ចំណាយ​ពេល​៦​ឆ្នាំ សម្ភាស​មហាសេដ្ឋី​២១​នាក់ អ្នក​និពន្ធ​ម្នាក់​រក​ឃើញ​​ចម្លើយ​ទៅ​នឹង​សំណួរ "តើ​មហាសេដ្ឋី​​មាន​សុភមង្គល​ឬ​អត់?”

  • 2019-09-01 08:57:00
  • ចំនួនមតិ 0 | ចំនួនចែករំលែក 0

ចន្លោះមិនឃើញ

Rafael Badziag បាន​សម្ភាស​​មហាសេដ្ឋី ២១ រូប​ដើម្បី​សរសេរ​សៀវភៅ​របស់​គាត់​ដែល​មាន​ចំណង​ជើង​ថា “The Billion Dollar Secret”។

លោក Rafael Badziag បាន​សម្ភាស​​មហាសេដ្ឋី ២១ រូប​ដើម្បី​សរសេរ​សៀវភៅ​របស់​គាត់​ដែល​មាន​ចំណង​ជើង​ថា “The Billion Dollar Secret”

យោង​តាម​អ្នកនិពន្ធ​រូប​នេះ មហាសេដ្ឋី​ជាទូទៅ​មាន​សុភមង្គល ប៉ុន្តែ​មិន​មែន​ដោយសារ​ពួកគេ​មាន​លុយ​ច្រើន​ទេ គឺ​ដោយសារ​របស់​៣​យ៉ាង​នោះ​គឺ៖ **ជម្រើស ឱកាស និង ទំនាក់ទំនង​រឹងមាំ**។

ជា​សហគ្រិន ជា​វាគ្មិន​ដ៏​ល្បី​របស់​កម្មវិធី TED និង ជា​អ្នកនិពន្ធ​​ដែល​ទទួល​បាន​ពាន​រង្វាន់ លោក Rafael Badziag បាន​រៀបរាប់​ថា ជាទូទៅ​មនុស្ស​តែង​មាន​គំនិត​សន្មត​និយម​ចំពោះ​អ្នក​​មាន​លុយ​តែ​បញ្ហា​២​គត់​​ទី​១ "លុយ​នឹង​ធ្វើ​ឲ្យ​អ្នក​សប្បាយ​ចិត្ត" ទី​២​​ពួកគេ​តែង​និយាយ​ថា​ "មហាសេដ្ឋី​​ទាំង​នោះ​កម្សត់​ណាស់ ពួកគេ​មាន​លុយ តែ​មិន​សប្បាយ​ចិត្ត​ទេ"។

ប៉ុន្តែ​ឆ្លង​កាត់​ការ​ស្រាវជ្រាវ​ជាង​កន្លះ​ទសវត្ស ​អ្នកនិពន្ធ​ខាង​លើ​​​បាន​សន្មត​ជារួម​ថា "អ្វី​ដែល​ខ្ញុំ​​រក​ឃើញ​នៅ​ក្នុង​ការ​ស្រាវជ្រាវ​របស់​ខ្ញុំ​គឺ​ថា លុយ​មិន​បាន​ផ្លាស់​ប្តូរ​ច្រើន​​អំពី​លទ្ធភាព​ដែល​ឲ្យ​អ្នក​រីករាយ​ទេ វា​គ្រាន់​តែ​លើក​កម្ពស់​បុគ្គលិកលក្ខណៈ​របស់​អ្នក​ប៉ុណ្ណោះ"។

“មនុស្ស​រីករាយ​នឹង​កាន់​តែ​រីករាយ​ពេល​មាន​លុយ ហើយ​មនុស្ស​តែង​អោប​ទុក្ខ​នឹង​កាន់​តែ​វេទនា​ផ្លូវ​ចិត្ត​ពេល​​ពួកគេ​មាន​ទ្រព្យសម្បត្តិ"។

“លុយ​មិន​បាន​ផ្ដល់​សុភមង្គល​ឲ្យ​អ្នក​ទេ។ វា​ឲ្យ​អ្នក​នូវ​ជម្រើស។ លុយ​កាន់​តែ​ច្រើន ផ្ដល់​ឲ្យ​អ្នក​នូវ​ជម្រើស​កាន់​តែ​ច្រើន។ ប៉ុន្តែ​មិន​មែន​អ្នក​មាន​ទាំង​អស់​សុទ្ធ​តែ​អាច​គ្របគ្រង​ជម្រើស​នោះ​បាន​ទេ"។

“ដូច្នេះ តើ​​មហាសេដ្ឋី​រីករាយ​ឬ​អត់? ចម្លើយ​ដ៏​ខ្លី​គឺ ប្រាកដ​ជា​រីករាយ ប៉ុន្តែ​មិន​មែន​ដូច​ហេតុផល​ដែល​អ្នក​គិត​នោះ​ទេ"។

អ្នក​ជំនាញ​រូប​នោះ​​​រៀបរាប់​​លម្អិត​នូវ​៣​ចំណុច​ដែល​ធ្វើ​ឲ្យ​ពួក​មហាសេដ្ឋី​រីករាយ៖

ទី១ លុយ​របស់​មហាសេដ្ឋី​​ជួយ​​កសាង​ទំនាក់ទំនង​រីករាយ​សម្រាប់​ពួកគេ

អ្នក​ជំនួញ​ទាំង​នោះ ទម្រាំ​បាន​ក្លាយ​ទៅ​ជា​មហាសេដ្ឋី ពួកគេ​វិនិយោគ ពេលវេលា ថាមពល និង ការ​ប្រឹងប្រែង​​ស្ទើរ​២៤​ម៉ោង​លើ​​៧​ថ្ងៃ លែង​ស្គាល់​អ្វី​ទៅ​ដែល​ហៅ​ថា​ពេលវេលា​ឯកជន ហើយ​ពួកគេ​តែង​ឯកា​រស់​នៅ​ជាមួយ​បញ្ហា។

