កីឡដ្ឋានស្ដង់ដាត្រៀមស៊ីហ្គេមនៅខេត្តកំពង់ស្ពឺ ចាប់ផ្ដើមបុកគ្រឹះហើយ

2019-12-16 02:37:01
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡដ្ឋានស្ដង់ដារអន្តរជាតិមួយក្នុងខេត្តកំពង់ស្ពឺ បានចាប់ផ្ដើមបុកគ្រឹះសាងសង់ហើយ ក្រោមវត្តមានរបស់ឯកឧត្ដម ហ៊ុន ម៉ានី តំណាងរាស្រ្តមណ្ឌលខេត្តកំពង់ស្ពឺផ្ទាល់តែម្ដង។

កីឡដ្ឋានមួយនេះ ស្ថិតនៅភូមិ តាម៉ុល សង្កាត់ច្បារមន ក្រុងច្បារមន ខេត្តកំពង់ស្ពឺ។ កីឡដ្ឋាននឹងត្រូវសាងសង់លើផ្ទៃដីប្រមាណ៤ហិចតា។ ឯកឧត្ដម ហ៊ុន ម៉ានី បានបញ្ជាក់ថានេះជាកិត្តិយសថ្មីមួយសម្រាប់អ្នកខេត្តកំពង់ស្ពឺដើម្បីលើកស្ទួយវិស័យកីឡាក្នុងខេត្តនេះ។ វាក៏ជាផ្នែកមួយសម្រាប់ជួយវិស័យកីឡានៅកម្ពុជាឈានទៅមុខមួយកម្រិតទៀតដែរ នៅពេលដែលកីឡដ្ឋាននេះសាងសង់រួចរាល់។

មួយវិញទៀត វាក៏នឹងក្លាយជាកន្លែងមួយសម្រាប់កម្ពុជា ដើម្បីធ្វើជាម្ចាស់ផ្ទះព្រឹត្តិការណ៍ស៊ីហ្គេមឆ្នាំ២០២៣នាពេលខាងមុខផងដែរ។ មិនត្រឹមតែកសាងកីឡដ្ឋាននេះទេ តាមគម្រោងនឹងមានការកសាងអ្វីជាច្រើនទៀតនៅក្នុងខេត្តកំពង់ស្ពឺ ដើម្បីកែប្រែមុខមាត់ខេត្តមួយនេះ កុំឱ្យគេនៅតែនិយាយថាខេត្តកំពង់ស្ពឺជាខេត្តទៅហួសមកហួសទៀត។

ចំពោះថវិកានៃការកសាងវិញ ឯកឧត្តម បានបញ្ជាក់ថាបច្ចុប្បន្ននេះកំពុងសិក្សាថានឹងត្រូវចំណាយអស់ប៉ុន្មាន។ ខណៈដែលក្រុមហ៊ុនណាហ្គាវើល បានផ្ដល់ប្រាក់២លានដុល្លារ និងសប្បុរជនជាច្រើននាក់ទៀតក៏បានចូលរួមជួយផងដែរ។ ឯកឧត្តម ហ៊ុន ម៉ានី ក៏ប្រកាសឱ្យបងប្អូនអ្នកខេត្តកំពង់ស្ពឺ ចូលរួមជួយគ្នា តិចក្ដីច្រើនក្ដី ដើម្បីកសាងកីឡដ្ឋាននេះឱ្យបានល្អ និងរួចរាល់ទាន់ពេលវេលា៕

អត្ថបទ៖ ប្រុស យុទ្ធ