តារាខ្មែរល្បីៗ ជួបគ្នាជប់លៀងលេង ក្រោយរឿងពួកគេ២រឿង កំពុងទទួលការចាប់អារម្មណ៍

2019-12-16 08:47:49
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាល្បីៗខ្មែរជាច្រើនរូប ជាតួសម្ដែងក្នុងខ្សែភាពយន្តភាគខ្មែរចំនួន២រឿង គឺរឿង "បុប្ផាស្រុកស្រែ" និងរឿង "អន្ទាក់ស្នេហ៍" បាននិងកំពុងចាក់បញ្ចាំងនៅលើកញ្ចក់ទូរទស្សន៍ ហើយទទួលបានការចាប់អារម្មណ៍។

ភាពយន្តទាំងពីរខាងលើផលិតដោយទូរទស្សន៍ប៉ុស្តិ៍លេខ៥ ដោយក្នុងនោះ ភាពយន្តបែបស្រុកស្រែគឺរឿង ”បុប្ផាស្រុកស្រែ” សម្ដែងដោយ លោក ជា លាងឈែ និងកញ្ញា ជា ស្រីរ័ត្ន បាននឹងកំពុងទាក់ទាញការចាប់អារម្មណ៍ខ្លាំងពីទស្សនិកជនព្រោះតែភាពយន្តនេះបានបង្ហាញពីស្នេហានឹងទិដ្ឋភាពដ៏ស្រស់ត្រកាលនៃស្រុកស្រែចម្ការ។

ដោយឡែកភាពយន្តស្នេហាផ្អែមល្ហែម និងកាច់កុងគ្នារឿង "អន្ទាក់ស្នេហ៍" វិញ តួឯកគឺកញ្ញា ដួង ម៉ានិច និងលោក សេង មង្គល ។ ដួង ម៉ានិច ថា នេះ ជាភាពយន្តទីពីររបស់នាងក្នុងទូរទស្សន៍ប៉ុស្តិ៍លេខ៥ បន្ទាប់ពីរឿង "ហង្សបាក់ស្លាប" ដែលទទួលបានការពេញចិត្តខ្លាំងពីទស្សនិកជន។

ប្រធានផលិតកម្មវិធីប្រចាំនៅប៉ុស្ដិ៍លេខ៥ លោក ហួង តារាមុនី បានឲ្យដឹងថា លោកមានមោទកភាពចំពោះអ្វីដែលក្រុមសិល្បករខ្មែរ សម្រេចបានឲ្យស្ថានីយទូរទស្សន៍របស់លោក។ ដូច្នេះហើយ លោកសូមកោតសរសើរ និងឲ្យតម្លៃខ្ពស់ ចំពោះការខិតខំប្រឹងប្រែងពីគ្រប់ផ្នែកទាំងក្រុមការងារ និងសិល្បករ។

លោក មុន្នី បន្តថា លទ្ធផលនេះ នឹងជំរុញលោកឲ្យបន្តការខិតខំប្រឹងប្រែងលើការផលិតភាពយន្តដែលមានគុណភាព ហើយថា ប៉ុស្តិ៍លេខ៥ នៅមានស៊េរីខ្សែភាពយន្តច្រើនទៀត ត្រូវផលិតនៅឆ្នាំ ២០២០ខាងមុខនេះ៕