ជិតដល់ថ្ងៃ Nine Naphat មកជួបហ្វេន Friend Zone ហើយ

2019-07-20 06:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងពិធីសន្និសីទសារព័ត៌មានកាលពីថ្ងៃទី ១៩ កក្កដា ២០១៩ នៅ Major Cineplex ផ្សារទំនើបអ៊ីអនម៉ល សែនសុខម្សិលមិញនេះមានការបញ្ជាក់ឲ្យដឹងថា នៅថ្ងៃទី ២៤ដល់ថ្ងៃទី ២៨ កក្កដា ២០១៩នឹងមានមហោស្រពភាពយន្តថៃលើកទី ៦។

ឯកអគ្គរាជទូតថៃ ប្រចាំស្ថានទូតថៃនៅរាជធានីភ្នំពេញ ឯកឧត្តម Panyarak Poolthup មានប្រសាសន៍ក្នុងសន្និសីទថា “ប្រទេសថៃ និងកម្ពុជាមានវប្បធម៌ប្រហាក់ប្រហែលគ្នា យើងមានសាសនាជំនឿដូចគ្នា យើងមានរបបគ្រប់គ្រងដូចគ្នា រឿងរ៉ាវដែលកើតមានក្នុងប្រទេសថៃ អាចចែករំលែកមកប្រទេសជិតខាងយ៉ាងកម្ពុជាបាន។ ហេតុនេះហើយទើបយើងមានមហោស្រពភាពយន្តម្ដងទៀតយើងជឿថាខ្សែភាពយន្តនឹងជួយឲ្យប្រជាជននៃប្រទេសទាំងពីរកាន់តែស្និទ្ធស្នាលគ្នាបាន។”

“យើងចង់ជំរុញផលិតករនិងអ្នកពាក់ព័ន្ធនឹងវិស័យភាពយន្តនេះបានធ្វើការជាមួយគ្នា បង្កើតខ្សែភាពយន្តថ្មីៗជាមួយគ្នា បង្កើនទំនាក់ទំនងអាជីវកម្មជាមួយគ្នាទៅថ្ងៃខាងមុខ។ យើងចង់ឲ្យកម្មវិធីនេះក្លាយជាវេទិកាផ្លាស់ប្ដូរចំណេះដឹង ចែករំលែកបទពិសោធន៍និងបច្ចេកទេសក្នុងចំណោមអ្នកពាក់ព័ន្ធដូចជានាយកផលិតកម្ម ផលិតករ និងតារាសម្ដែងមកពីប្រទេសទាំងពីរ។” នេះបើតាមសម្ដីលោក Jirawuth Suwanana-art អគ្គទីប្រឹក្សាពាណិជ្ជកម្ម ប្រចាំស្ថានទូតថៃប្រចាំកម្ពុជា។

គួរបញ្ជាក់ផងដែរថាមហោស្រពភាពយន្តថៃនៅឆ្នាំនេះមានរយៈពេល ៥ថ្ងៃចាប់ផ្ដើមពីថ្ងៃទី ២៤ ដល់ថ្ងៃទី ២៨ កក្កដា ឆ្នាំ២០១៩។ មហោស្រពនេះរៀបចំឡើងដោយស្ថានតំណាងពាណិជ្ជកម្មអន្តរជាតិថៃ និងក្រសួងការបរទេសថៃ ព្រមទាំងមានកិច្ចសហប្រតិបត្តិការពីរោងភាពយន្ត Major Cineplex នៅផ្សារទំនើបអ៊ីអនម៉ល សែនសុខ និងLegend Cinema នៅផ្សារទំនើប City Mall។

ក្នុងអំឡុងពេល ៥ថ្ងៃនេះនឹងមានការបើកឲ្យសាធារណជនចូលទស្សនាដោយឥតគិតថ្លៃ។“Friend Zone” នឹងជាខ្សែភាពយន្តដំបូងសម្រាប់ចាក់បញ្ចាំងនៅថ្ងៃទី ២៤ កក្កដា ២០១៩ នៅ Major Cineplex ផ្សារទំនើបអ៊ីអនម៉ល សែនសុខ។ ព្រឹត្តិការណ៍នេះនឹងមានវត្តមានតារាសម្ដែងថៃ (Nine) Naphat Siangsomboon តួឯករឿង Friend Zone និងតារាល្បីៗ ផ្សេងទៀតមកពីប្រទេសថៃនិងកម្ពុជាមកចូលរួមផងដែរ ចាប់ពីម៉ោង ៥ ល្ងាចតទៅ៕

អត្ថបទ៖ Sokchea Heng