គួរឲ្យសរសើរ តារាល្បីៗរួមគ្នាផ្សាយលក់សៀវភៅ "ពេលវេលា"

2019-05-02 08:28:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយស្នាដៃថ្មីជិតចេញផ្សាយឆាប់ៗនេះសម្រាប់ប្រិយមិត្តអ្នកនិយាយអានសៀវភៅ ប្រភពពី "តម្រា" បានឲ្យដឹងថា សៀវភៅបំផុសគំនិត បង្កប់ខ្លឹមសារល្អ សម្រាប់ការប្រើប្រាស់ពេលវេលាក្នុងជីវិតពិត ដែលមានចំណងជើង "ពេលវេលា" ទទួលបានការចូលរួមផ្សព្វផ្សាយលក់ដោយតារាល្បីៗខែក្រោយនេះ ក្នុងគោលបំណង លើកកម្ពស់ការអាន និងផ្ដល់ប្រយោជន៍បង្កើនគុណភាពជីវិត។

លោក ជីព ចិត្ត សមាជិកគណៈកម្មការកំណែ និងជ្រើសរើសរបស់ "តម្រា"បានឲ្យដឹងមុននេះបន្តិចថា សៀវភៅនេះ (ពេលវេលា) ជាប្រភេទសៀវភៅបំផុសគំនិត ដែលមានមាតិកាធំៗដូចជា ប្រើពេលវេលាឲ្យមានសុពលភាព ប្រើពេលវេលាដូចមហាសេដ្ឋី មនុស្សប្រភេទណាគួរចំណាយពេលជាមួយ ពេលវេលា១០ឆ្នំាមួយជុំៗ គួរបានសម្រេចផលអ្វីខ្លះ។ល។ លោកថាបើមិនមានអ្វីកែប្រែសៀវភៅប្រមាណ១៥០ទំព័រនេះនឹងចេញលក់ខែឧសភា ក្នុងតម្លៃ ៦ដុល្លារ ឬ ២៥ ០០០រៀល។

“នេះជាសៀវភៅដែលសរសេរដោយ អ្នកស្រី ម៉ីសន សុធារី ដែលមានទស្សនៈ និងការបំភ្លឺដ៏ល្អជាពិសេសសម្រាប់យុវវ័យ។ ហើយយើងបានការចូលរួមជួយលក់ពីតារាល្បីៗច្រើនណាស់ ដូចជា វីយ៉ារ៉ូ រតនៈ វិសិដ្ឋ ហង្ស ម៉ារិនី សាឡាត់ ស្រីឡាង ទេពកញ្ញានិងពុធស្រីខួច។ល។”

ឆ្លើយតបនឹងប្រធានបទខាងលើ អ្នកនិពន្ធបានប្រាប់Sabayតាមទូរសព្ទថាការស្វែងរកការចូលរួមពីបុគ្គលល្បីៗក្នុងវិស័យសិល្បៈគឺជាវិធីសាស្ត្រល្អមួយប្រសិនបើតារាទាំងនោះគាត់មានជំនឿដូចយើង ហើយជឿថាការអានជារឿងល្អ។ ”បងជជែកជាមួយតារាច្រើននាក់ដែរអូន...បងព្យាយាមពន្យល់ ហើយសុំឲ្យគាត់ជួយ ណាមួយបងក៏ដឹងថា ការងារសិល្បៈរវល់វីវក់ណាស់ គឺរវល់ច្រើនមែនទែនបើតាមបងដឹង...ហើយការបែងចែកពេលរវល់របស់ពួកគាត់ គឺមិនមែនដោយសាររឿងលុយកាក់ទេ ព្រោះលុយលក់សៀវភៅគឺបានតិចមែនទែន...តែគាត់ជួយ ចង់ឲ្យបងប្អូនកាន់សៀវភៅអានកាន់តែច្រើន”។

អ្នកនិពន្ធរូបនេះធ្លាប់បានទទួលជោគជ័យរួចមកហើយក្នុងការធ្វើការផ្សព្វផ្សាយជាមួយតារាល្បីៗ នាពេលបច្ចុប្បន្នដូចជា ឌីជេណាណា និង ហង្ស ម៉ារិនី។ អ្នកស្រីបន្តដូច្នេះថាទោះបីយ៉ាងណា ខ្លួនមិនដែលហាមឃាត់តារាទាំងនោះក្នុងការជួយលក់អ្នកនិពន្ធផ្សេងទេ ដោយពន្យល់ថា អ្នកនិពន្ធទាំងអស់មានចំណុចរួមគ្នាមួយ គឺចងក្រងគំនិត និងទស្សនៈល្អ បញ្ចូលជាសៀវភៅ ហើយចង់ឲ្យមហាជនអានដើម្បីជាប្រយោជន៍ និងជួយបង្កើនចំណេះដឹងក្នុងការងាកមកចាប់យកការអានសៀវភៅ។

“គ្នាជួយលក់យើងព្រោះគេចង់ជួយរួមចំណែកលើកតម្កើងការអាន និងតែងនិពន្ធមិនថាអ្នកនិពន្ធណាទេ គ្រប់គ្នាកំពុងជួយវិស័យនេះ! តាមគម្រោង "តម្រា" នឹងចេញសៀវភៅទីពីររបស់ខ្លួនឈ្មោះថា “ពេលវេលា” បន្ទាប់ពីទទួលបានជោគជ័យក្នុងការលក់សៀវភៅទីមួយរឿង “អាគមបរព្រៃ”។ ចំពោះផែនការដាក់សម្ពោធគម្រោង "តម្រា" នេះជាផ្លូវការ លោក ជីព ចិត្ត បញ្ជាក់ថា ពេលសៀវភៅទីបីចេញផ្សាយ មានចំណងជើងថា “បឹងអតីត” ដែលជាប្រលោមលោកមនោសញ្ចេតនាដ៏អស្ចារ្យមួយបន្ថែមទៀតសម្រាប់អ្នកអានបន្ទាប់ទៀតផងដែរ៕