ទន្ទឹម​នឹង​នោះ មហាសេដ្ឋី​ភាគ​ច្រើន​គឺ​ជា​អ្នក​ជំនាញ​ផ្នែក​ចិត្តវិទ្យា ដែល​អនុញ្ញាត​ឱ្យ​ពួកគេ​បង្កើត​ទំនាក់ទំនង​រយៈពេល​វែង​ប្រកប​ដោយ​ការ​ចុះ​សម្រុង​គ្នា និង រួម​ចំណែក​ដល់​សុភមង្គល​ពួកគេ។ ដូច​ ជេក ម៉ា ជាដើម​​មហាសេដ្ឋី​ភាគច្រើន​ពូកែ​និយាយ​ពាក្យ​លើក​ទឹកចិត្ត ធ្វើ​ឲ្យ​មនុស្ស​ជុំវិញ​ខ្លួន​គោរព​ស្រលាញ់។

​​ទី២ មហាសេដ្ឋី​ចូលចិត្ត​ការងារ និង ឱកាស​ដែល​ពួកគេ​បង្កើត

ពួកគេ​រីករាយ​នឹង​អាជីវកម្ម និង ឧស្សាហកម្ម​ដែល​ពួកគេ​មាន។ តាម​ធម្មជាតិ​នេះ​នឹង​ធ្វើ​ឱ្យ​អ្នក​រីករាយ​ជាង​ធ្វើ​ការងារ​ដែល​អ្នក​មិន​ចូលចិត្ត។ ហើយ​មហាសេដ្ឋី​មាន​សេរីភាព​ក្នុង​ន័យ​ថា​ ពួកគេ​ធ្វើការ​មិនមែន​ដោយសារ​តែ​ពួកគេ​ត្រូវ​តែ​ធ្វើ​នោះ​ទេ ប៉ុន្តែ​ដោយសារ​តែ​ពួកគេ​ចូលចិត្ត​ធ្វើ​វា​ ហើយ​យល់​ថា​វា​សំខាន់។

សមត្ថភាព និង ទ្រព្យសម្បត្តិ​របស់​ពួកគេ​ផ្ដល់​ឱ្យ​ពួកគេ​នូវ​ជម្រើស​ច្រើន​ដើម្បី​កែ​ស្ថានភាព​អវិជ្ជមាន​នៅ​ក្នុង​ជីវិត​របស់​ពួកគេ និង បង្កើត​លទ្ធផល​វិជ្ជមាន។

មហាសេដ្ឋី​គឺជា​អ្នក​បង្កើត។ ពួកគេ​អាច​ធ្វើ​អ្វី​មួយ​ឲ្យ​កើត​ឡើង។ ពួកគេ​មាន​ឥទ្ធិពល​ជា​វិជ្ជមាន​ទៅ​លើ​ជីវិត​អ្នក​ដទៃ។

ទី៣ មហាសេដ្ឋី​អនុវត្ត​ទម្លាប់​បង្កើត​សុភមង្គល

វា​ស្តាប់​ទៅ​រាង​សន្មត​និយម​បន្តិច តែ​ជា​ការ​ពិត​មិន​​អាច​ប្រកែក​បាន។ មហាសេដ្ឋី​ភ្លក់​នូវ​រាល់​រសជាតិ​ជីវិត​មុន​ពេល​ដែល​ពួកគេ​មាន​បាន។ និយាយ​បែប​ផ្សេង អ្នកមាន​អាច​ធ្វើ​​ឲ្យ​ជីវិត​​ពួកគេ​រស់​ក្នុង​ភាព​សាមញ្ញ។

Peter Hargreaves នៅ​តែ​បន្ត​ទម្លាប់​​​ដាំ​ស្ពៃ​របស់​គាត់ ហើយ​នេះ​ជា​ក្តី​សុខ​របស់​មហាសេដ្ឋី​ជនជាតិ​អង់គ្លេស​រូប​នេះ។

ចុងក្រោយ​អ្នក​ជំនាញ​រូប​នោះ​ណែនាំ​​ឲ្យ​បំភ្លេច​ចរិត និង ទម្លាប់​របស់​មហាសេដ្ឋី​ ហើយ​មក​គិត​អំពី ជំនឿ សុទិដ្ឋិនិយម បំណង​ក្នុង​ការ​ដើរ​តាម​បេសកកម្ម​ផ្ទាល់​ខ្លួន ថែ​សុខភាព​ខ្លួន​ឲ្យ​ល្អ ធ្វើ​ខ្លួន​ឲ្យ​សកម្ម ធ្វើ​ជា​​ខ្លួន​​អ្នក​ ព្រោះ​វា​ជា​កម្មសិទ្ធិ​របស់​អ្នក ​​ដោយ​មិន​ចាំ​បាច់​ខ្វល់​ទៅ​ធ្វើ​ឲ្យ​ដូច​អ្នក​ដទៃ ធ្វើ​ខ្លួន​ឲ្យ​មាន​ប្រយោជន៍​សម្រាប់​អ្នក​ដទៃ និង មាន​ប្រយោជន៍​សម្រាប់​ខ្លួន​ឯង នោះ​ហើយ​ជា​សុភមង្គល៕

អាន៖ ន័រវែស​សង់​បង្គន់​សាធារណៈ​ស្អាត​ជាង​គេ​លើ​លោក ហើយ​នេះ​ជា​​មូលហេតុ

ប្រភព៖ Businessinsider   ប្រែ​សម្រួល៖ សុខ លាងហ៊ត