Liverpool កើនចំនួនអ្នកគាំទ្រជប៉ុនខុសពីធម្មតាក្រោយទិញបាន Minamino

2019-12-20 03:29:51
ចំនួនមតិ 0 | ចំនួនចែករំលែក 0

ចន្លោះមិនឃើញ

Liverpool បានប្រកាសពីការចុះហត្ថលេខាទុកមុនយក Takumi Minamino ពី Salzburg កាលពីថ្ងៃម្សិលមិញ ដោយផ្ដល់អាវលេខ១៨។

Minamino

តារាឆ្នើមសញ្ជាតិជប៉ុនត្រូវ Liverpool ទិញពី Red Bull Salzburg ក្នុងតម្លៃផ្ដាច់កុងត្រាប្រមាណជាង១០លានដុល្លារសហរដ្ឋអាមេរិក និងអាចលេងឲ្យក្លឹបថ្មីចាប់ពីខែមករា ឆ្នាំ២០២០តទៅ។ Minamino ស៊ុតបញ្ចូលទី៩គ្រាប់ និងបញ្ជូនបាល់១១ដង ក្នុង២២ប្រកួតរដូវកាលនេះ។

វត្តមានរបស់ខ្សែបម្រើជនជាតិអាស៊ីមិនត្រឹមល្អតែការលេងលើទីលាននោះទេ ប៉ុន្តែចំណេញផ្នែកទីផ្សារកប់ក្ដោងសម្រាប់ Liverpool។ គេឃើញមានអ្នកកាសែត និងសារព័ត៌មានអាស៊ី ក៏ដូចជាប្រទេសជប៉ុនផ្ទាល់ចាប់ផ្ដើមផ្សព្វផ្សាយពីក្លឹប ហើយខ្លះទៅដល់តាំងមូលដ្ឋាននៅទីក្រុងលីវើភូលផ្ទាល់តែម្ដង។

អ្នកគាំទ្រ Liverpool នៅប្រទេសជប៉ុនមានការកើនឡើងខុសពីធម្មតាដោយហេតុថា Minamino គឺជាតារាបាល់ទាត់ល្បីប្រចាំប្រទេស។ លើបណ្ដាញសង្គមដូចជា Twitter, Instagram និង Facebook មានទំព័រ LFC Japan, LFC Tokyo ត្រូវបានបង្កើតឡើងព្រោងព្រាត ហើយចំនួនអ្នកចុច Like លើ Facebook និង Subscribe ឆាណែល Youtubeរបស់ក្លឹបក៏ច្រើនជាងមុនដែរ៕