កាល​ពី​រសៀល​ម្សិលមិញ​នេះ របាយការណ៍​ពី​លទ្ធផល​ផ្លូវ​ការ​នៃ​ពិព័រណ៍​លំនៅ​ដ្ឋាន​ប្រចាំ​ឆ្នាំ រយៈពេល ២ថ្ងៃនៅ​កោះ​ពេជ្រ ដែល​ធ្វើ​ឲ្យ​កក្រើក​កាល​ពី​ចុង​សប្តាហ៍​មុន ​បាន​ចេញ​ជា​សាធារណៈ​ហើយ​ ដោយ​​មាន​​ចំនួន​អ្នក​ចូល​រួម​ទស្សនា​ច្រើន​ជាង​ ២ម៉ឺន​នាក់ និង​មាន​គម្រោង​ធំៗ​ ជា​ច្រើន​ត្រូវ​បាន​លក់​ដាច់​ក្នុង​ពិព័រណ៍​នេះ​។ នេះ​បើ​តាម​ការ​ប្រកាស​ឲ្យដឹង​ពី​ លោក Tom O’Sullivan អគ្គនាយក​ក្រុមហ៊ុន Realestate.com.kh ដែល​ជា​អ្នក​រៀប​ចំ​ព្រឹត្តិការណ៍​ពិព័រណ៍​លំនៅ​ដ្ឋាន២០១៩ ឬ Home & Lifestyle Expo 2019។

លោក​បាន​បន្ត​ថា៖ «ពិព័រណ៍​លំនៅ​ដ្ឋាន​ឆ្នាំ​នេះ ពិត​ជា​ទទួល​បាន​លទ្ធផល​ជា​ផ្លែផ្កា​លើស​ពី​ការ​រំពឹង​ទុក។ វា​លេច​ចេញ​ពី​ការ​ចូលរួម​របស់​ទាំងអស់​គ្នា​ដែល​មាន​វត្តមាន​ក្នុង​ឱកាស​នោះ ជាមួយ​ការ​ផ្តល់​ជូន​ប្រូម៉ូសិន និង​ការ​បញ្ចុះ​តម្លៃ​ធំ​ៗ​ប្រចាំ​ឆ្នាំ ទើប​ជំរុញ​ឲ្យ​យើង​ទទួល​បាន​លទ្ធផល​ដ៏​ប្រពៃ​នេះ»។

«លំនៅដ្ឋាន​តម្លៃ​សមរម្យ គឺ​ជា​ការ​ផ្ដោត​សំខាន់​ក្នុង​ពិព័រណ៍​នេះ ដូច្នេះហើយ​វា​មិន​មែន​ជា​រឿន​គួរ​ឲ្យ​ភ្ញាក់​ផ្អើល​នោះ​ទេ ដែល​មាន​បង​ប្អូន​ខ្មែរ​យើង​ជីវភាព​មធ្យម​បាន​អញ្ជើញ​ចូល​រួម​ច្រើន។ ជាក់ស្តែង ចំនួន​អ្នក​ចូល​រួម​​ពាក់​កណ្តាល គឺ​ជា​អ្នក​ក្នុង​ស្រុក»។ លោក​បញ្ជាក់​បន្ថែម។

តោះ! មើល​របាយការណ៍​ចេញ​ក្តៅ​ៗពី​លទ្ធផល​ នៃ​ពិព័រណ៍​លំនៅ​ដ្ឋាន ២០១៩ ​ដូច​ខាង​ក្រោម ៖​

• Urban Village គឺ​ជា​គម្រោង​ដែល​មាន​ទីតាំងនៅ ចាក់អង្រែលើ បាន​ទាក់ទាញ​បាន​ការ​ចាប់​អារម្មណ៍យ៉ាង​​ខ្លាំង​ពី​មហាជន​ក្នុង​ពិព័រណ៍​នេះ ដែល​បាន​ប្រកាស​ថា​លក់ដាច់​ដល់​ទៅ ៤០យូនីត សរុប​ជា​ទឹក​ប្រាក់​ប្រមាណ ៣.៥លានដុល្លារ ។​​

