រកឃើញថ្មី! អាជ្ញាធរប្រទះឃើញបដិមាលោកេស្វរៈសម័យព្រះបាទជ័យវរ្ម័នទី៧
- 2019-10-09 06:57:29
- ចំនួនមតិ 0 | ចំនួនចែករំលែក 0
រកឃើញថ្មី! អាជ្ញាធរប្រទះឃើញបដិមាលោកេស្វរៈសម័យព្រះបាទជ័យវរ្ម័នទី៧
ចន្លោះមិនឃើញ
ក្រសួងវប្បធម៌ឲ្យដឹងថាព្រះកេសបដិមាព្រះពោធិសត្វលោកេសូរ ឬ លោកេស្វរៈចំនួនមួយ ធ្វើពីថ្មភក់ ត្រូវបានប្រទះឃើញខណៈអ្នកជំនាញអាជ្ញាធរជាតិអប្សរាធ្វើកំណាយនៅក្នុងខ្លោងទ្វារចូលខាងកើតប្រាសាទតានៃជ្រុងនិរតី ដើម្បីរកថ្មដំបូលដែលធ្លាក់ចុះកប់ក្នុងគំនរថ្មនិងដីដំបូកយកមកជួសជុលប្រាសាទ។
បើតាមសំណេរនៅលើទំព័រហ្វេសប៊ុករបស់ក្រសួងវប្បធម៌នារសៀលនេះបញ្ជាក់ថាការរកឃើញនេះគឺនៅព្រឹកថ្ងៃទី៨ ខែតុលា ឆ្នាំ២០១៩។ ប្រភពបន្ដថាលោក ស៊ា សុភារុន ប្រធានគម្រោងជួសជុលប្រាសាទតានៃឲ្យដឹងថាដឹងថា ចម្លាក់ព្រះកេសលោកេស្វរៈ ដែលក្រុមការងារប្រទះឃើញ គឺមានត្រឹមតែព្រះកេសប៉ុណ្ណោះ មានរូបព្រះពុទ្ធនៅលើផ្នួងសក់ មានត្រចៀកខាងស្តាំ តែគ្មានខាងឆ្វេង ច្រមុះឆែប ព្រះភ័ក្ត្រម្ខាងខ្សុះរបកសាច់ថ្ម។
អានបន្ត អាម៉េរិករឹបអូសបានបដិមាបុរាណខ្មែរពីរអាយុជាង១ពាន់ឆ្នាំ ត្រៀមបញ្ជូនមកខ្មែរវិញ
លោកឲ្យដឹងទៀតថាសភាពខូចខាតទាំងនេះ ជាបឋមមិនដឹងថាមកពីមូលហេតុអ្វីប្រាកដទេ តែអាចជាការប៉ះទង្គិចអ្វីមួយធ្វើឱ្យបែក ឬគុណភាពថ្មនៅលើថ្ពាល់ម្ខាងមិនសូវល្អ ទើបធ្វើឱ្យស្រទាប់ថ្មរបកចេញពីថ្ពាល់។ ម្យ៉ាងវិញទៀត ចម្លាក់មួយនេះ ក៏ប្រហែលមិនស្ថិតនៅទីតាំងនេះដែរកាលដើមឡើយ ព្រោះមិនមានភស្តុតាងណាមួយបញ្ជាក់ថាមានដងខ្លួននៅកន្លែងនេះដូចគ្នា។
ប្រភពខាងលើសរសេរទៀតថា៖ «លោក ឈូក សុម៉ាឡា មន្ត្រីទទួលបន្ទុកចុះបញ្ជីសារពើភណ្ឌបុរាណវត្ថុនៃនាយកដ្ឋានអភិរក្សប្រាសាទក្នុងឧទ្យានអង្គរនិងបុរាណវិទ្យាបង្ការនៃអាជ្ញាធរជាតិអប្សរា បានឱ្យដឹងថា ព្រះកេសនេះធ្វើពីថ្មភក់ មានកម្ពស់៥៤ស.ម ទទឹង២៧ស.ម និងកម្រាស់៣៦ស.ម...បដិមានេះស្ថិតក្នុងរចនាប័ទ្មបាយ័ន ប្រហែលពីចុងស.វ.ទី១២ និងដើមស.វ.ទី១៣ក្នុងរាជ្យព្រះបាទជ័យវរ្ម័នទី៧... លោកេសូរ ឬ លោកេស្វរៈ គឺជាព្រះពោធិសត្វក្នុងពុទ្ធសាសនាមហាយាន ដែលមានករុណាធម៌កំពូលក្នុងការជួយសង្គ្រោះមនុស្សលោក» ៕