ពាន Futsal ថ្នាក់ជាតិឆ្នាំ២០១៩ ប្រកាសរកក្រុម២០ចូលរួមប្រកួត

2019-06-28 07:06:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ពានរង្វាន់បាល់ទាត់ក្នុងសាលថ្នាក់ជាតិឆ្នាំ២០១៩ បានប្រកាសស្វែងរកក្រុម ចុះឈ្មោះប្រកួតហើយចាប់ពីពេលនេះតទៅ ដោយការប្រកួតនឹងធ្វើឡើងចាប់ពីថ្ងៃទី១៣កក្កដារហូតដល់ថ្ងៃទី៩កញ្ញាខាងមុខនេះ។

បើតាមលោក ឃុល ភារម្យ នាយកបាល់ទាត់ក្នុងសាលនៃសហព័ន្ធបាល់ទាត់កម្ពុជាបានបញ្ជាក់ថានាឆ្នាំនេះ សហព័ន្ធស្វែងរកក្រុម២០ដើម្បីចូលរួមប្រកួត ហើយការចុះឈ្មោះមិនមានបង់ប្រាក់អ្វីឡើយ។ ដោយគ្រាន់តែក្រុមទាំងអស់ ត្រូវមានឯកសណ្ឋានត្រឹមត្រូវ និងក្រុមការងារ រចនាសម្ព័ន្ធច្បាស់លាស់ប៉ុណ្ណោះ។ ២០ក្រុមនេះ នឹងបែងចែកជា៥ក្រុម ប្រកួតសន្សំពិន្ទុដើម្បីឡើងទៅវគ្គបន្ដ។

សម្រាប់ក្រុមដែលឈ្នះការប្រកួតខាងលើនេះដែរ នឹងត្រូវតំណាងឱ្យកម្ពុជា ដើម្បីចូលរួមប្រកួតពានរង្វាន់ AFF Futsal និង AFC វគ្គជម្រុះនៅខែតុលាខាងមុខនេះ។ នេះជាការប្រកួតលីគក្នុងសាលរបស់កម្ពុជា ដើម្បីស្វែងរកកីឡាករល្អៗ ត្រៀមលេងយកមេដាយក្នុងព្រឹត្តិការណ៍ស៊ីហ្គេម២០២៣ ដែលកម្ពុជាធ្វើជាម្ចាស់ផ្ទះ។ សម្រាប់ដំណឹងលម្អិតអាចទាក់ទងតាមលេខទូរសព្ទ៖ 012805388 ៕

អត្ថបទ៖ មុន្នីរម្យ