Lexus RX330 មួយទឹកក្នុងស្រុក មាន Option មួយដែលមានទីផ្សារសម្បូរអ្នកជិះច្រើន

2019-06-04 02:25:00
ចំនួនមតិ 0 | ចំនួនចែករំលែក 0

ចន្លោះមិនឃើញ

កំពុងមានទីផ្សារត្រូវប៉ាន់អ្នកជិះក្នុងស្រុក ឡាន Lexus RX300, RX330 មានជម្រើសប៉ុង១ ប៉ុង២, Base Option, Half full និង Full Options ហើយអ្វីដែលខុសគ្នាឆ្ងាយមួយទៀតនោះគឺ ពណ៌។

ត្រកូល Lexus RX330 មានស៊េរី ២០០៤ និង ២០០៥ ហើយជាឡានដែលកំពុងទទួលបាន ការប្រើប្រាស់ច្រើននៅលើទីផ្សារ។ តើអ្នកគួរទិញជម្រើសមួយណា ទើបចំណេញលុយ និងមានទីផ្សារ។

លោក ហេង ហៀប បុគ្គលិកលក់ឡានមួយទឹក នៅឃ្លាំងមួយកន្លែងម្ដុំជ្រោយចង្វារបានប្រាប់ Sabay ថា Lexus RX ដែលកំពុងពេញនិយមភាគច្រើនពណ៌ស។ បើពណ៌ផ្សេងខុសពីពណ៌ស ពុំសូវមានទីផ្សារឡើយ ចំណែកតម្លៃវិញក៏ខុសគ្នាជាង ២ ០០០ ដុល្លារ ដោយគិតទាំងប្រភេទ Base Option, Half full និង Full Options ជាដើម។

លោកបន្តថា សម្រាប់អ្នកចង់ទិញ Lexus RX330 ប្រើប្រាស់ក្នុងស្រុក គួរជ្រើសយកប្រភេទ Half Full ព្រោះចំណេញលុយ មានអ្នកប្រើប្រាស់ច្រើន និងមានលក្ខណៈទំនើប ដូចប្រភេទ Full Option ដែរ ពិសេសនៅតាមឃ្លាំងក៏មានការនាំចូលមកលក់ច្រើនដែរ។

ប្រភេទ Half Full និង Full option មានលក្ខណៈដូចគ្នាច្រើន រួមមានអេក្រង់បង្ហាញព័ត៌មានធំ, មាន DVD, មានកាមេរ៉ាក្រោយ, មានទឹកបាញ់ចង្កៀង, ប៊ូតុងចុចបិតឃ្លុបក្រោយអូតូ (ប្រភេទ Base Option អាចមានឬអត់) កៅអីអង្គុយបញ្ជាអូតូ, ចំពោះពោងសុវត្ថិភាពមានប្រាំបួនគ្រាប់ដូចគ្នា។

សម្រាប់ Full Option មានលក្ខណៈពិសេសជាង Half Full ត្រង់កន្លែងដាំបាយអគ្គិសនីនៅផ្នែកខាងក្រោយ មានផ្លិតទឹកដំណើរការអូតូនៅពេលភ្លៀង និងអេគ្រុយនៅលើតាប្លូជាដើម។

RX330 ប្រភេទ Hafl Full ថ្លៃជាង Base Option ប្រមាណ ១ ៥០០ ទៅ ២ ០០០ ដុល្លារ និង Full option ថ្លៃជាង Hafl Full ចន្លោះពី ១ ៥០០ ទៅ ២ ៥០០ ដុល្លារ អាចច្រើនជាងច្រើន ឬតិចជាងនេះអាស្រ័យទៅតាមគុណភាព និងទីផ្សារក្នុងស្រុក។

សម្រាប់កម្រិតស៊ីសាំងរបស់ Lexus RX330៖

ប្រភេទប៉ុងមួយ ម៉ាស៊ីនស៊ីឡាំង ៦ ទំហំ ៣,៣ លីត្រ ៖ ក្នុងក្រុង ១៣,៣៨ លីត្រ/ ១០០ គ.ម និង ក្រៅក្រុង ១០,២២ លីត្រ/ ១០០ គ.ម។
ប្រភេទប៉ុងពីរ ម៉ាស៊ីនស៊ីឡាំង ៦ ទំហំ ៣,៣ លីត្រ ៖ ក្នុងក្រុង ១៤,៧ លីត្រ/ ១០០ គ.ម និង ក្រៅក្រុង ១០,៦៩ លីត្រ/ ១០០ គ.ម។

កម្រិតស៊ីសាំងនៃប្រភេទទាំងពីរ អាចខុសគ្នាបន្តិចបន្តួច ព្រោះជាប្រភេទឡានមួយទឹក និងអាស្រ័យតាមការប្រើប្រាស់ជាក់ស្ដែង៕

អត្ថបទ៖ ម៉េងងី