វិទ្យាស្ថានបង្រៀនឆុងកាហ្វេធំមួយនៅកម្ពុជា សម្ពោធផ្លូវការហើយ

2019-08-08 09:43:10
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីព្រឹកថ្ងៃទី ៨ សីហា ២០១៩ មានការសម្ពោធបើកឲ្យដំណើរការជាផ្លូវការនៃ វិទ្យាស្ថាន ខូហ្វី ដែលជាវិទ្យាស្ថានបង្រៀនឆុងកាហ្វេធំមួយនៅកម្ពុជា។ កម្មវិធីនេះបាន ធ្វើឡើងក្រោមអធិបតីភាពដ៏ថ្លៃថ្លា ឯកឧត្តម តុប សុភ័ក្ត្រ អនុរដ្ឋលេខាធិកាក្រសួងទេសចរណ៍ និងលោក មាន វ៉ាន់ដេត ប្រធាននាយកដ្ឋានបណ្ដុះបណ្ដាលវិជ្ជាជីវៈ។

ឯកឧត្តម តុប សុភ័ក្ត្រ

ខូហ្វី ត្រូវបានបើកតាំងពីឆ្នាំ ២០១៨ ដែលជាផ្នែកបណ្ដុះបណ្ដាលផ្នែកជំនាញឆុងកាហ្វេ និងភេសជ្ជៈផ្សេងៗ ជាមួយនឹងគ្រូបង្រៀនមានបទពិសោធន៍ខ្ពស់ក្នុងការឆុងកាហ្វេ ដែលមានវិញ្ញាបនបត្រពី SCA (Specialty Coffee Association) និងត្រូវបានទទួលស្គាល់និងគាំទ្រដោយក្រសួងទេសចរណ៍ សហព័ន្ធទេសចរណ៍ និង SCA (Specialty Coffee Association)។

លោក ថន រ៉ាដែន ប្រធានផ្នែករដ្ឋបាល និងធនធានមនុស្សនៃក្រុមហ៊ុន ខូហ្វី បានលើកឡើងថា វិទ្យាស្ថាន ខូហ្វី (Kofi Academy) ត្រូវបានបង្កើតឡើងក្នុងចក្ខុវិស័យដើម្បីពង្រឹង និងអភិវឌ្ឍន៍ជំនាញឆុងកាហ្វេចាប់ពីដំណាក់កាលដាំដុះ រហូតដល់បានកាហ្វេឈ្ងុយឆ្ងាញ់សម្រាប់ផ្ដល់ដល់អតិថិជន ព្រមទាំងបង្រៀនឲ្យសិក្ខាកាមចេះមើលគ្រាប់កាហ្វេ និងទឹកដោះគោផងដែរ។ វិទ្យាស្ថានក៏បានរៀបចំថ្នាក់ជំនាញឆុងកាហ្វេជា ៣ កម្រិតសំខាន់ៗដូចជា៖

១. កម្រិតវិជ្ជាជីវៈ៖ ថ្នាក់ជំនាញឆុងកាហ្វេកម្រិតមូលដ្ឋាន កម្រិតមធ្យម និងការរចនានៅលើឡាតេ។

២. កម្រិតអតិថិជន៖ ការណែនាំអំពីកាហ្វេ Espresso ទឹកដោះគោ របៀបនៃការធ្វើខាប់ភីង និងការលីងកាហ្វេ។

៣. រាល់អតិថិជនណាដែលជាវម៉ាស៊ីនពី ក្រុមហ៊ុន ខូហ្វី នឹងទទួលបានការបង្រៀនលើវគ្គឆុងកាហ្វេ។

លោក ថន រ៉ាដែន

ជាមួយគ្នានេះដែរ សិក្ខាកាមចំនួន ៥ រូបដែលបានបញ្ចប់ការសិក្សានៅ ខូហ្វី ក៏មានកិត្តិយសឡើងទៅទទួលវិញ្ញាបនបត្រពីឯកឧត្តម តុប សុភ័ក្ត្រ អនុរដ្ឋលេខាធិកាក្រសួងទេសចរណ៍ផងដែរ។