ទិវាសិទ្ធិកុមារឆ្នាំនេះ លើកឡើងប្រធានបទ លើកកម្ពស់សិទ្ធិកុមារតាមរយៈការលុបបំបាត់អំពើហិង្សាគ្រប់ប្រភេទលើកុមារ

2019-05-27 08:02:02
ចំនួនមតិ 0 | ចំនួនចែករំលែក 0

ចន្លោះមិនឃើញ

រាជរដ្ឋាភិបាលកម្ពុជាគ្រោងរៀបចំពិធីអបអរសាទរខួបលើកទី៧០ នៃទិវាសិទ្ធិកុមារ អន្តរជាតិនៅថ្ងៃ ទី១ ខែមិថុនា ខាងមុខនេះ ក្រោមប្រធានបទលើកកម្ពស់សិទ្ធិកុមារតាមរយៈការលុបបំបាត់អំពើហិង្សាគ្រប់ប្រភេទលើកុមារ។

ទិវាសិទ្ធិកុមារនេះត្រូវបានរៀបចំឡើងជារៀងរាល់ឆ្នាំដើម្បីរំលឹកដល់ការអនុវត្តសិទ្ធិជាមូលដ្ឋាន របស់កុមារ និងបង្ហាញពីការយកចិត្តទុកដាក់របស់រាជរដ្ឋាភិបាល ចំពោះកុមារស្របតាមរដ្ឋធម្មនុញ្ញ អនុសញ្ញាស្ដីពីសិទ្ធិកុមាររបស់អង្គការសហប្រជាជាតិ។

ដើម្បីអបអរសាទរទិវាសិទ្ធិកុមារនេះឱកាន់តែមានភាពអធិកអធម រាជរដ្ឋាភិបាលបានចេញសារាចរ ណែនាំដល់គ្រប់អង្គភាពទាំងថ្នាក់ជាតិ ថ្នាក់ក្រោមជាតិគ្រឹះស្ថានសិក្សាទាំងរដ្ឋ និងឯកជន ឲ្យរៀបចំ ពិធីនេះទៅតាមមូលដ្ឋានរៀងៗខ្លួន។

ជាក់ស្ដែងកាលពីចុងសប្ដាហ៍នេះ សាលាអន្តរជាតិ យូ អេស អេ បានប្រារព្ធពិធីអបអរសាទរខួបលើក ទី៧០ នៃទិវាសិទ្ធិកុមារ ដែលមានកុមារចូលរួមយ៉ាងច្រើនកុះករ។

លោក ស៊ឺ ទ្រី នាយកសាលាអន្តរជាតិ យូ អេស អេ បានឲ្យដឹងថា ការរៀបចំពិធីនេះឡើងមិនត្រឹមតែ បង្កលក្ខណៈជួបជុំគ្នាសប្បាយរីករាយរវាងសិស្សានុសិស្ស និងអាណាព្យាបាលប៉ុណ្ណោះទេ ថែមទាំង បានបង្កលក្ខណៈឲ្យសិស្សបានបញ្ចេញសមត្ថភាព និងទេពកោសល្យ ដែលខ្លួនមាន ដូចជា ការសម្តែង សិល្បៈបុរាណសម័យ ច្រៀងចម្រៀង សម្ដែងរឿងអប់រំ ដើរបង្ហាញម៉ូដជាដើម។

លោកបានអះអាងថា សាលារៀននេះបានរៀបចំកម្មវិធីសិទ្ធិកុមារនេះជារៀងរាល់ឆ្នាំដើម្បីចូលរួមជា មួយរាជរដ្ឋាភិបាលក្នុងការលើកកម្ពស់សិទ្ធិកុមារនិងលើកកម្ពស់ការទប់ស្កាត់អំពើហិង្សាលើកុមារគ្រប់ ប្រភេទនៅក្នុងប្រទេសកម្ពុជា៕

រូបភាព៖ ផ្ដល់ឲ្យ

អត្ថបទ៖ ប៊ិន ប៊ុណ្ណា