ឆាកជីវិតគឺបែបនេះ! ខែមុន វ៉ាន់ វលក្ខ ត្រូវគេហែករឿងអាស្រូវ ខែនេះត្រូវជំទាវ ញ៉ែម មរកត យកធ្វើកូនធម៌

2019-08-29 07:05:04
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែង វ៉ាន់ វល័ក្ខ បន្ទាប់ពីរងគ្រោះ ដោយអ្នកលេងFacebook ម្នាក់ជេរប្រមាថមើលងាយបរិហារកេរ្តិ៍ហើយរឿងរ៉ាវនោះ ត្រូវបានលោកជំទាវ ញ៉ែម មរកត អនុរដ្ឋលេខាធិការក្រសួងកិច្ចការនារី ចេញមុខអន្តរាគមន៍ជួយប្ដឹងតាមផ្លូវច្បាប់មក ឃើញថា រាសីតារាស្រីសិចស៊ីរូបនេះ កាន់តែឡើងខ្លាំងឡើងៗតែម្ដង។

វ៉ាន់ វល័ក្ខ ជាមួយលោកជំទាវ អ៊ឹង កន្ថាផាវី រដ្ឋមន្ត្រីក្រសួងកិច្ចការនារី

នាងដើរធ្វើសកម្មភាពសង្គមច្រើន ជាមួយ ជំទាវៗដែលមានតួនាទីជាថ្នាក់ដឹកនាំក្រសួង មិនត្រឹមតែប៉ុណ្ណោះ នាងថែមទាំង ទទួលបានការកោតសរសើរជាខ្លាំង ជាមួយនឹងកិច្ចការសង្គមទាំងនោះ ។ តាមការលើកឡើង របស់លោកជំទាវ ញ៉ែម មរកត អនុរដ្ឋលេខាធិការក្រសួងកិច្ចការនារី ដែលតែងតែនាំតារាសម្ដែង វ៉ាន់ វលក្ខ ចូលរួមធ្វើសកម្មភាពសង្គមជាច្រើនកន្លងមកនោះ បានកោតសរសើរពីទឹកចិត្តតារាស្រីរូបនេះជាខ្លាំង ដោយចាត់ទុកថា សកម្មភាពរបស់នាងធ្វើដោយបេះដូង មិនមានការរើសអើង ស្អប់ខ្ពើម ដល់ជនពិការ ឬកុមារគថ្លង់ នោះឡើយ។

មិនត្រឹមតែប៉ុណ្ណោះ លោក ជំទាវ បានចាត់ទុក វលក្ខ គឺជាកូនធម៌ដ៏ល្អម្នាក់ ហើយនឹងបន្តដឹកនាំ តារាស្រីរូបនេះបង្រៀនឲ្យចេះចែករំលែកធនធានដែលខ្លួនមាន ទៅឲ្យអ្នកដែលខ្វះខាត ឲ្យកាន់តែច្រើនថែមទៀត។ " ខ្ញុំចាត់ទុកគាត់ជាកូនធម៌ខ្ញុំ គាត់អត់ស្អប់អត់ខ្ពើម ខ្លាចឆ្លងរោគអីទេ បានគាត់ហ្នឹងដឹកដៃបងប្អូនគថ្លង់ ខ្ញុំខលហៅគាត់ ម៉ោងណា មកពេលហ្នឹង គាត់នៅជាប់ជាមួយខ្ញុំជានិច្ច" លោកជំទាវ ញ៉ែម មរកត អនុរដ្ឋលេខាធិការក្រសួងកិច្ចការនារី ថ្លែង។

