ម៉ារ៉ាតុង ចក្រភពខ្មែរ ឆ្នាំ២០១៩ កើនទាំងបរទេសនិងខ្មែរ ដោយចិនលេខ១ វៀតណាមលេខ២

2019-08-05 06:54:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ទិវារត់ប្រណាំងម៉ារ៉ាតុងចក្រភពខ្មែរ (Khmer Empire Marathon) លើកទី៦ នៅសៀមរាបមានការចូលរួមយ៉ាងច្រើនកុះករ ដោយក្នុងនោះទាំងបរទេសនិងខ្មែរ សុទ្ធតែមានការកើនឡើងជាងឆ្នាំមុនទាំងអស់។

ឯកឧត្ដមបណ្ឌិតថោង ខុន រដ្ឋមន្ដ្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា (NOCC) បានបញ្ជាក់ថាទិវារត់ប្រណាំងម៉ារ៉ាតុងចក្រភពខ្មែរ ឆ្នាំ២០១៩ បានទទួលការគាំទ្រ និងចូលរួមពីកីឡាករ-កីឡាការិនីជាតិ និងអន្ដរជាតិសរុប៣ ៥០០នាក់ ក្នុងនោះមានជនបរទេស១ ៥៨៤នាក់ មកពី៥០ប្រទេសកើន១៥% បើធៀបនឹងឆ្នាំមុន។ ដោយឡែកជនជាតិចិនឈរលំដាប់ទី១ វៀតណាមឈរលំដាប់ទី២ និងជប៉ុនឈរលំដាប់ទី៣។ សម្រាប់កម្ពុជាមានចំនួន១,៩១៦នាក់ មានកំណើន១០%។

ការកើនឡើងនៃចំនួនបរទេសចូលរួមនេះដែរ ក៏បានបញ្ជាក់ច្បាស់ថាកម្ពុជាបានផ្ដល់ភាពកក់ក្ដៅពេញលេញសម្រាប់ពួកគេមកពីគ្រប់តំបន់ទាំងអស់ ក្នុងការចូលរួមរត់ប្រណាំងក្នុងព្រឹត្តិការណ៍អន្តរជាតិនេះ។ ការរត់ប្រណាំងនេះក៏ជាការទាក់ទាញភ្ញៀវបរទេសមកស្វែងយល់ពីខេត្តសៀមរាប តំបន់អង្គរផងដែរ។

ចំពោះវិញ្ញាសាដែលដាក់ឱ្យប្រកួត រួមមាន៖

រត់ចម្ងាយ ៤២គីឡូម៉ែត្រ បុរស-នារី ដែល ត្រូវចេញដំណើរមុនគេ នាវេលាម៉ោង៤ទៀបភ្លឺ,
រត់ចម្ងាយ ២១គីឡូម៉ែត្រ បុរស-នារី, ១០គីឡូម៉ែត្រ បុរស-នារី
និងវិញ្ញាសា រត់កម្សាន្ដលក្ខណៈគ្រួសារ ៣គីឡូម៉ែត្រ ដោយការចេញដំណើរ និងដល់ទីធ្វើឡើងនៅមុខប្រាសាទអង្គរវត្ត។

ជាលទ្ធផលជយលាភី វិញ្ញាសារត់ចម្ងាយ៤២គីឡូម៉ែត្រផ្នែកនារី ចំណាត់ថ្នាក់លេខ១បានទៅលើកីឡាការិនីចិន SHN Hong xia, លេខ២ កីឡាការិនីជប៉ុន Yam AMOTO Mari និងលេខ៣ កីឡាការិនីជប៉ុន Yamamoto Eri។

សម្រាប់ ៤២គីឡូម៉ែត្រ ផ្នែកបុរស លេខ១ បានទៅលើកីឡាករកម្ពុជា Takizaki Kuniaki, លេខ២ កីឡាការិនីជប៉ុន Yoneda michiyo និងលេខ៣ កីឡាករ អាម៉េរិក Gruber Tim។

លទ្ធផលរត់ចម្ងាយ២១គីឡូម៉ែត្រ ផ្នែកនារីបានទៅលើកីឡាការិនីជប៉ុនទាំងអស់ លេខ១កីឡាការិនី Tanimara Yuko។ លេខ២ កីឡាការិនី SASAKI Natsuke និងលេខ៣ កីឡាការិនី Mashita Mieko ខណៈផ្នែកបុរសលេខ១ បានទៅលើកីឡាករជប៉ុន Yamauchi Daisuke លេខ២ បានទៅលើកីឡាករកម្ពុជា ម៉ា វីរ៉ូ និងលេខ៣ កីឡាករអង់គ្លេស David George។

ដោយឡែកលទ្ធផលរត់ចម្ងាយ១០គីឡូម៉ែត្រផ្នែកនារីលេខ១ បានទៅលើកីឡាការិនីសហរដ្ឋអាមេរិក Gernin Michlle លេខ២ បានទៅលើកីឡាការិនីជប៉ុន Konishi Mosako និងលេខ៣ បានទៅលើកីឡាការិនីអង់គ្លេស Vogel Sophie។ ផ្នែកបុរស លេខ១បានទៅលើកីឡាករកម្ពុជា ឡៃ តេរ៉ង់ លេខ២ បានទៅលើកីឡាករកម្ពុជា វ៉ាន់ ភារ៉ា និងលេខ៣បានទៅលើកីឡាករសហរដ្ឋអាមេរិក Vishnevsky Mark៕