ចោលជិត ១០ឆ្នាំហើយ ឥឡូវត្រឡប់មកច្រៀងវិញ ស្រាប់តែ ចាន់ សម័យ និយាយថា...

2019-04-30 01:47:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ត្បិតថា លោក ចាន់ សម័យ ជាតារាចម្រៀងពេញនិយមក្នុងសម័យស្នេហា៤ដួង ឬ "F4” ដូច្នេះហើយ ក្នុងពេលលោក បានវិលត្រឡប់មកកាន់សិល្បៈចម្រៀងវិញ ក្រោយពីបាត់មុខឈឹងប្រមាណជិត ១០ឆ្នាំនោះ មានសំណួរថា តើលោកនឹងល្បីល្បាញឡើងវិញឬទេ?

ក្រោយពីកម្សត់អស់ពេលជិត ១០ឆ្នាំ លោក ចាន់ សម័យ បានវិលចូលសិល្បៈចម្រៀងវិញ ដោយត្រូវផលិតកម្មក្នុងស្រុកមួយផ្ដល់ឱកាសឲ្យលោក នោះគឺផលិតកម្ម Galaxy របស់ឧកញ៉ា ឡេង ណាវ៉ាត្រា។ នៅក្នុងដំណើរវិលត្រឡប់មកវិញនេះ ម្ចាស់បទ "សុំមេមាន់១" ទើបបានបញ្ចេញបទផ្ទាល់មួយបទជាចង្វាក់តាលុង មានចំណងជើងថា "បាត់ស្រីទៅណា"។

លោក ចាន់ សម័យ បានបញ្ជាក់ថា លោករីករាយជាមួយនឹងឱកាសថ្មីនេះ ដោយមិនដែលនឹកស្មានថា នឹងអាចទទួលបានសារជាថ្មីនោះទេ ក្នុងនោះថែមទាំងគ្រោងនឹងចេញបទចម្រៀងថ្មីបន្តបន្ទាប់ទៀតផង ដោយមានការគាំទ្រពីផលិតកម្ម។ បែបនេះក្ដី ជុំវិញការលើកឡើងថាតើ ការវិលត្រឡប់របស់លោកនេះ អាចនឹងធ្វើឲ្យទទួលបានភាពល្បីល្បាញឡើងវិញឬយ៉ាងណានោះ។ លោកថាឆ្លើយថា មិនហ៊ានអះអាងមុនទេ។

លោកមិនហ៊ាននិយាយពីបញ្ហានេះ ព្រោះថា ពេលលោកមានវ័យជ្រេបន្តិចទៅហើយ ហើយកាលៈទេសៈពេលនេះ ក៏មិនដូចកាលពីជាង ១០ឆ្នាំមុននោះដែរ។ "ខ្ញុំមិនហ៊ាននិយាយមុនទេរឿង ទុកឲ្យបងប្អូនអ្នកស្ដាប់វាយតម្លៃទៅចុះ ម្យ៉ាង ឥឡូវអ្នកចម្រៀងយើងឥឡូវ ក៏ច្រើនជាងមុនទៅទៀត អីចឹងហើយខ្ញុំមិនហ៊ាននិយាយមុននោះទេ"។ លោក បន្តថា អ្វីដែលលោកអាចធ្វើបាននាពេលនេះ គឺប្រឹងប្រែងឲ្យអស់លទ្ធភាព។

លោក ចាន់ សម័យ បានចូលច្រៀងឲ្យផលិតកម្ម Galaxy ប្រមាណ២ខែមុនចូលឆ្នាំ ក្នុងរយៈពេលខ្លះ លោកបានចេញបទចម្រៀង២បទរួចហើយ សុទ្ធជាចង្វាក់ប្រជាប្រិយខ្មែរ។ តាមការអះអាង លោកថា បន្ទាប់ពីចូលឆ្នាំរួច លោកនឹងមានបទមួយចំនួនទៀតចេញកំដរប្រិយមិត្តអ្នកគាំទ្រ ទុកស្ដាប់កម្សាន្ត។ បច្ចុប្បន្ន ថ្នាក់ដឹកនាំកំពុងរៀបចំស្ទូឌីយ៉ូ ដោយគ្រោងនឹងនាំចូលឧបករណ៍ទំនើបៗទាំងអស់។

បទចម្រៀងទាំងនោះ លោកថា មានច្រើនទម្រង់ ទាំងប្រភេទបទសម័យ ប្រជាប្រិយ និងញាក់ជាដើម។ លោក ចាន់ សម័យ បានចូលសិល្បៈ តាំងពីឆ្នាំ ៩០ ហើយល្បីខ្លាំងអំឡុងឆ្នាំ ២០០០-២០០៣។ បន្តនោះមកមិនប៉ុន្មាន លោកក៏បានបាត់មុខឈឹង ដោយគ្មានមូលហេតុ។ ទើបតែពាក់កណ្ដាលឆ្នាំ ២០១៨ ស្រាប់តែបែកធ្លាយព័ត៌មានលោកមានជីវភាពក្រខ្សត់រហូតដល់ដើរស្ទូចត្រីលក់ចិញ្ចឹមប្រពន្ធ និងកូន។

បន្ទាប់ពីនោះមក លោកក៏បានទទួលការយកអាសាពីមិត្តរួមអាជីព និងថ្នាក់ដឹកនាំរាជរដ្ឋាភិបាល ធ្វើឲ្យជីវិតរបស់លោកមានរស្មីម្ដងទៀត។ ពិសេសបានវិលមកច្រៀងសារជាថ្មី ទាំងមិននឹកស្មាន។ លោក ចាន់ សម័យបានទៅច្រៀងនៅក្រៅប្រទេសពីរលើករួចមកហើយ បន្ទាប់ពីវិលមកកាន់សិល្បៈជាថ្មី។ លើកទី១ លោកបានទៅច្រៀងនៅប្រទេសបារាំងកាលពីអំឡុងខែកក្កដា ២០១៨។ លើកទី២ លោកបានទៅច្រៀងនៅប្រទេសកូរ៉េក្រោយបុណ្យចូលឆ្នាំខ្មែរតែប៉ុន្មានថ្ងៃប៉ុណ្ណោះ៕

អាន៖ ច្បាស់ការណ៍ ថ្ងៃ ឱក សុគន្ធកញ្ញា និងម្ចាស់ចិត្តដឹកដៃគ្នាចូលរោងជ័យ

អាន៖ ធ្វើអីចឹង សារ៉ាយ សក្ខណា ធ្វើបាបចិត្តអ្នកដេកផ្ទះហ្មង .

អត្ថបទ៖ ស៊ុន ហួត