លោកជំទាវ ញ៉ែម មរកត អនុរដ្ឋលេខាធិការក្រសួងកិច្ចការនារី

ជាមួយនឹងសកម្មភាពនេះលោកជំទាវ ចាត់ទុកថា វត្តមានវ៉ាន់ វលក្ខ ក៏ដូចជា អ្នកសិល្បៈផ្សេងទៀត គឺជា កម្លាំងលើកទឹកចិត្តធំបំផុតដល់ជនពិការ ក៏ដូចជា កុមារគថ្លង់ ដែលលោកជំទាវកំពុងតែធ្វើជាមួយរាល់ថ្ងៃនេះ ដោយពួកគេគិតថា មិនឯកការនោះឡើយនៅពេលដែលមាន វត្តមានរបស់អ្នកសិល្បៈនៅជាមួយពួកគេ ។ ទទឹមគ្នានោះដែរ លោកជំទាវអនុរដ្ឋលេខាធិការ ក៏បានសំណូមពរ ដល់អ្នកសិល្បៈផ្សេងទៀតក៏ដូចជា មហាជនទូទៅ ដែលមានបំណងចង់ចូលរួមចំណែកធ្វើសកម្មភាពជួយសង្គមជាមួយលោកជំទាវ គឺលោក ជំទាវ ស្វាគមន៍ជាកិច្ច។

ងាកមកបណ្ដឹងលើការជេរប្រមាថ លើបណ្ដាញសង្គមរបស់តារា សម្ដែង វ៉ាន់ វលក្ខ វិញ លោកជំទាវ ញ៉ែម មរកត បានប្រាប់ថា សមត្ថកិច្ចកំពុងតែដំណើរការរឿងក្ដីនោះ តាមនីតិវិធី មិនទាន់ដោះស្រាយចប់នៅឡើយទេ។ ជាមួយគ្នានោះ កន្លងមកភាគីបង្កក៏បានសុំជួបដើម្បីធ្វើការសុំទោស ហើយ វលក្ខ ក៏បានជួប ប៉ុន្តែមិនបានទទួលការសុំទោសឡើយដោយទុកពាក្យបណ្ដឹងនោះ ឲ្យសមត្ថកិច្ចចាត់ការតាមផ្លូវច្បាប់ដដែល។

ជុំវិញការសរសើរដូចបានរៀបរាប់ខាងលើ តារាស្រី វ៉ាន់ វលក្ខ បានថ្លែងថា នាងពិតជាសប្បាយនិងមានមោទកភាពខ្លាំងណាស់ដែលមានសំណាង ត្រូវបាន លោក ជំទាវ ស្រលាញ់ដូចកូនបង្កើត និងផ្ដល់ឱកាសឲ្យខ្លួនបែបនេះ។ នាងថា នៅពេលនាងចូលស្និទ្ធនឹងជីវិតក្មេងៗកំព្រា ក្មេងគងថ្លង់ ក្មេង ខ្សោយសតិបញ្ញា ទើបធ្វើឲ្យនាង យល់ពីអារម្មណ៍ពិត ស្ដីពីទុក្ខលំបាកពិតប្រាកដរបស់ពួកគេគេ ថាពួកគេលំបាកយ៉ាងណា ត្រូវការអ្វីខ្លះពីការគាំទ្រ ទាំងទឹកចិត្ត ទាំងសេដ្ឋកិច្ច ដែលអារម្មណ៍នេះខុសគ្នាឆ្ងាយស្រលះ កាលដែលនាងមិនទាន់ចូលរួមសកម្មភាព ។

ទន្ទឹមគ្នានោះដែរ នាងសូមថ្លែងអំណរគុណដល់ លោក ជំទាវ ញ៉ែម មរកត ដែលមានចិត្តសន្ដោស និងបានផ្ដល់ឱកាសដល់ក្មេងស្រីម្នាក់ដែលធ្លាប់តែឯកាដូចជារូបនាង ស្រលាញ់ចាត់ទុកដូចជាកូនបង្កើតបែបនេះ។ វលក្ខ បានប្ដេជ្ញាចិត្ត និងបន្តជាមួយម្ដាយធម៌ របស់នាងទៅ តាមលទ្ធភាព មិនឲ្យគាត់អស់សង្ឃឹមដោយសារខ្លួនឡើយ៕

អត្ថបទ៖ ស៊ុន ហួត