប្រចណ្ឌខ្ញុំ តើខ្ញុំត្រូវធ្វើដូចម្ដេច? យូរៗម្ដងធ្វើការដល់ម៉ោង១២យប់ខុសដែរ ឬយ៉ាងណា?

ប្រសិនបើ ប្រិយមិត្ត មានបញ្ហាស្នេហា ដែលចង់ចែករំលែកដល់មិត្តអ្នកអានបានជាបទពិសោធន៍ ឬជួយជាយោបល់ក្នុងការដោះស្រាយសូមផ្ញើអត្ថបទរឿងរ៉ាវពិតរបស់ អ្នកមកកាន់៖