• Arata Garden Residences គឺជា​គម្រោង​លំនៅ​ដ្ឋាន​របស់​Creed Group បាន​ប្រកាស​ថា​លក់ដាច់​
  ១២ ផ្ទះ​ក្នុង​តម្លៃ​មធ្យម ដែល​ផ្ទះ​មួយ​មាន​តម្លៃ​ប្រមាណ ១០០,០០០ដុល្លារ ។

• ភ្នាក់​ងារ​អចល​ទ្រព្យ​អន្តរជាតិ (Top International Agent) បាន​ចុះ​ហត្ថលេខា​លើ​ការ​លក់​ចំនួន ៨ក្នុង​កម្មវិធី​ដែល​មានតម្លៃ​ជាង ៦០០០០ដុល្លារ។

• Worldbridge Homes បាន​បង្កើត​កំណត់​ត្រា​ខ្ពស់​ក្នុង​កំឡុង​ពេល​ពិព័រណ៍​ផង​ដែរ ជា​មួយ​ការ​លក់​ដាច់​អចលនទ្រព្យ​ចំនួន ៩​ សរុប​តម្លៃ​ជាង ២៥០,000 ដុល្លារ ។​

• ភ្នាក់ងារ​អចលនទ្រព្យ​ក្នុងស្រុក Pointer Property ក៏​រំជើបរំជួល​​ជាមួយ​កំណត់​ត្រា​លក់​ដាច់​ចំនួន​៤ ដែល​អចលនទ្រព្យ​មួយ​មាន​តម្លៃ​ប្រមាណ ៧០០០០ដុល្លារ ។

• 7 Residence បង្កើត​កំណត់​ត្រា​លក់​ដាច់​តែ​មួយ​មែន​ពិត តែ​មាន​តម្លៃ​ដល់​ទៅ​កន្លះ​លាន​ដុល្លារ។

• ក្រៅ​ពី​នេះ ទីផ្សារ​ថ្មី​ក៏​មាន​សញ្ញាណ​វិជ្ជមាន​ខ្លាំង​ណាស់​ដែរ សម្រាប់​ Lifestyle ដូចជា​ PHMK  Real Estate, Capital Partners, Bred Bank, Royal Platinum, Air Apartmenថts, Ohana Home Japan, La Bassac, RHB Bank, and Snowbell Hot។​

• រថយន្ត NISSAN ក៏​បាន​រក​ឃើញ​ម្ចាស់​រថយន្ត​ទំនើប​តម្លៃ ៥០០០០ដុល្លារម្នាក់ក្នុង​ពិព័រណ៍​នេះ​ដែរ ខណៈ​ Honda លក់​ដាច់​ម៉ូតូ ៤គ្រឿង​ដោយ​មួយ​មានតម្លៃ ៣០០០ដុល្លារ។

• ក្រុមហ៊ុន​គ្រឿង​សង្ហារិម សម្រេច​បាន​ការ​លក់​ ៨ក្នុងអំឡុង​ពិព័រណ៍​ ដែល​មាន​តម្លៃ​សរុប​ជាង ១០០0០ដុល្លារ។

តួ​លេខ​ពី​ការ​លក់​នៅ​តែ​ហូរ​ចូល​ពី​ព្រឹត្តិការណ៍​ដ៏​ធំ​នេះ​។ ទោះ​ជា​យ៉ាង​ណា​ក៏​ដោយ​ក្រុមហ៊ុន Realestate.com.kh សង្ឃឹម​ថា​នឹង​ឡើង​លើស​កំណត់​ត្រា​ពី​ព្រឹត្តិការណ៍​មុន​របស់​ខ្លួន​ដែល​បាន​បង្កើត​ចំណូល​ប្រហែល​៣០ លាន​ដុល្លារ៕

អត្ថបទ៖ លីដា